Harhna by Lalhmangaihpari

(He sermon hi kan Nu Sermon, Dt. 14th April 2013 Pathianni zan inkhawm, New Saiha ECM Biakina puanchhuah kha a ni e. By Editor)

A hmasain, Zanin hun tha tak min petu kan Pathian chungah leh Kohhran hote chungah lawmthu ka sawi a. Hei kan hriat theuh angin kan Kohhranah Camping chhawng thum, naupang Camp nen, chhawng li lai mai kan nei zo hlim a ni a. Pathian khawngaihna avangin mi tam tak ten Pathianah harhna an chang a, Kohhrante kan hlimin kan lawm em em a ni. Hetiang thil ropui tak min tih saktu Kan Pathian hming chu fakin awm rawh se Amen!

*Bible text:  Rom 13: 11-14;  Sam 85.

Kan Kohhran Assembly kumpuan kha ‘Harhna’ tih a ni a, zaninah pawh hian ‘Harhna’ tih thupui hmangin Pathian thu kan ngaihtuah ho leh dawn a ni. Zanin hi Ramthim pual zan a nih angin, Chanchintha hrilna kawnga harhna hi kan thu uar ber tur a ni ang. 

1. Harhna awmzia: Harhna kan han tih hian sawifiah vak ngai lovin a awmzia chu a chiang thawkhat nghal viauin a lang a ni. Engpawh nise, harhna tih hian a huam zau hle a, kawng hnihah han then phawk ta ila: Tisa lama harhna leh Thlarau lama harhna tiin.

1) Tisa lama harhna : Tisa thilah pawh harhna chi hrang hrang a thleng thin a, ‘harhna tha lo’ leh ‘harhna tha’ te pawh a awm leh zel bawk. 

Harhna thalo chu thilsual tihna kawnga harh tlat te, thil hnawksak leh thil hlauhawm hmuhchhuah leh hmanchhuah te hi ram tan leh mipuite tan a him lova, a hlauhawm hle a, chutiang thil reng reng chu ‘harhna thalo’ kan ti thei ang. 

Harhna tha chu Ram leh mipui te tana tangkai tur leh hlawk tur, thil thar chi hrang hrang duanchhuah te, chinchhuahna te,  hmuhchhuahna te, mite hnena ti tura inkawhhmuhna leh inhrilhhriatna te hi ‘harhna tha’  chu a ni.

 Sorkar te, Scientist te, leh mi thiam tak tak ten thil thar hmuhchhuah leh duanchhuahna kawngah harhna an chang chho zel a, ram tan leh mipuite tana tangkai tur thil thar tha tak tak an duangchhuak a, an hmuchhhuak reng bawk a, Heng an thil hmuhchuah zawng zawng te hi ram tan an tangkaiin, kawng tinrengah awlsamna nasa takin min thlen a ni. Entir nan, Motor leh khawl chi hrang hrang te hi an hmuchhuak a, an tangkai em em a, amaherawh chu hman tangkai chi a ni tih hriatnaah harh lo ta ila, kan hnufual hle ang. 

Thlai thar hlawk dan te leh incheinaah te pawh, la ‘harh lo’ ni ta ila,  ei leh inah te, incheinaah te, leh kawng hrang hranga kan khawsak dan zawng zawng te hi a la mawlmang hrih ngawt ang chu. Tin, Zirna leh thiamna lamah te pawh la harh lo ni ta ila, nu leh pate hian fate lehkha zirtir nachang an hre lovang. Amaherawhchu a pawimawh a ni tih hria a, an lo harh tlat avangin neih zawng zawng pawh seng hreh lovin fate chu lehkha an zirtir hram hram zel, chuvang chuan tunlaiah mifing leh lehkhathiam sang pui pui an awm teuh phah a ni. Chuti ni lose, tunlai tawng takin ‘thing’ kan tih zawng zawng te angin kan la khawsa ngei ang le. Nimahsela ‘harhna tha’ avangin tunah chuan kawng hrang hrangah kan lo changkang ve em em tawh a ni. 

2) Thlarau lama harhna: Thlarau lama harhna chu Mimal leh Kohhran in Thlarau Thianghlim hnathawh kan dawn leh kan chan hi a ni a, Tawngtaina, Pathian Thu, leh hla hmanga Thlarau thianghlim pawlna atanga hlimna leh lawmna kan chan leh kan dawn thin hi a kawk deuh ber. Mimal pawhin Thlarau thilpek chi hrang hrang hmangin harhna an chang bawk thin. Thlarau lama Harhna sawifiah nan ‘Pathian hnahawh lo thleng’ tih te, ‘Pathianin a mite a kanna’ tih te, ‘Thlarau thianghlim leih’ tih te, ‘Thlarau thianghlim thleng’ tih te pawhin an sawi mai thin a ni. Thlarau lama harhnaah pawh hian ‘harhna dik’ leh ‘harhna diklo’ a awm leh zel thei a ni. 

