Article: Atobina

By Mc. Ismaela Vytuchhoh, Shillong.

A hmiatua chaita he a chô liata biepipa “Atobina” tahpa palasapa he achyuta ta chhopasia tua ei sihla. “Atobina” tahpa heta yzie nano nanopa a hnei. Eima pôhpa atobinazy, ochhôh lyukah tobinazy nata kao hropa liata atobinazy chhao y hra sala atobina yzie cha hmo yzie dopa nata sianô kawpa ta paso tipa paryhpa tahna a cha. Atahma ta rei ei chhuah chaipa deikua cha chy nata sia hleikhô ta ochhôh lyukah tobina a cha via chai.

He eima pahrana khizaw nata a chhôh liata hmo ypazy chhao  asosah via lymapa hawhna heta chyhsapazy chhao pi ta eima pachana nata eima khodahzy chhao he a sah via lyma hra  tah theipa a cha. Pôhpa atobina chysia heta chyhsa ahyrai eima y zie maniah a chhopasia kaw. Chavata eima chysia he pathaih sala, za achhisala, eima tobina heta eima viasazy pachadah tlyma, palôhzy tlyma, apasasathei tahpa pachana chôta eima tobipa he a pha. Eima khihsana ta apha leipa khô lata atobina apachapazy eima y thlahha chy ngyu nata ala. Chavata ataopathita eima sohsi via awpa abyuh ngyu khiamaw? Abyuhpa ta eima pahno khiatala kheihta e eima taopathi aw? Pachana eima hnei chyu nata ei pangiasa. Pachadah nata patuapaluazie kao hlupita  a y thei. Y hrasala he hawhna heta reih ei sila.                          

CHYSIA   HE  PATHAIPA   ABYU/ANGIAH:

Eima tobina he a kheihhawpa rai cha sala apathaihpa abyuh. Ama rupa hluhpi hnei hra ei sihla, pathaih leipa sala ataotuhpa lohzaona atlôkhei theipa a cha. Chavata  eima chysia apathaih khiatala eima palôhrupa chhao pathaihta, aly ta,  thathyu chhao achhih via hra, tah ei sihla, tah chhei ma pi. Eima pôhpa pathaih awpa a cha. Eima pathaih hleikhô ta eima chysia apathaih hra awpa abyuh. Amâ naopa hmâhta cha hra sala, apathaih khia cha za achhih ta, chyhsa chhao eima duahmo tyhpa hlâ chhao ta maniah ama pasâhsa hleikhô ta mania mohtuhpazy châta chhao mohthadah achhih hra. Chavata khapa hropa zydua hlata eima pathaih tuapa abyu.

POH-RAOH TA   AHMIEPA HE EIMA PACHA  TUAPA    ABYUH:

Eima tobi hlata eima pacha tua chai awpa hry liata hmo sakha cha, eima pohraohpa (physical body) heta ei chysia he ataopa cha sala, ahmie ma hmie vei ma ei pacha tuapa  a cha. Atahma hlâta eima tobi dâh nata Marasawzy duahmo na pacha beih ma? Pachâ khi tlai atlôh kaw bapa ta alâ. Eima pôhpa hlâta eima chysiazy he lai via ha ba ta, atobidah thai /pahnopasia ba ei suh u. Eima tobidâh heta eima palôhrupa kha moh ha tlôh ta. Asohsi kawna chôta kha atobi achhuah ei suh u. Eima nohto hro liata eima ngiah chaipa cha hri-iah pathaihna chata, cha khai tawhta apazipa deikua cha eima pôhpa apamai/akhu nawpa ta chysia he eima ngiah hapa vata eima tobina heta zachhihna maniah a pie hmeihseih tlai na, tahpa kha angiahpana chôta kha atobi ba ei suh u.

TOVYU  LIATA  PALOHTLAH  DAH EIMA HNEIPA /THAI KAWPA ABYU:

Eima biehrai liata eima moh khia cha  tovyuh liata palôhtlahna he  ngiahpatuhpazy tao awpa peimawh chaipa sakha a cha. Chavata keimo angiahpatupazy pi ta cha  khapa duasu lia raita  aduah ha hra ei sihla, eima tovyuh liata palôhtlah dah he eima hnei cheingei awpa a cha.  Eima hnei thei tlôleipa khiatala eima pihpathi mah vei na, tahpa eima Biehrai tawhta asia kawpa ta pahno theipa a cha. Chavata eima tobina chôchah liata chhao eima hnei chhôhpa he hmâ phahnai ta palôhtlah thaina he eima hneithai awpa angiah hmeihseih. Eima palôhrupa tawhta  pathaihleina/sialeina he apuapa cha tloh ta, eima hnei chhôhpa liata tovyuh palôhtlah dah he achu ba ei suh u.  

