RAIRUNA

By A.Zawngia      

 (He Article he Pasaipha Weekly Bulletin, Shillong liata papua hapa a cha)

                Rairuna he hrona a hneipa zydua chô liata tlôkhaipa châ ta, chyhsapa ngâlâh heta atyh ma pi. Hro liata khâchâ abaipa miakha a châ. Anodeikuala, chyhsa hluhpi ta rairuna he khapa ma a cha tahpa pahno leipa pi ta; a pha nata pha leipa pachhaih thai hra ma pi. Eima chô liata a tlô awpa a ngiaroh kaw pi ta, khoh tyh ma pi. Thokha cha rairuna a vaw tlô nata pathlâ pazi thai leipa ei ta, atymâ khei ei ta, raona a tlôkhei tyh. Thokhazy hra rairuna cha a vaw tlô awpazy cha chatôh ngah leipa ei ta, khôkhâh a chhuahpa ta a rasai ei ta. Achhana liata pachana pahno khao leipa amo hrona apahleipazy y ei ta; thokhazy hra cha buana pathla nawpa ta liah-ny taih cheih ei ta, chahrasala rairuna ama pathlâ dâh a su leipa vata rairuna cha hmiala hlata ru viapa ta a vaw tlô via tyh.

Rairuna cha khapa maw?

                 Rairuna he “rai” tahpa nata “ru” tahpa mohchho miano apazaopa châ ta, “na” tahpa heta pa-i ta, Abstract Noun a tao. “Rai” tahpa cha nohto hmo eima tao tyhpa, eima ngiahpa nata byuhpa eima hria tyhpazy a cha. “Rai” nata “hria” tahpa tawhta ‘raihria’ tahpa bie a vaw puapa a cha. Rai cha a nao kawpa ta hria theipa y nota, thokha deikua cha naosia kawpa ta a tao thai leipa ta, a vaw ru ha nata “rai” a “ru”, “rairu” eima tah tyh. Tiamapazy ta cha “rai a ru” tahpa bie he thathipa reihkah, ama hriahoh leipa vata he reihkah ama hmapa hawhta pacha ei ta, chavata “rairu” tahpa reihkah he hmah khoh veih ei. Anodeikuala, rai zydua he nao khai hlei leipa ta, arupa cha a y hrapa a cha.

Rairuna chi nanapazy

Rairuna eima tahpa heta kao hluhpi ady thei. Rai hria thei awpa ru kawpazy, hria thei lei awpazy chhao a pahly khai. Nie nata baw liatazy, Taka phusa aphahlana vatazy, Tlahziah thai leina vata nata Thina atyhna vaduana vata rairunazy, chakâhna vatazy rairuna thata a tlô thei. Rairuna eima tahpa liana heta chhohkha, khitlah, niebaw tluana, achuna, raihriana, etc. y khai ta, cha liata mophakha rairuna nata mohropa rairuna a nano heih.Eima rei leipa hluhpi a y hra. Achuhaipazy ta rairuna eima hneipa cha “achuna rairuna” a cha via chai. Chyhsa hluhpi ta châ eima chu ngahaipa he rai cha ta, a ru kaw tahpa pachana hlei leipa ei ta, a naosia kawpa ta tao awpa ama chhuah tyh. ‘A ru’ tahpa alapasiana cha  chyhsa hluhpi ta achu hra ei sala, a hlaotlohpa ama y nota, a hlaotloh leipa varo ama y tyh hra. He vata achuhaipa hluhpi cha achu hra taraw ei ta, tha nata sôh hluhpi ama hryuh tawhta achu patlo lih-la leipa ta ama basai ha tyh.

Rairuna pathla nawpa ta Thaina :

                Rairuna he hrochhôh zydua ta y awpa cha ta, noh chareih ta eima pathla awpa a cha. Eima vaw pih pataw nata rairuna y lyma ta, a y via lyma awpa a cha. Cha hawhta a y via lyma awpa cha pathla nawpa chata cha (thaina nata sona) achupa eima cha, tah ei sih la reih chhei ma pi. Achu hluh viapa nata achu sah viapa maih ta rairuna chatoh hluh via ei ta, a yzie pahno via ei ta, a pathlana dah chhao ama thai via lyma hrapa a cha. Cha hawhpa chyhsazy cha, cha nata rai “athaipa” ama cha. Rai a thaipa nata a hriana dah, a pathlana dah a pahnopazy chata cha rai he a ru kawpa vaw y hlei vei. Thai nata thai leipa liata a pahniehpa kaw. Zawmara pachapa ta rairu kawpa eima tahpazy chhao “athaipazy” chata cha rairuna cha leipa ta, rai naopa nata rai pha kawpa tlao a cha. Cha hawhpa rai a thai patluapa cha, ama hlao chhao a sah via lyma tyh. Khihsana lia chhao ta rairuna a pathla theipa ama chapa vata chyhsa peimawhpa ama cha.

Rairuna ta a sopa nata hrupa

                 Atahma eima khizaw liana heta cha chyhsapa chana (quality) thliena he thaina liata (Degree/Qualification) nata raihriana a cha ha ba. He vana heta, thaina  nata raihriana a hnei leipa ta a pasosa kawpazy cha a hrupa cha ha ei ta. Thaina nata raihriana a sah kawpa a hneipazy cha biechho-thahchho liata mohropa hawh tah vei hra sala, chyhsa sopa tlao ama cha haw. Achhapa cha thaina asahpa a hneipazy ta rairuna yzie pahno via ei ta, a pathlana dah pahno via ei ta, cha hawhta ama raihriana chata chyhsapa rairuna hluhpi a vaw  pathla  thei hapa vata a cha.