Harhna dik chu sawi tawh ang khan miten Pathian Thlarau thianghlim pawlna atanga hlimna leh lawmna an lo chanin, Pathian leh a Kohhran tan, mi tangkai nihna kawngah ke an pen hram hram a, midangte hmangaihna nun an nei a, rinawmna, dikna, taihmakna, leh Pathian tihna ‘an nunah’ a awm a, Krista anna kawngah an kal hram hram thin a ni. Chutiang chu a nih avangin harhna hi ringtu nunah a pawimawh em em a ni. 

Harhna diklo chu mi thenkhatin harhna an lo chanin an Pathian thu lak dan te a dik loh avangin, Thurin atanga kalpen nan te, kalsual nan te an hman phah thin. Hlim lamnaah te pawh a uchuakin emaw, a khurbing zawngin emaw, hmangaihna ram an tihah te an kal phah fo thin a. Midangte tlinlohna te pawh an hmu thei hle thin. Chutiang chi chu harhna dik kan ti theilo a ni. Ringtu nunah harhna diklo chan a hlauhawm takzet a ni.

2. Harhna thleng te :  Harhna hi khawvel hmun hrang hrangah a thleng tawh thin a, kan hriat lar deuh nia lang chu kum 1725-1776 ah khan America ramah harhna ropui (Great Awakening) a thleng a (he harhna hian America ram pum a dengchhuak a, England, Scotland, Ireland ramte a hrut chhuak a ni). Tin, Kum zabi 18-19 velah New England rama harhna thleng te, 1904 a Wales rama harhna thleng te kha an ni a. Heng rama harhna thleng te hian khawvel ram hrang hrang a fang chhuak a, Missionary nasa tak an chhuah phah a. Chutianga Khawvela harhna thleng hrang hrang te chu kan sawi kim vek seng lovang.

 Mizorama pawh harhna a thleng fo tawh thin. Harhna thleng hmasa ber chu 1906 ah a ni a, tin, 1913, 1918-21, 1930-33 ah te harhna a thleng leh a. Heng harhna thlengte avang hian, hun rei vak lovah Mizoram pum chu Kristian ram tih theih a lo ni ta a ni. Kum 1906 atanga tun inkarah Mizoramah harhna vawi tam tak a thleng fo tawh a ni. 

Mara ramah ngei pawh harhna a thleng fo thin. Mara rama harhna thleng tawh te chungchang pawh zaninah hian a chipchiarin kan chhui hman kher lovang.  Amaherawh chu a tlangpui han sawi zawr zawr ta ila: 

Mara rama harhna thleng hmasa ber chu 1934 ah Saihaah Kristmas laiin a thleng a, hlim lamna a thleng nasa hle. Chumi hnuah 1950 ah Serkawrah Upa Hranglala rawngbawlna atangin a thleng leh a, he harhna hian Mara khua a fanchhuak deuh thaw a ni. Tin, harhna thlen vawi thumna chu 1966 ah Tuisumpui khuaah ‘Ramthima chanchintha hril’ tih thupui hmangin harhna a thleng. Harhna thlen vawi lina atan 1970 ah Ramthim bawm fan hmangin harhna a thleng leh a, hei hian khawtin a nghawr nghing a ni. Chung lo pawh Thuhriltu, Crusade, Camping etc. kaltlangin vawi tam tak kan ramah hian harhna a thleng thin a. Heng khurhna, back, khawihthluk, tlan, leh thilpek chi hrang hrang hmangin harhna a thleng fo thin. Tunah pawh hei Camping chhawng 3 lai kan nei zo hlim a ni a, mi tam takin ‘siamthar lehna’ changin, kan hlimin kan lawm a, Pathian thlarau thianghlimah harhna kan chang tih loh rual a ni lo.

