Saturday, February 18, 2012

MDC Bia 3 Baichhipa a cha (Biehnohchaipa)

MADC ry liata MDC Constituency sa 3 baichhi awpa cha Delimitation Committee zy ama tyuh tawhta atahma cha pasiapa cha ha ta, Bia thiehpa papohpa a chapa vata Bia thokha cha paryhpathipa a cha hra. Atahma biehnohchaipa biedaona liata cha he hawhna heta a cha:

1. Vahia Bia (Biathiehpa): Vahia, Miepu nata Lopu (Laki khih a hlaoleipa ta Bia thiehpa)

2. Laki Bia (Biaparohpa): Laki, Khopai nata Ahmypi (Aparohpa liata cha Laki Vahia nata Lopu. Khopai nata Ahmyhpi he Zyhno Bia liata a ytyhpa a cha)

3. Pala Bia (Biathiehpa): Pala, Maisa, Lohry nata Lodawhtlah (Pala he Tokalo liata abaityhpa cha ta, Biathiehpa ta ama tao)

4. College Vaih -II (Biathiehpa): College Vaih AOC tawhta nochhi la, Education Vaih nata New Siaha achyhta a kaw chakapa ta)

5. College Vaih -I(Biaparohpa): College Vaih AOC tawhta N.Colony Baih la zydua nata N.Colony a rakhapa, Chhochhopaw vaw a kaw o.

Sunday, February 5, 2012

Siaha Meikapa Baona chata Shillong Awnanopa ta Thyuna pakhy

Atamy Shillong Mara Church Apakhyna cha, Siaha liata chhiena tlopa, Bajar Vaih mei ta ka hapazy taokheina daihti hmapa cha ta, he daihti he Mc. K. Beizalaihmo ta a chhihtha. Siaha liata hmo tlopa Report chyupa nahthliepa a cha tawhta Abeipa reithaina hlasapa cha ta, cha daihti liata Thyuna lapakhypa cha vaduana atyhpa, o nata lyu apahlei hapazy chata baona chata a cha. He thyuna atlohpa he a zydua ta Rs. 8867.00 a cha. He thyuna he Abeipa hnohta Rev. Pheitha Lava ta a hla.

Anodeikuala, pakhybah tawhta KNP, KTP, MSO, nata Awnanopazy buakha Vesty Hall liata atyuhpakhy ei ta, Rs. 10,000/- patloh lalao awpa a pha ta ama pahnopa vata KNP ta Rs. 500/-, Awnanopa ta Rs. 400/-, Mc. Manase Chozah, Mc. A. Beimohlu Rs. 100/-, Mc. Beizalaihmo Rs. 33/- ta ama pabie.

Thursday, February 2, 2012

Siaha khihpi a raotuhpa a phuah haw. Puhpa Vanlaltlina a cha

Siaha khihpi mei ta a raotuhpa cha patu hapa cha ta, ano raopa tlai a cha, tahpa ta Puhpa Vanlaltlina ta a phuah haw. Eima vaw palasa hapa hawhta he o paka awpa ta pangiasapa cha  MTP zy ta ama patu tawhta a phuah haw. (he he Maraland.net liata a video chhao mo thei awpa a y). Ano he Saikhamakawn, Aizawl tawhta akhypa cha ta, otlo ma a pie thei leipa vata o hneituhpazy ta vaw papua tyh ei ta, cha hawhta ama papua tyhpa cha ta, o he ei rao thlahha aw na, tahpa ta vaw vyu tyh ta, zahnia za cha a rao hra tlai, tahpa ta a reih. A raona a reina dah liata deikua sathaw mei-o (mawmbati) pakhaih ta, na khodah hawhta vaw y teh, tahpa ta o a puasaipa hawhta a reih.
Siaha Bajar opakatuhpa:Vanlaltlina

Siaha Bazar Meipaohpa lata alie: Tlaikaopaw ta raopa hawhta ama reih

Mararah liata chhiena raroh y ngaitapa zahniaza khata khata tlo ta, cha cha Siaha khihpi sohdaohnazy yna rah chaby liata y 30 rachhoh cha mei ta ka khai ta, meipaohpa lata alie khai haw. He he mei ta chhiena tlopa hry liata cha Mararah liata a raroh y chaipa a cha thei awpa hawhta pangiasapa a cha. He meikapa he zala dawh 10 rachhoh tawhta vaw puapa hawhta reipa cha ta, meihlih a vaw puana dah, okapa a vaw thaona dah he reidah nano nanopa a ypa vata biedo chaipa deikua pahnopa cha thei mah vei. Thokhazy ta Tlaikaopa pakha tawhta a vaw thaopa hawhta ama reih.
Siaha meikapa (photo Courtesy: Maraland Rose via Facebook)