Chakaona Thiehpa : Lôpu Pastor Bia liata

Abeipa ngiachhiena nata Awnanopa nôpawzy deichhyna zawhzi ta Probationary Pastor ta kô 3 tlai ei ECM Assembly ry liata ei vaw chakao tawhta atakô ECM Assembly liata (Dt. 5th March 2017) khata Pastor pitlohpa ta Rev. Thylua Hlychho, Moderator ta eina chahnao haw  ! Abeipa moh cha reithaipa ta y mawh sy ! Atakô Assembly liana heta ei viasazy - Rev. HT. Beingachhi nata Rev. C. Josia zy chhao chahnaopa ama châ hra.

Ordination (L-R) : HT. Beingachhi, C. Josia, A. Zawngia

Assembly vaw chhâ ta, Pastor chahnao thiehpazy nata a parohpa thokhazy yna awpa paryh awpa ta Pastoral Committee thlai a vaw tyuh ei ta, keima chhao ei yna awpa su chhao thlai ei vaw pahno haw hra. Abeipa ta chakaona thiehpa raihria awpa ta ei ngiatlâh liata maohphaona eina pie haw. Ei chakaona awpa cha Lôpu Pastor Bia mohôh awpa a châ. Lôpu Pastor Bia Biatuhpa he Rev. M. Beichi châ ta, ano chakaona he ei pazao awpa a châ. Chatanachata ano chhao keima yna su, KPP Headquarters liata Co-ordinator maohphaona einâ thla hra awpa a châ. Ano he chhôhkha lâ rairuna vâta Aizawl lâ a sie hapa vâta ano a vaw tlô pataw nahta in-charge a hlâ awpa eima châ.

Rev. M. Beichi chhao Dt. 18th April 2017 khata Aizawl tawhta vaw tlô ta, Dt. 19th April 2017 khata KPP Co-ordinator in-charge a hlâ pi ta, he noh py heta Bia thiehpa lâ pangaipa ta ei sie pâ lymâ haw. Khôpai liata awnanopazy ta Dt. 20th April 2017 noh ta thlahchhâna na hneipa ei ta, pati dôhkhohnazy eima hnei. Dt. 21st April 2017 khata Khopai tawhta Miepu arie awpa ta ECM Moderator Rev. Thylua Hlychho chhaota eima thao haw heih. ECM Moderator he keima na pathlie awpa ta Assembly lâ tawhta raopa a châ.

Khopai Awnanopa chhihthatuhpazy ta thlahchhana eima o liata ama hnei

Vahia khih khô liata eima Motor âtaw

Keimo deita eima tao thei leipa vata Vahia satliazy ta maniah ama bao

Miepu liata Awnanopazy ta maniah aw ydy ei ta, zâ kha eima rie. A mylâ Dt. 22nd April 2017 noh ta Lôpu pangaipa ta sie heih pi ta, Lôpu liata thopizy eima doh khai tawhta Khaikhy lâ palâh pi ta, Khaikhy liata apakhyna eima hnei khai tawhta Lôpu lâ eima vaw kua heih.

Miepu Awnanopa chhihthatuhpazy chhaota

Miepu khih

Miepu khih

Dt. 23rd April 2017 vaw châ ta, Apakhyna nata Sunday School eima hnei khai tawhta Lôpu Pastor Quarter liata Rev. Thylua Hlychho chhihthana ry liata in-charge ahlâna hneipa a châ. He noh tawhna heta Abeipa ta chakaona thiehpa eina piepa liata chieh lei kawna chôta ei chakaona ei pazao haw.

 My thei lei awpazy  cha, sâkhana liata Khopai Awnanopa tawhta Macha K. Heitu nata K. Mc. K. Tlabei zy ta Khopai tawhta Lopu taihta na za pathlie thei hra ei ta, ama chô lâ liata ei ly hmeiseih. Moderator zy chhaota Lopu pangaipa ta eima sie nota, Vahia khih khô liata eima Motor cha âtaw ha ta, keimo ta eima tao thei khao leipa vata Vahia lâ maniah bao awpa ta kaw chho pi ta, Vahia satliazy maniah ama baona zawhzi ta eima pua thei. Eima ly ngaita kaw.

Rev. M. Beichi nata incharge eima hla

Lopu Awnanopa chhihthatuhpazy