Awle, Harhna hi ringtu nunah a pawimawh hle. Harhna a thlen loh chuan Mimal, Kohhran, leh Ram hian Pathian a hlat a, Kohhran nun a rova, mimal thlarau lam nun pawh a rova, insawiselna te a tam a, Biak In pan peih pawh kan tlem em em a, suahsualna chi hrang hrang a lo pung thin a ni. Nimahsela, harhna a lo thlen chuan Pathian thlarau thianghlim hnathawh a lo lang a, misual te leh mi rilru sak tak tak te pawh Pathianah an inlamlet a, an piangthar a, tlu tawhte an lo tho leh a, hnungtawlh tawhte pawh an lo kir leh a, Biak In ruak deuh huai thin chu Biak In khat tlatin kan lo inkhawm leh thei thin a ni. A ropui a, Pathian thlarau thianghlim hnathawh a lang tih loh rual a ni lo. 

Bibleah pawh kan hmu. Pentecost niah khan nasa takin thlarau thianghlima harhna a lo thleng a, tawnghriatlohte an hmang a, huaisen takin Chanchintha an puang a, mi 3,000 lai maiin Baptistma an chang nghal a ni. Kornelia inah pawh awmkhawmho zingah harhna athleng a, an zavaiin Baptisma an chang tih kan hmu.Tin, mimal nunah pawh harhna thleng tih kan hmu nual bawk a, entir nan- Mi tilreh hnenah te, Saula/Paula hnenah te pawh a thleng a, Paula phei hi chu chanchintha hriltu, Missionary ropui tak a lo ni ta nghe nghe a nih kha. 

Thlarau lam nuna harhna hi ringtute tan a pawimawh em em a, kan nitin nunah kan rinna tichaktu atan te, a rawngbawlna kawnga min tichaktu atan te a pawimawh em avangin kan nun hi muthlu mai lovin, harh reng thei se tih chu kan duh vek ngei ang. 

3. A nih chuan Kohhrante leh mimal tinte hian Harhna hi chan reng kan duh em? Engtinnge harhna hi kan neih reng theih ang?  Pathian tanpuinain kan tum phawt chuan kan harh reng thei a ni. Kan harh reng theihna tur kawng tam tak pawh sawi tur a awm ngei ang. Amaherawh chu kawng thum chauh sawi ta ila:

1) Thil tha tihna kawnga taihmak harhna :  Mi thatchhe tak, hlawhtling sawi tur kan hre tlem hle ang tiru? Lal Isua chhandamna chang tawhtu kan nih chuan thil tha tihna kawngah kan taima tur a ni. Bible pawhin rim taka thawk a, ei turin min ti a, thawk lo chuan ei pawh ei suh se a ti mai a ni. Chuvang chuan hnathawk mi kan ni emaw, zirlai kan ni emaw, eng ti mi pawh ni ila, thil tha kan tihna apiangah chuan taima takin kan ti thin tur a ni. Bible chhiar leh tawngtai pawh kan taima tur a ni. Chung chu kan Pathian duhdan leh a lawmzawng a ni, malsawm dawnna pawh a ni bawk. Chutianga taihmakna nun kan neih phawt chuan kan nun hi a zawi mai mai lovang a, kan thlarau lam nun thlengin kan harh zel thei ang.

2) Krista anna kawnga harhna:  Isua Krista ringlotu te zingah mi rinawm leh mi dik tak tak an tam mai. Vaiho kan tihte hi an rinawmin an dik phian thin. Keini ho phei chu Lal Isua ringtu leh zuitu, mi Piangthar kan nih tawh avangin kawng tinrengah Krista anna nun kan nei tur a ni a, Krista duhdan anga  kan nun leh kan hunte hi hman kan tum zel tur a ni. Mi hmuh lovah thil diklo leh thil sual kan ti emaw kan tih lai hian Pathianin min hmu reng a ni tih hria a, Pathian tihna nun kan neih tlat a pawimawh hle a ni.

 Kan Bible chang chhiarah khan “tunlai thil awmzia in hriat avangin muhil thawhharh a hun tawh tak zet tih in hriat avangin chu chu ka sawi a ni; tunah chuan kan rin tirh lai ai khan kan chhandamna chu a hnai ta zawk si a. Zan hi a ral lek lek tawh a, khua a var dawn ta e; chuvangin thima thiltih chu paih ila, eng thuamin i inthuam ang u. Chhuna awm angin mawi takin I awm ang u, zu in buai leh zu ruia awm lovin, hur leh inngaih hmanga awm lovin, insual leh initsika awm lovin. Lal Isua Krista chuan inthuam zawk ulang, in tisa chakna puitlin turin engmah insiam suh u” a ti. He kan chang thlan hi Lal Isua lo kal lehna hnaih thu leh chumi atan chuan inring renga awm tura min hrilhna a ni. 

