Abeipa Baona nata Chhihthana vata B.D. Achuna ei patlo haw hra

Ei lyna dah he reih thei va na..!!! Abeipa phazie he alyna bie reih leipa ta y thei va na! A chhihthana zawhzi ta, ko 4 chhoh ta Bachelor of Divinity, John Roberts Theological Seminary, Shillong liata achuna cha ei vaw patlo thei haw hra. Ei ly hmeiseih. Abeipa hnohta ei ly hmeiseih! Zahnia Dt. 18^th. April 2012 khata Valedictory Service hmah pi ta, ei chhohkhazy ta he Valedictory Service liata na vaw hlaokhei thei hra vei ei sala, Abeipa ryhraotuhpa chata he liata chhohkha nata viasa phapazy na pie ta, Rev. Dr. Laiu Fachhai nata Pihno Debbie Fachhai, Mc Henry Vabeibyhnasa Chhachhai nata Chktp. N.C. Alicia zy tan a kaw hmakhei ei ta, ei lyna aki hmeiseih. He Valedictory liana heta achupa 42 hnohta Graduation Certificate hlapa a cha.

Achyhta achuna ei vaw thaona dah vaw kua via tua sala; Ko 2005 June thla tawhna khata Abeipa chakaona raihria hra awpa ta Tripuara Mission Field tlo na ta. He Mission Field liata ei ngia pataw nata keima liata ei chiehleizie thata a pahno na ta, thlahchha na ta, Abeipa hnohta Theology ei chu theina awpa hiah na ta. Chahrasala Abeipa ryhraona dah he a vaw nano ngasa. Ei ko nata thlazy pachapa ta uhtheina lata ei vaw pangai hapa vata Abeipa hnohta lahpino pha kawpa, chakaona liata na bao thei awpa hiah heih na ta. Abeipa chata la a kheihhawhpa he ma pie awpa cha aw, tahpa noraih achhih kaw nata ei pangiasa. Chahrasala, Abeipa ato ryhraotuhpa chata a sawnahzy thlahchhana dytha leipa ta, ryhpaohna tlao maniah a vaw pachakhei tyh. Cha zydua cha atanoh liata ei vaw pahnopasia.

 Chatanachata lahpino pha kawpa, Ano chakaona liata raihria ngahaipa, hlao hneipa na pie ta, Theological Study ei sie thei nawpa ta thlah ei chhana chhao Abeipa ta my vei. Cha hawhna chata ko May 7, 2008 liata lahpino hnei na ta. He daihti liata a nano ei tah kawpa la, ei viasano (Partei) chhao ta Theology achu awpa ta ei na vaw khokhei kaw. Keima ei khona hawh tlai ta, ano chhao na deichhy ta bao awpa ama kaw ta. Eima hnei pataw nata Admission chhao eima tlua pathao lymapa a cha.

Achuna su hropa lata Admission tao daihti cha tla khao leipa ta, JRTS ngalah hnabeiseihna a y. Ei viasano ta, “Rev. Laiu chhao a hriapa tan a ei pahno. Ano he eima contact thei khiatala, maniah a patohpatiakhei thei nata ei pangiasa,” tahpa ta reih ta. He daihti liana heta Dr. Laiu Fachhai he ei kha hmah a hmia hmo mah va na. Vahneichhih kawpa ta North East Harvest Ministry ta North East Awnanopa zydua hruapa ta Seminary pachhuahpanoh ei ta, cha liana chata Tripura tawhta ahlao awpa ta kei na tlyh hra ei ta, ei viasano chhao eima Awnanopa (ECM) tawhta atlyhpa a cha hra. Shillong liata atyh heih pi ta, Rev. Laiu chhao eima hmo thei haw hra. Ano baona nata pahnai maniah angiahkheina zawhzi ta mohropazy Written Test nata Interview ama hnei khai kho lata chhao daihti na vaw pahypa ei ta, chatanachata October 14, 2008 tawhta he achuna he ei vaw pathao haw.

Ko 2008-2009 taihta keimo soh ta achu na ta, ko 2009 tawhta deikua eima ECM Assembly zy khokheina to hrapa ta Awnanopa Sponsored-pa ta atanoh taihta ei vaw chu thei haw hra. Awnanopa nopawzy ta thata na deichhy ei ta, ama khokheina thata ei to hmeiseih. Chavata amo chola liata alyna bie ei reih hmeiseih. Cha hleikho ta, Khopai Awnanopazy na deichhy hmeiseih ei ta. Amo pahnokheipa ta Mission chakaona raihria na ta, cha nota Theology achu awpa ei reipa cha ama hnachabu a tla hmeiseih. Anodeikuala, kei ta achuna abyuhzie ei reih hapa vata nata khacha ei chhuah hapa vata na pahnokhei thai ei ta, ei chuna liata chhao na baokha chaituhpa tlao ama vaw cha heih. Keima chata mydi thlahchhana maih ta thlah na chhakhei lyma ei ta. Cha dei cha vei, ama thlahchhana liata maih ta tlao ei na baokha lyma ei. Abyuhna ngiahna hawhta soh liata chhao na bao hra ei ta, keima chata la thlaloh achhih hmeiseih.

He zydua hlata keima chata chyhsa peimawh chaipa cha ei lahpino ta ei na deichhyna he a cha. Achuna lathloh ko 4 chhohta thlahchhana nata deichhyna hleikho ta, soh liata ei ngiahna zydua na pachakheituh chaipa cha ta. Keima vata chysia phapa chhao atao theileipa ta, nie pahahpa chhao nie thei vei. Chhohkha lata peimawhpa hlata keima peimawhpa he a hmiatua chai ta apachapa a cha lyma tyh. Ano baona tluta asohpa kei chata y vei. Cha hleikho ta, hatipa pano tlai achuna liata ei y chhohta vaw hnei hma pi ta, Abeipa tawhta byhna eima to ngasa. He hatinahzy mohhohna kyh liata kei cha bao theileipa ei na ta, ama hnohta chhao pahra hma hra va na. Ei lahpino hleikho ta, a nawhta nata chhohkhazy ta vaw buakhei khai ei ta, ama cho liata alynabie reitiah lei rei awpa ei hnei.

He ei vaw reina tawhna achuna liata rairuna nano nanopa a y awpa cha eima sadu thai nata ei hnabei a seih. Rei tiahpa cha leipa ta, pacha na ta, a nano tlao ei tah. Abeipa ngachhihna nata phana he, ano liata apahniehtuhpazy chata la ato he a theileipa vaw y vei, tahpa he achuna lathloh tawhna heta athiehpa ta ei pahnopasia heih.

(Daihti ryhpaohpa liata Rev. Dr. Laiu ta keima chata pasyuna bie a reipa vaw soh awpa ei vaw chhuah aw.)

By A.Zawngia

Puhpa A.Zawngia nata Chktp. N.C. Alicia

  

Puhpa A.Zawngia nata Mc. Henry Vabeibyhnasa Chhachhai

L-R: NC Alicia, Thanga, Mawia, Zawngia, Mrs.Debbie, Dr. Laiu

All Graduates with Faculty and Official Members