Sermon: Tlahna nata Patlahtuhpa cha Khazohpa a cha (Jehovah Rophi)

(He sermon he Dt. 17th March 2013 Pahanoh my, Siaha Civil Hospital liata chakaona chata patoh patiapa a cha)

By A. Zawngia

Tlahna nata Patlahna - Biehrai Parohpa liata

Eima Biehrai pakhata ta eima moh khiata cha Tlahna tlyma, Patlahna tlyma chakaona he Biehrai Parohpa nata Biehrai Thiehpa liata eima hmo raih-rie. Puasaina 15: 26 eima moh khiata cha, Patlahtuhpa cha Khazohpa a chanazie a sia kawpa ta eima hmo. He Biehrai tawhna heta Abeipa chata ano apalysa leituhpa, ano khopa a tao leipa nata a biepiepazy a zyh khoh leipa cho liata hriena (tlahleina) a patlosa tyh, tahpa eima hmo. Izi seichana liata Izarei sawzy ama y daihti liata Abeipa ta Izarei sawzy cha papua awpa ta Phirao hnohta bie pie ta, chahrasala Phirao ta zyh khoh vei. Chavata hriena hluhpi Izi sawzy cho liata a patlosa tlai. He vata Izarei sawzy hnohta chhao Abeipa biepiepazy cha ama zyh khiata la, hriena ama cho liata patlosa lepa aw ta, ama tlahleinazy cha tlao a patlah aw, tahpa ta a reih. 

He vana heta Izarei sawzy pachadah liata tlahleina he Abeipa hriena nata chhoreina hawhta pachana amo liata kha a y. Hri thokha - phawhpazy, mochaopazy, sypazy, cha ama pachana liata Abeipa hriena - amo moleina vata tlyma, ama pathlatuhpazy moleina vata tlyma, vata a vaw tlopa hawhta pachana a lai kaw. He hawhta tlahleina zydua Abeipa hriena hawhta pachana khacha a ypa he a doleizie Bei Zisu ta a sia kawpa ta Zawhana 9:3 liata eima hmo. Zisu ta mochaopa a patlah daihti liata "He chyhsa heta moleina tao hra vei, a no nata paw ta moleina tao hra veih ei. Khazohpa raihria acho liata alana awpa tlao a cha," tahpa ta tlao a vaw reihpasia. Bei Zisu biereipa tawhna heta Tlahleina zydua he hmoparaona vata hriena cha khai vei tahpa sia kawpa ta eima pahno thei. Chavata tlahleina cha vaduana vata zy, hri-iah phaleipa a chareipa vata zy, nata kao nanopa tawhta a vaw tlo thei, tahpa pahno ei sihla, moleina vata nata hmoparaona vata tlahleipa cha leipa pi ta, Abeipa hriena vata cha khai hlei vei. Anodeikuala, Abeipa hriena nata ano lata eima heih thei nawpa ta chhao a vaw tlo thei hra, tahpa sia kawpa ta a thiehpa ta athei ei sihla.

Tlahna nata Patlahna - Biehrai Thiepa liata

Biehrai Thiehpa eima reih khiata cha, Bei Zisu khata khizaw liata chakaona rai a vaw thao pataw nata tlah-leipazy patlahna rai kha rai peimawh chaipa a cha. A siena liata tlah-leipa atyhpa maih - asypazy, mochaopazy, ahripa ta apatupazy, thi alohpazy, nata tlahleipa nano nanopazy patlah lyma ta, a hnohta chhao tlahna hnabeiseihpa ta tlahleipa hluhpi ama vaw ngai khei, tahpa eima hmo. Chavata Bei Zisu kha khizaw chyhsa ta a pahno pathaona liata cha "Patlahtuhpa" hawhta a cha. Chakaona khacha rakha tlyma a hnei tawhta a pachupazy hnohta 'ahyma a cha' hiahhri ta, Pity ta, "Khazohpa Mesia na cha" tahpa ta achhy (Luka 9:20). Cha cha achhyna dopa a cha. Bei Zisu kha Abeipa Khazohpa a chana palasa awpa nata chyhsazy ta ama pahno thei nawpa ta Patlahna chakao rai a vaw hria, tahna a cha. Chavata Zisu cha Khazohpa, tlahna nata Patlahtuhpa a cha, tahpa sia kawpa ta eima pahno thei. 

Anodeikuala, Zisu khata tlahleipazy a patlah daihti liata, "Khazohpa ta a cha patlah" tla tah leipa ta, "Na ngiapana na tlahkhei" tahpa ta tlao a tah tyh. Bei Zisu hmotaona dah he a nano kaw. Ei khapi ta "Kei he Khazohpa cha na ta, Patlahtuhpa ei cha" tahpa ta reih khoh vei. Anodeikuala, ama ngiapana la tawhta Abeipa Khazohpa a chana pahno ei sala, ngiapana ta ano cha pahno pasia awpa ta tlao a khoh. He tawhna heta Biehrai Parohpa nata Biehrai Thiehpa liata Tlahna nata Patlahtuhpa cha mohropa cha leipa ta, Abeipa, Khazohpa he a cha. 