Rairuna vata athohna

                Pakhata ta eima pacha khia cha, rairuna eima tahpa he a yzie eima pahno leipa vata ‘rairu’ tahpa alyu kaw. Rai yzie pahno ei sih la, a hriana dah nata a pathlana dah eima pahno khia cha ‘rairu’ cha leipa ta, ‘rainao’ a cha. Apakhona ta, eima vaw pasana nata kheihta tao awpa ma a cha, pahno khao ma pi; eima nôpo kaw tyh. Anodeikuala, dawhtyzy ta cha pahno pasia ei ta, thohna miah pie ei ta, eima nôpona nata rairuna cha anaosia kawpa ta ama pathla thei. Cha nota, tlah-leipazy rairuna cha dawhtyzy chata nietluana cha ta, buakha ta liata phusa varo ama hmo tyh. Khataih su lia rai, dawhty cha chyhsa ta angiah khai ei ta, chyhsa peimawhpa nata zachhihpa ama cha lyma. Ch’awkhiala, rairuna he “pha vei” tah thei leipa pi ta; rairuna heta chyhsa chata hmo pha kawpa cha ta, athohna tlokhei ta, rairuna pathlatuhpa cha chyhsa zachhihpa nata peimawhpa ta ama cha.

                Chyhsa rohnahpa nata mohpathahpazy thatih eima chu pasia khia cha, ama hro liata rairuna atyh leipa y veih ei. Rairuna ama tyhpazy cha  nota leipa, chyhsa hluhpi chata pathla thei lei awpazy cha ta. Riahpha kawpa ta nata daothei kawpa ta vaw chatoh papuatuhpazy ama cha. Rairuna ama tyhpazy kha vaw pathla theipa ta, chatoh papua vei ei sala, ama duasu nata tovyuh kaw to lei awpa ama cha. Hezy tawhta pachuna a ypa cha, rairuna ama pahniepa chata hlaotlohna pie ta, chyhsa rohnahpa ta a tao ei, tahpa alapasia kaw.

Rainaopa hlata rairupa

                Rai nao kawpa hriapa he no-ai tlao a chhih ta, rainaopa hlata rairupa hriapa he tlao a vaw pha via. Apalypa-uasana (Games) nata ataopasuana (Sports) eima taopazy he anao kawpa hlata a ru viapa palaopa he eima pahah khei via lyma tyh. Apalypa-uasana liata achhah y lyma ta, pitlohpa chata hatipa eih palaopa hoh a chhih vei; achhapa cha rairupa a cha leipa vata a cha. Achhah a sah via lyma ta, rairuna hluh via lyma ta, cha liata thai kawpa ta chatoh lyma awpa vaw byuh ta. Cha hawhpazy cha eima hro liata rairuna eima kaw chatoh awpa apalasa ngaita kaw.

                Ei kha, Kolkata la sie no ta Kothari Hospital liata hmo sakha ei tyhpa cha, moto ta ama rai liata bua kaw sai ei ta. Cha nota a rai liata bua lei chaipa nata aru lei chaipa cha, Lift ahatuhpa kha a cha. Atyuna su kha, nohdi ry (A.C) liata atyuhpa ta achho-nah-za ta achola khy heih zu heih tahpa cha a rai a cha. A raihriapa cha rai rupa cha vei, chahrasala no-ai achhih ngasa. A hmia phao tawhta a ai kaw tahpa pahno thei ta. Ei kha cha daihti ryhpaohpa liata bie kei chho na ta, “Papu, na la na vahnei kaw na, mohropazy ta ama bua kaw sai nota na cha  nohdi ry liata atyuh molopa  tla cha ta,” kei tah na ta, a cha daihma. Rai hropa, a ru viapa hria awpa akhona bie thata ei na chho.

Rairuna he byhna a cha

                 Rairuna he vaw y leipa cha sala, hlaotlohna nata hlaotloh leina y leipa aw ta, chyhsa rohnahpa nata riahpha chhao y hra aw vei. Ahrupa y leipa aw ta, asopa y hra aw vei. Cha thaipa tlyma, a thai leipa tlyma y hra aw vei. Rairuna heta eima chana miah pasia ta, ahrupa nata asopa, athaipa nata thai leipa, hlaotlohpa nata aleidiapa, riahphapa nata riahchhiepa maniah a pachhaih. Rairuna eima pathla lymapa nata pahniepa heta hro liata eima hlaotlohna atlôkhei lyma ta, alyna maniah a pie. Chavata, rairuna he eima hao awpa cha leipa ta, hlaotlohna miah pietuhpa cha ta, byhna tlao a cha.

                Rairuna eima hnei awpa cha ta, anodeikuala, rairuna eima tyh daihti liata eima paphoh awpa cha leipa ta, eima rasai awpa cha hra vei. Palôh pasi kaw na chota pathla lyma awpa nata pahnie lyma awpa eima chhuah awpa a cha. Rairuna khôta lia maih ta hlaotlohna y tlôh ta.