Friday, March 18, 2011

Mararah liata Hriiah pathaina a hnai vata Ko tloh leipa thina a hluh


Atamy Vanglain.org thatih palasana liata Mararah liata ko (1) tloh leipa 25 thina ama laichadaina tawhta hmo papuapa cha a khihtlah hro liata hriiah pathaihna lachhah a hnai tuna vata a cha, tahpa ta Medical Team ta ama reih. He thina liana heta cha hawhta hri chichhihpa a chareina vata cha leipa ta, kahhrao hriabuh a chareipa liata a thipazy ama cha tahpa hmo papuapa a cha.
He thatih alaichadai awpa heta  Health & Family Welfare Department ta Dr Lalrochuanga, Padaetrician, Dr Pachuau Lalmalsawma, MO, NRHM, Aizawl Ci­vil Hospital liata Microbiologist, Lalzir­tiri nata Yogesh zy  March 12 khata Saiha la tuapa ama cha.
(He thatih he Maraland Post liata chhao Dt. 25.02.2011 nata 11.03.2011 liata eima vaw papua haw hra)

Abidal cha hlaotlohpa apa a cha


Thatih palasapa hawhta French International nata Barcelona FC Defender, Eric Abidal cha zahnia khata hlaotloh kawpa ta apa a cha. Barcelona khihpi Hospital sakha liata Dr Josep Fuster Obregon, Surgeon chhihthana ry liata he operation he hneipa cha ta, dawh thoh chhoh ta patlopa a cha. Abidal hmahsiena la pangai lyma awpa ta hnabeiseihpa cha ta, khatima a pua aw tahpa pahno pasiapa a cha taraw leipa ta atahma hata (noh sarichhoh) cha pua thei awpa ta hnabeiseihpa a cha.
He ama apa pathi liata sapachiahpa he a kheihhawhpa cheingei ma a cha, tahpa dawhtyzy ta palasa leipa ei ta, anodeikuala apachiahpa cha ama thy haw tahpa ta phuahpa a cha.
Barcelona Defender tlahleina vata Hospital liata a y ngahaipa he khatita ma Barcelona Team zy a pazao heih aw, tahpa pahnopa cha leipa ta. Atahma he Game 10 akhaih awpa hnei ei ta, La Liga liata a sah chaipa ama cha chy.

Thursday, March 17, 2011

ECM ry liata Hria awpa Missionary a tlohpazy


Atliata liata Maraland.net liata palasapa hawhta ECM Mission Board ry liata hria awpa Missionary lana cha hneipa cha ta, he ary liata moh nata khih palasapazy he atlohpa ama cha tahpa ta thatih daopa a cha. Chazy cha:
S/No
Moh
Local Church
1
Jack Chongthak
New Siaha
2
Delili
College vaih
3
B.Vaki
New Colony
4
C.Ngona
Lolei
5
B.melizi
Lolei
6
Haddy
Phura
7
Byhna
Gilgal
8
VT.Ngona
Siaha vaipi
9
C.Ngoha
Mawhro

(He he sms ta eima daopa cha ta, thatih sia viapa pahno via awpa a chhuah taraw pi ta, chahrasala bie eima chho thei leipa vata a ualua ta eima vaw soh chy. A sia viapa eima pahno pataw nata update awpa tlai eima vaw chhuah aw)

Kaka ta Abidal chata Thlahchhakhei awpa maniah ahaw


Khizaw Football liata chyhsa mohpathahpa nata rohnahpa ta rei thei awpa Kaka ta a viasa Eric Abidal chata thlahchhakhei awpa ta maniah ahaw. Eric Abidal he Barcelona FC liata akhaih ngahaipa cha ta, pathi liata sapachiahpa (liver-tumor) a (operation) awpa abyuhpa chata, atanoh a cha vei khia myla he operation hnei awpa a cha. Abidal tlahleina vata heta a viasa nata ano pasahsatuhpazy ta pei tah kaw sai ei ta. Chahrasala, pahnopa rakha liata Kaka ngalah heta tlahna chata thlahchhakhei awpa ahawtuhpa alaluah chaipa a cha.
Khizaw liana heta Krizyhpa hluh chai pi ta. Aviapahchaipa ta Notlarah liata Krizyhpa ama hluh chaipa vata atahma khizaw liata chyhsa mohpathahpenawh (Celebrities) he a hluh viapa cha Krizyhpa ama cha tah theipa a cha. Chahrasala, Krizyhna he khizaw liata vaw padah via lyma ta, a moh deita ta Krizyhpa tla cha ei ta, a hmeiseihpa ta Krista Zisu a hrokheipa he ama chyh kaw. Chahrasala, cha hry liana cha Kaka he cha a nohto hro liata Krista a hrokheipa nata Khazohpa liata a ngiapana khacha a pahniehpa a cha. Chavata, ano cha a viasapaw Abidal tlahna hmia a vaw hmo heih thei nawpa ta ‘Thlahchhana’ a pacha peimawh chaipa a cha.
He thatih lana EuroSport.com chhao ta Puhpa Kaka he “Committed Christian”  tahpa ta ama roh. Kaka heta, “Abidal chata thlahchhakhei ei sihla, Abeipa ta byhna (tlahna) pie mawh sy” tahpa ta ano pasahsatuhpazy hnohta ahaw.
Kaka he atahma Real Madrid FC liata akhaih ngahaipa chata, ko 2007 liana khata FIFA Player of the Year a vaw cha hapa a cha. Lyma ama raina daihti liata a biereipa chhao mohropazy lyu lei kawpa, “Abeipa” hnohta alyna bie a reihpa nata Abeipa baona vata duasu rohnahpa liata aduah theipa a cha, tahpa ta a reihpa cha ta. A satlia daihti liata lahpino a hnei hla via cha, Bible pachuna hawhta chano a chaku-chalie lei awpa bie khacha ano liata ataihpa, a chapaw chana cha a lahpino chata ngalah a hmahpa a cha.

Wednesday, March 16, 2011

Atako Mizoram Quota Technical Entrance Exam liata Cl-XII Syllabus ngalah hmah aw


Mizoram State Quota tawhta Technical Line liata achu awpazy Entrance Exam cha atako April 26 khita raopa cha ta, he Exam awpa Syllabus chata Cl-XI & Cl- XII hma awpa tahpa cha Mizoram Board of School Education (MBSC) ta Corrigendum taopa ta Cl-XII Syllabus ngalah hma awpa ta bie a papua.
                He Exam-na awpa Brochure he phia 26 cha ta, Admission Form sano y ta, Rs. 300.00 ta zuapa a cha. He Corrigendum taona chhapa cha chyhsa hluhpi Cl-XI pahlaopa ama pahno lei vata, Cl-XII ngalah tla cha chy sala, tahpa ta pananopa a cha. Ko heihpa tawhta cha Cl – XI pahly lyma awpa hawhta reipa a cha hra. Achhapa chhao Siku hluhpi liata Cl-XI na he phahnai a ngiahkhei kaw leipa ei ta, he hawhta Entrance Exam liata pahlaopa a cha tawhta cha, hmiala hlata pacha peimawh via awpa ta hnabeiseihpa a cha, tahpa ta MBSC zy ta Vanglaini Thatihbu hnohta ama chho.
                Atako he Techninal Entrance Exam-na liata hmo byuhpa - Syllabus taopazy, supervisor, invigilator, question setter leh mark pahlyh awpa zydua he MBSC ku liata sopa cha ta, MBSC ta a taochiehpa Result cha Higher & Technical Education hnohta a pangia aw. Cha tawhta H&TE ta Seat atlyhna nata rairuahna a hnei aw.
Source: Vanglaini