ECM Awnanopa nata Dr. Hamlet chochah liata Sentence Order Pending-pa a cha heih

Eima vaw palasa hapa hawhta ECM Headquarters nata Dr. Hamlet Hlychho likawh cha biechhana tlo daihmapa cha ta, pahno theipa liata ECM Headquarters, Siaha liata nopawzy cha thai cha hapa ta pahno pasia hapa cha ta, Dr. Hamlet Hlychho cha thailei pachasa hapa a cha. Anodeikuala, thaileipachasapa (Convict) a cha ha tarawpa ta, hrienazie awpa ‘Sentence Order’ he papua mah leipa cha ta, tarinoh 22^nd December 2011 liata papua awpa ama cha tarawpa ta Starff thokhazy Krismas chhuti ta ama vaw sie hma hapa vata papua hma khao leipa ei ta, chavata tarinoh 12^th January 2012 liata tao thei awpa pasiepa (pending) a cha.

Zisu Krista - Dawhty hry liata Dawhty rohnah chaipa - Part-I

Daihti reipi vaw update thei khao leipa na ta, Maraland Post a pasotuhpazy hnohta nama pachathaina ei cha haw hmeiseih ei. Atahma he Kolkata liata Intensive Practical hneipa ta eima yno cha ta, daihti a vaw cha-ie ta, cha hleikho ta, Meghalaya House liata eima tlo daihti liata Server a pha leipa vata khapa hmah ei vaw tao thei vei. Mohropazy mongyuh rah tlyh ei ta, ama khitlyna thatihzy rei eima paphasa kaw tyhpa hawhta Kolkata khitlyna he chyhsa hluhpi ta reih lih-la hra vei ei sala, he khitlyna nata Practical eima hneipa tawhna heta thokhazy chata cha athohna a y cheingei awpa ta hnabeiseih na ta. Chavata a rakhapa, a reih khohpazy chata ei vaw soh aw.