Lal Isua Krista hi a lo kal lek lek tawh a, inring renga kan awm a tul, kan nundan thalo te sim a, kan tih thin thalo te kalsan a, Krista duhdan anga nung a, Kristaa inthuam turin min ti a ni. Misual tak kan tihte pawh hian chhun engah, mi hmuh laiin ngampa takin thilsual an ti ngam ngailo ang hian, Chhuna awm anga mawi taka awmin, kan tisa chakna tipuitling turin eng thil mah tilo turin min hrilh a ni.

 

3) Pathian Thu buaipui kawnga harhna : Pathian Thu buaipuina kawngah hian harh tawkin kan inhria em? Harh lo ni ila hetiang khawp hian kan inkhawm peih lovang a, rawng kan bawl peih dawn em ni? A dik a ni, Sap Missionary ten Chanchintha min rawn thlenna avangin Kristian ram kan lo ni a, Kohhran tam tak a ding a, ramthimah Missionary te pawh kan tirchhuak ve nual a ni. A ropui hle mai, mahse hei hi tawk thawkhat kan ti em? 

Kohhrante hian kan mimal nun theuh hi inbihchiang ta ila, Kristian ram leh Kristian kan nih angin Pathian thu kan hre tam em em a, nimahsela Pathian thu a taka nunpuitu leh Pathian thu tuipuia, buaipui peih tak tak hi kan tlem hle a ni. Pathian thu phak ang tawka zir kan peihlo tlangpui a, Thalaite zingah pawh han inzawt ta ila,  Pathian thu zir a, Pastor, Missionary, leh rawngbawltu nih chak hi kan tlem hlein a lang. Pathian thu zir ai chuan thildang zira, hna dang tha tak tak thawh chu kan chak tlangpui zawk a ni. Hei hi engnge a chhan ni ang? Pathian thuah kan tui tawk lo, Pathianin Kohhran min din chhan kan hre tawk lo, Chanchintha hril tulna hi kan hriatchian tawk loh avangin, leh kan duh emaw duh lo emaw Pathianin ti tura thu min pek (Thupek ropui ‘khawvel zawng zawngah kal ula, Chanchintha hi hril rawh u’ Mat.28) hi kan man chian tawk loh vang niin a lang. 

Sawi tak ang khan kum zabi 18-19 velah England ramah harhna a thleng a, ram tam tak a dengchhuak a, chu chuan Missionary tam tak a hring chhuak a, chung Missionary te chuan khawvel hmun hrang hrangah Chanchintha an hril chur chur a, an ram England chuan Pathian Malsawmna nasa tak a dawng let bawk a, Ram nitla seng lova roreltu, ram ropui tak an nih phah hial a ni. Infiamna lam Footballah te pawh khawvel hriat an hlawh em em a ni tih kan hria. Tin, Wales rama harhna thleng avangin Missionary tam tak an chhuak bawk a, Khawvel hmun hrang hrangah chanchintha an hril darh zel a, chumiin a hrinchuah kal zel chu Kan ram, Mara ramah pawh Missionary te an lo thleng ve hial a ni. 

Sap Missionary te kha lo kal lo ta se, hetiang dinhmun hi kan thleng thei ang em? Khatih hun lai khan keini chu ‘hnam mawl’ mai kan la ni a, an ni erawh chu an changkang em em a, an khua London chu pui tak mai a ni a, an khawsak dan engkim mai kha nuam tak leh changkang tak vek a ni a, kalsan uiawm tak tur vek a ni. Nimahsela, Lal Isua thupek ropui tak avangin an ram nuam tak mai pawh chu thlahlel hlei thei lovin, he kan ram kilkhawr tak, kawng pawh awm mumal lo, sakawlh leh rannung hlauhawm tak tak karah hreawm tinreng tuarin, Chanchintha min hrilh turin Rev. R A.Lorrain te nupa kha an lo kal a, anmahni avangin Chanchintha kan lo hre ve a, kan ram chuan Tisa leh Thlarau lamah Malsawmna nasa tak a dawn phah bawk a, tun dinhmun hi kan thleng thei ta a ni. A va ropui em!

