Zisu Krista - Dawhty hry liata Dawhty rohnah chaipa - Part-I

Daihti reipi vaw update thei khao leipa na ta, Maraland Post a pasotuhpazy hnohta nama pachathaina ei cha haw hmeiseih ei. Atahma he Kolkata liata Intensive Practical hneipa ta eima yno cha ta, daihti a vaw cha-ie ta, cha hleikho ta, Meghalaya House liata eima tlo daihti liata Server a pha leipa vata khapa hmah ei vaw tao thei vei. Mohropazy mongyuh rah tlyh ei ta, ama khitlyna thatihzy rei eima paphasa kaw tyhpa hawhta Kolkata khitlyna he chyhsa hluhpi ta reih lih-la hra vei ei sala, he khitlyna nata Practical eima hneipa tawhna heta thokhazy chata cha athohna a y cheingei awpa ta hnabeiseih na ta. Chavata a rakhapa, a reih khohpazy chata ei vaw soh aw.

Eima Bible liata Zisu ta aphawhpazy a patlahna thatih hmo pi ta, anodeikuala aphawhpazy he eima khitlah liata hmo awpa ama yhraoh leipa vata ama duasu siapa pahno ma pi. Aphawhpazy duasu he hlano tawhta atanoh taihta chhie kaw ta, achhapa cha chyhsapa pacha ta hri chichhihpa nata pasichhih kawpa hawhta ama vaw pacha tyh. Chhohkhazy liata aphawhpa ama vaw y khiacha ochhoh liata chhao pa-ysa leipa ta, khih khotho la ama vaw soh tyh. Hri a pakia pathlei awpa ama chipa vata ama kiahpah liata ahyhma y khoh leipa ei ta, pati dahdei chhao hmahta a hniapa ta pie khoh hra veih ei. Chavata aphawhpazy chata cha khizaw liata hropa he hro hnabeidy chhih ngaitapa, hrokhoh chhao achhi leipa, chhohkha nata viasazy nata khihtlah ta ama hao kawpa ama cha tyh.

Aphawhpazy he hlano Izarei daihti liana khata vaw y ha ei ta, India rah liata chhao hlano tawhta vaw y ta, atanoh taihta he hri he eima hry liata a y thlahha chypa a cha. Bei Zisu ta khizaw liata a charei daihti liana khata aphawhpazy cha a ku ta hria ta, a patlah ei, tahpa Bible liata hmo pi ta (Luk. 17:12). Zisu khata aphawhpa hri he chyhsa cho liata vaw pakia thei vei, tahpa a vaw pahno pasia kawpa kha a vaw cha. Cha hleikho ta, aphawhpazy he patlah theipa ama cha tahpa ano hmotaona tawhta hmo hra pi ta. Ko 2000 hlei a vaw sie hapa liana khata khizaw thaina nata sonazy a hnai kaw ta, chyhsa hluhpi ta ama vaw pachapa hleipa nata pahno leipa hluhpi cha Bei Zisu khata tlao a vaw pahno thlah haw. Chavata, Bei Zisu he Khizaw Dawhty thaipa zydua hry liata Dawhty thai chaipa nata Dawhty rohnah chaipa a vaw cha, tahpa ta atahma Kolkata eima tlyna tawhta athiehpa ta ei paloh liata a vaw ngia heih. Abeipa cha chhazaw ta reithaipa ta y mawh sy. 

(Thatih aki viapa eima vaw soh lyma aw. Ed.)