Mizoram Chief Minister ta Siaha la kaw tlyh

Mizoram Chief Minister Puhpa Lal Thanhawla cha zahnia khata Siaha tlo ta, atamy Siaha Bazar Traffic Point liata Public Meeting hneina liata biereina a hnei. CM ta, "Zoram chyhsa sai cha pi ta, sawkha liata tovyuh alyu khaipa eima hnei," a tah. 

CM heta Mawrah liata amo ta sawkhana ama siekhei tawhta hmahsiena atlopazy reina hnei ta, MADC ta atlyna a hnei awpa liata khotalaihna ama hneipa cha ngiapatuhpa sai eima chapa hawhta, pachana paloh pasoh kawpa hmah awpa ta pasyu ta. Politics he achaleina tlyma, apachhiparyna tlyma, cha leipa ta; Khazohpa ta chakaona awpa chhaichhi a sopa tlao a cha, a tah. A kheihhawpa rai chhao hria ei sihla, Khazohpa ta chakao awpa maniah a sopa a cha tahpa a thei thlahhapa ta, ngiapatuhpa eima chana hawhna ngachhihnazy, adonazy, sianazy nata pathaihnazy chhao ta hria awpa eima cha, tah ta. Chavata, eima hmotaopa rai rai he Khazohpa achapa lachhah aheihpa Programme a cha awpa a cha, a tah.

Mizo zy hry liata rietheipa nata hneirohpa likawh apahlietu hapa taopathi nawpa ta, ano sawhkha ta rietheipazy pachha papua nawpa ta NLUP hmapa ta thatlo kawpa ta hmah la lyma ta, ano daihti hmiatuapa liata NLUP hmapa ta aduahpapuana chata ahmahpa zyzie ama tahpa palasapa ta, atahma chhao he cha hawhta hlaotlohna a daopazy hry liata tiamanazy, ngachhihnazy, adonazy liata tlao apahnie via. Sawkha lata pachana liata cha hlaotloh hapa hawhta pacha theipa cha ta, soh he adao awpazy cha leipa, mohropazy ta ama uahva awpa pathaih leipa ta, ko 5 chhoh ta chhohkha thyhrawhhleino (1.2 lakh) hnohta niebaw tluana ipa ama patohpatia nawpa ta pie chyu awpa a chhuah ta, soh chhao he chana heta adaih khai awpa a cha, a tah.

Thyutliazy chata sawkhata khizaw thiehpa tao awpa a chhuah nga kaw na, tahpa ta reih ta; khitlah chhihthatuh phapa eima taopapua awpa angiahna pahno chyu pi ta. Sports lachhah ama phana rakha ta hmahla nga kawpa a cha hra. Achuna la chhao export quality taopapua awpa ta NIT nata IIMC zy hnei haw pi ta. He hleikho ta achuna sah viapa lachhah lathlah maniah pahmotuh awpa ta Youth Commission paduapa cha haw ta, pheisaih angiana naosia via nawpa ta Sainik School chhao Chhingchhip liata patohpatia khai daihmapa a cha haw hra, a tah.

Hmahsiena thaby peimawh kawpa, power hluh viapa eima hnei thei nawpa ta eima chavah tizy he power taopapua nawpa ta toh khai awpa a chhuahpa a cha, a tah. Apualeipa ta soh hmo awpa khohtuna vata siesai hapa, Tuirial Hydel Project kha a hlao vaw tloh haw sala, khaihna liata eima rairu hlei aw vei, sasyh eima tivy thlahha awpa tlai, tah ta. Atahma cha rai cha hria pazao heipa cha ha heih ta, ko 2014 liata commission thei awpa ta hnabeiseihpa a cha, a tah.

Mizoram liata nieparuna pahleipadia nawpa kyh liata a tharizy cha phiapa ta y nga kaw ta, pachawhpa deikua cha mah veih ei. He hawhta pamuana kyh liata Zoram leilosawzy ta maoh eima phaoh khai, a tah. Ativyna chochah liata CM ta thla no chhoh a daihpa chhao hriapapua leipa pi ta, he heta tiamana kyh liata maniah pachutuhpa cha sala, kho a chhih kaw aw, a tah. 

CM heta ADC zy he ama sawkhana daihti lia maih ta biehnei sah viapa pie tyhpa cha ta, Direct Funding ama hiana liata chhao ano sawkha ta abaona vata Central liata Recommendation pangiapa chhao Central sawkha ta a vaw pyhkhei haw, a tah. Siaha Civil Hospital cha District Hospital hry liata pha chai awpa ta tao awpa ama chhuah, tahpa ta CM ta reih ta. Nursing School chhao so achhuahpa a cha, soh chhao a y khai haw na, a tah hra.

Chief Minister khitlyna he a lahpino Pihno Lal Riliani hleikho ta, Cabinet Minister pa 5, Parliament Secretary  nata MLA 8 ta ama pazi. Myla khi Lytai liata a rie aw ei ta, Public Meeting a hnei khei heih aw.

Source: DIPR

(Daihti reipa Exam-na vata vaw update thei khao leipa na ta, Maraland Post a pasotuhpazy hnohta pachhathaina eima cha haw. Atahma tawhta thlai vaw update lyma awpa ei vaw chhuah heih aw. He news he Source palasapa rodah sikhua ta palasapa a cha. A chahta cha original Statement zy a peimawh kaw tyhpa vata peimawh daihti cha ta a zydua ta paliepa ta tlao ei vaw soh. Editor)