Keimo cho liata Tlah-leina vaw tlo tyhpa he

Rei hapa hawhta tlah-leinazy, pasanazy he Abeipa hriena cha khai leipa ta, khizaw ta a chakaihpa tlao a cha. Ahyrai ta tlah-lei theipa, pasa theipa tlao cha pi ta; chavata vaduana vata tlyma, hriiah nata kahhrao hriabaoh chareina vata chhao tlah-leina eima cho liata a vaw tlo thei. Dawty zy, Nurse zy, molaipa nata mochyhpa, ahyrai, he khizaw liata eima y chhoh ta tlah-lei theipa sai eima cha. Cha hawhta pasanazy, tlah-leinazy, eima cho liata a vaw tlo nahta eima nopo ta, eima pacharoh ta, tlahna khoh pi ta, Abeipa awsao pi ta, maniah bao awpa nata mohhoh awpa ta Dawty, Nurse zy, thohna-o su zy, eima ngai tyh. Chahrasala, dawhty zy, nurse zy he maniah mohhohtuhpa dei cha ei ta, tlahna maniah pietuhpa deikua cha Abeipa a cha. Thokhazy ta cha he hawhta tlahleina ama cho liata a vaw tlo nahta, amo a taopathina chata hmah ei ta, hmiala ta Abeipa a pacha beih leipazy ta Abeipa sonazie athiehpa ta pahno ei ta. Khahla ta Abeipa biepiepa papeisa leipa ta ama y tyhnazy pacha ei ta, a ngiapachhi ei ta, Abeipa chakao awpa ta nata a biepiepazy zyh awpa ta a hla ei ta, cha hawhna chata amo a taopathi hapa hluhpi ama y.  He hawhpazy chata cha Tlah-leina cha amo chata Testimony rohnah kawpa cha ta, hrochhoh khizaw lata hnohkua khao lei awpa ta Abeipa chata ahlana daihti tlao a cha tyh.

Thokha deikua he hawhta pachana a hnei leipa hluhpi eima y aw. Abeipa ta hriena la cha ngyu aw vei; anodeikuala, he eima tlah-leina tawhna heta Abeipa cha tlahna nata Patlahtuhpa a chana, ngiapana ta pahno pasia awpa maniah a khoh, tahpa a thei ei suh u. Hmiala daihti liata Abeipa chakaona chah pahno leipa, a pacha beih leipa nata ano a vaw dyuhtuhpazy eima cha ngyu thei aw; cha hawhpa eima chapa chhao ta atanoh tawhna heta ngiapana ta "Abeipa cha na patlahtuhpa a cha" tahpa athiehpa ta pahno ta, ano chakao awpa ta ahla tua ei suh u. Cha cha eima tlahna a cha cheingei nata ei hnabei khacha a seih.

Kolkata liata Cancer pasana ama mohhohna tyhpa Thohna-o, Mizoram la tawhta thata ama pangai tyhpa su liata Super Specialist Dawhty ochhi sakha liata cha a tawhpa cha, "Kei he cha patlahtuhpa cha leipa na ta, Patlahtuhpa cha Khazohpa tlao a cha," tahpa ta a roh. Cha charopa chata thata ei na pahnie. Chyhsa hluhpi heta Khazohpa he Patlahtuhpa a chana pahno leipa ta, Dawhty zy he maniah patlahtuhpa a cha tahpa ta tlao eima pacha tlamaw aw, tahpa chi a chhih kaw. Dawhty zy he cha maniah a mohhohtuhpa tlao ama cha.

Bie Syhpahmaohna

Atahma eima reipa tawhta Abeipa cha Tlahna nata Patlahtuhpa a cha, tahpa eima sia thei nahta, ei hnabei a seih. Ahyrai he khizaw liata eima chah chhoh ta tlahlei theipa, pasa theipa sai eima cha. Cha pasana nata hriiahzy cha Abeipa chhoreina nata hriena chhao a cha thei;  anodeikuala, pasana nata tlahleina zydua he Abeipa hriena nata chhiesana cha khai hlei vei. Vaduana nata hriiah chareina vata a vaw tlo thei. A kheihhawhpa rai cha sala, eima tlah-leinazy patlahtuhpa he Abeipa deita a cha. Eima tlah-leina tawhna heta eima hmotao pha leipazy, hro pha leipazy, ataopathina chata hmah ei suh u. Abeipa apacha beih leipazy ta Abeipa eima pachana cha sala, chakaona a pacha beih leipazy ta Abeipa chakaona eima thaona tlao vaw cha sala, tahpa kho a chhih kaw.Cha hawhta a vaw cha thei khiatala, atanoh ta eima tlah-leinazy, pasanazy he keimo chata chhazaw hrona lathloh liata maniah chhihthatuhpa cha aw ta, Abeipa byhna eima tona tlao a vaw cha cheingei aw. Chanota he hawhta eima pasa daihti liata chhao ta Abeipa vana -Abeipa baona nata patlahna eima ngiah tahpa pachana eima hnei vei khiatala, pachachhie eima chhih kaw aw.

Abeipa ta a Bie Pathaihpa eima reipazy, eima theina rakha ta eima reipakawhnazy cha eima zydua chata tlahna nata ngiapana liata thatlona a vaw cha thei nawpa ta byhna maniah pie mawh sy, Amen.