Siaha Bazar Meipaohpa lata alie: Tlaikaopaw ta raopa hawhta ama reih

Mararah liata chhiena raroh y ngaitapa zahniaza khata khata tlo ta, cha cha Siaha khihpi sohdaohnazy yna rah chaby liata y 30 rachhoh cha mei ta ka khai ta, meipaohpa lata alie khai haw. He he mei ta chhiena tlopa hry liata cha Mararah liata a raroh y chaipa a cha thei awpa hawhta pangiasapa a cha. He meikapa he zala dawh 10 rachhoh tawhta vaw puapa hawhta reipa cha ta, meihlih a vaw puana dah, okapa a vaw thaona dah he reidah nano nanopa a ypa vata biedo chaipa deikua pahnopa cha thei mah vei. Thokhazy ta Tlaikaopa pakha tawhta a vaw thaopa hawhta ama reih.

Siaha meikapa (photo Courtesy: Maraland Rose via Facebook)

 He meikapa Siaha Subjee Bazar la zuna, chachah la, N.Colony Area cha ta, o hluh viapa he Tho-o (Assam Type) sai a cha. Chavata meihlih vaw pua ta o a vaw ka pathao nata meipaleih thata a vaw duah ha ba ta, pachhai thei rima awpa cha khao vei. Chanota, lalai (main-road) tawhta a hla kawpa a chapa vata Fire Department zy ta thlai pachhai thai awpa cha hra leipa ta, chavata chyhsa veiseihpazy ta meikapa chichhihpa hry liata hmodahzy ama theina rakha ta palykhei ei ta, thokha ta ka via awpa tawhta vaih hra ei ta, chatanachata zacho 12:00 pa rakha tawhta cha mei a vaw diah via haw.

Siaha Khihpi meikapa2 (photo courtery: Sufflegie Nif-t via facebook)

He okana chhapa he maraland.net liata cha CTS School Canteen (Thopi Daoh) tawhta a vaw thaopa chapa hawhta reih ei ta, chahrasala khiliah tiloh liata cha Tlaikaopa pakha (a moh pahno thei mah ma pi) ta a rao raruahpa hawhta reina a y. He Tlaikaopa he sahma khoh kawpa, a lahpino nata achhaih hapa cha ta, sahma a pari nata thata paphoh tyh ta. "Chyhsa nahzy he ei hie ei na pahah kaw khiatala, ei rao khai thlahha aw ei," tahpa ta reih tyh ta, zahnia za cha a rizai (blanket) cha mei ta rao ha tlai ta, ano cha College Vaih la a rasai  ha ta, cha cha MTP zy ta ama pahno nata a kei chadai ei ta, atahma patu ei ta, Siaha Police Station Lock-up liata ama soh thlah ha, tahpa ta reina chhao a y hra. Anodeikuala, he thatih he adopa a cha nata chaleipa pahno thei mah ma pi.

Siaha okapa (photo courtesy: Suffleqie Nif-t)

Atahma chhiena raroh y ngaitapa atlopa tawhna heta pachana eima hnei awpa a peimawh kaw. A sakhana liata cha, mei he chichhih ngaitapa cha ta, a vaw ka ha nata cha pachhai theipa cha vei. Chavata, Electric, beihchhona mei, mei-aihpa chi nata bati zy tawhta khatinorai ta eima vaih tyh awpa a cha.

A sanona liata cha, Siaha khihpi he chito photo apahlaopa ta ypakhypa cha pi ta, eima khihtlah he a chhahchhie ngaita kaw. Buana ataopa nata atlokheipa he chi hropa tawhta vaw y via tyh ta, ataotuhpa cha keimo "Marasaw" pyly eima cha heih tyh. He thatih liata Tlaikaopaw chhao cha thei ta, a chalei thei aw. Anodeikuala, reina liata pangiasapa (Suspect) a chana tawhna heta asohsi awpa eima hnei. Eima rah liata vaw y awpazy, eima o vaw tloh awpazy he ama thatih eima chu pasia via awpa nata eima pahno pasia via awpa byuh ta. Khodah liata cha, Siaha khihpi liata vaw y awpazy rai rai cha, MTP Hqrs liata tlyma, Branch liata tlyma, pasaina la tuapa cha thei tyh sala, a pha kaw aw. Eima chata byhna a cha thei awpazy, khichhai phapa cha thei awpazy he cha eima dytha awpa cha leipa ta; anodeikuala rairuna maniah tlokhei awpazy tawhta deikua eima sohsi awpa a peimawh kaw.

Achhana liata cha, Siaha liana he Fire Service Department he a mohta ta y hra ei ta, Motor sano (2) cha hnei hra ei ta, sakha he hmatlah a cha via tyh. Sakha sano ngalah heta cha Khihpi chata a daih lei kaw. Biehneituhpazy hnohta tlokhei ta, eima chata avaihna eima pacha via awpa a peimawh ngaita kaw. Keimo ta eima pacha vei khiala, mohropazy ta maniah pacha tloh leipa aw ei ta.

Related Source: maraland.net