He achô liata palasapazy tawhna heta keimo ngiahpatupazy ta eima hro parohpazy siesai byuhpazy a y ma, y veima kha amohpasia ei sihla. A y khiatala atobina dopa thlai pachâ ba ei suh vy. He achô liata palasapazy he keimo ngiapatuhpazy hrozie taopathina chata châ sala, tahpa ei khoh hmeiseih. Eima palôhrupa apathaih khiata cha eima chysia apathai hra awpa angiah tahpa cha eima pahno khai aw. Eima ngiapana he khizaw soh nata thi tlaichhaina ta ma  eima hro lia  heta a y? Eima pachâ pasia awpa abyuh hmeiseih. Eima Biehrai  2 Kawrini Mozy 4;18 liata cha, “Hmo hmô theipazy he moh leipa ta, hmo hmô theileipazy cha tlao moh tlôh pi ta; Hmo hmô theipazy he bohpi leipazy chata cha ta. Hmo hmô theileipazy deikua cha chhazaw chata cha tlôh ta,” tahpa ropa a chana hawhta keimo ngiapatuhpazy pi heta eima hmô theipa chy nata sia lia heta palôhrupa apatypama leipa ta, eima Khazohpa khodah tlao pachana chô ta hro kha atobih ba ei suh u. Eima ngiapana nata ahmiepa ta eima opalyuhrizy chô liata hro kha achhuah ei suh u. Eima chô liata khapa hmo rai tlô hra sala, tovyuh liata palôhtlah  kha achhuah ei suh u.

Eima pôhpa atobinazy hela buakha cha deita a cha tahpa he pahno ei sihla; chhazaw chata  a chaleizie eima pahnopasia  tua awpa abyuh. Eima Bible su thokha tawhta hmô theipa a y hôlô. Chavata eima mohpasia awpa abyuh hmeiseih. Eima pahrâna aleilô chô liata angiahnazy hela chôpho ngiahna deita ta apihpathipazy hawh deita a cha. Chhazaw rah maniah tlôkhei theilei awpazy he cha pachâ leipa ta, tlao hmopha taopa he achadai lyhlia ei suh u . Eima  tobina he chysia ngalah cha leipa ta, eima palôhrupa lâta kheihta ma eima tobi hra va tlyh? Khazohpa bie hmeiseihpa ta kha atobi ba ei suh u.

Atanoh eima rah su thokha eima sai khiatala adyhryhna rai y khaovei; khazia maw? Eima rah ryureihtuhpazy heta Khazohpa china raita eima hnei khao lei vata khiah maw! Keimo pha tahna hawhta eima tobi vata khiah maw! Khazohpa he khatino raita eima hnohta kha y thlahha tlôh ta, eima nohto hro liata eima Khazohpa china he hnei ba ei suh u. Sapa ta eima chakao tyhpa kha cha khao leipa sala,  Khazohpa Thlahpa Pathaihpa ta tlao chakao ba ei suh u. Eima Khazohpa cha suto liata kha rohnah chai tlôh ta; parôhnahsa hra ba ei suh u. ‘Ngiachhie tlah lei keimo zy tlai chhazaw hrona cha mania pie haw,’ keimo deikua sapa ta eima chakao chy aw ma? ‘Khizaw liata lyna he achha tyhna; aphana chhao ta na a chha.’ Chavata chhazaw lyna eima hnei thei nawpa ta eima ngiapana he kha amoh pasia ba ei suh u. Chavata Khazohpa khodah hawhta “ATOBINA DOPA” he khapa ma a cha tahpa pachana chôta atobi bâ ei suh u.  Khisa tôtuna pachana chôta nata nôpaw duasu pahnokhei thai kawna chôta viasa zy chata rairuna tlôkhei lei awpa ta atobi dah thai ba ei suh u.  

(Note: Mc. Ismaela Vytuchho he atahma Shillong Mara Church liata Local Secretary nata KTP Advisor chakaona rai a hria ngahaipa a cha. Article pha kawpa a vaw thyupa vata eima ly hmeiseih. Hmiala liata a vaw thyu lyma awpa ta ahaw pi ta. Mohropa athyu khohpazy chhao khatino rai ta thyu theipa a cha. email: editor.maralandpost@gmail.com)