Tin, tunlaia thil lar tak, India Sorkarin a buaipui em em chu Khawchhak lam ramte nena insumdawn tawnna tur Look East Policy hi a ni. Kalkawngte an siam mup mup tawh a. Sorkar pawhin Khawchhak lam a hawi daih tawh a nih hi. Khawchhak lam ram te hian malsawmna dawngin, Khawvel hriatah hma an sawn nasa em em a. Electronics bungrua chi hrang hrang te hi han en ila, China, Japan, Korea te siam deuh vek a ni a. Korea phei chu a ram tet ngaihtuahin an changkang hle a, an film siam te thlengin kan en duh em em a, zan khat en loh pawh hreawm ti kan tam. An incheina te kan duh em em a, an sam nuai thur dan thlengin nalh kan ti a, kan inhmeh emaw hmeh lo emaw pawh ngaihtuah lem lovin an hairstyle te kan copy chur chur ta mai. Heng hi engvang nge? A chhan chu an changkang em em a, kan ngaihsan vang a ni. Heng zawng zawng hi a chhan engnge kan tih chuan, Kristianten nasa taka rawng an bawl avang leh, Missionary nasa tak an kalchhuah vang a lo ni a. 

Tunlai issue lar tak mai leh chu North Korea leh South Korea te indo tum thu hi a ni. Khawvelin bengchhiin an ngaihven a nih hi. North Korea leh South Korea te hi tunhmain ramkhat an ni a, Indopui 2 na tawp lam 1945 atangin an buai tan a, tichuan 1949 ah khan an lo inthen ta a ni.  North Korea chu Communist zawmtu a nih avangin Kristianna duh lovin, Kristian an haw hle a. South Korea ve thung erawh chu Democracy ram niin, Kristianna an pawm a, Kristiante an zalen avangin, Kristian an pung chak em em. 

North Korea leh South Korea te indo tumna chhan ber nia lang chu An ram Economy inthlauh lutuknain a nghawng chhuah ni berin a lang a. South Korea ah hian Kristian an tam avangin Missionary nasa takin an tirchhuak a. Tun dinhmunah hian khawvela Missionary tirchhuak tam ber anga ngaih hial ani. Chuvangin Pathian malsawmna nasa takin an dawng a, Tourists te pawh an tam a, an ram sum dinhmun a tha chho zel a, kawng tinrengah hma an sawn nasa hle a ni. Chu chu North Korea chuan a thik em em mai a, tihchhiat dan tur a dap reng a, Nuclear ralthuam te siamin a test a, chuvangin US chuan North Korea nen an inzawmna zawng zawng chu a titawp vek a, South Korea chu pui a tum bawk si a.

 Tichuan North Korea dinhmun chu a chhe zawk em em a, hmun tam takah phei chuan ei leh in tur neilo te pawh an tam tawh hle a, hmanni lawkah phei chuan riltam lutukna avangin pa pakhat chuan a fapa sa a ei zo vek tiin Internet ah kan hmu hial a ni. Tak tak ni maw? Chutiang khawp chuan North Korea ram dinhmun chu a chhe tawh a. Heng zawng zawng hi engvangnge kan tih chuan ‘Pathian hretu leh a rawngbawl ram leh hnam chu malsawmin an awm ang a, Pathian hrelotu leh a rawngbawl duhlo ram leh hnam chu tihchhiatin an awm ang’ tih kha a takin a lo thleng ni berin a lang. Chutiang chuan Missionary te hian an thlenna ram apiangah tisa leh thlarau lama malsawmna an thlen a, chutiang bawkin Missionary tirchhuak tam ram apiangin malsawmna an dawng let nasa thin a lo ni. 

Keini pawh, kan ram leh hnam, kan Kohhran hian malsawmna dawng sela, hmasawnna kawng hrang hrangah thanglian zel ila tih kan duh a nih chuan, tun aia nasa zawka Pathian thu buaipuina lamah leh, Chanchintha hril rawngbawlna lamah hian kan zavaia kan harh leh zual a tul a ni. 

Nu leh pate pawhin fate Pathian rawngbawlna lama kal tura kan fuih tam a tul a, chutiang bawkin Thalaite pawh Pathian rawngbawlna lamah ke kan pen uar a tul. ‘Tunah chuan lehkha ka la zir laklawh sia’ kan ti a ni mai thei, amaherawhchu, ‘nakinah ka zirchhuah veleh Pathian rawngbawltu ka ni ang, Pastor, Missionary, Rawngbawltu ka ni ang’ tih rilru kan put a hun tawh a ni. 

Pathian pawh hian a rawngbawltu atan, a chhia chhia leh a thiamlo lo hi a duhin a thlang bik a nilo. A tha leh a thiam thiam chu a duh ve hlei hlei zawk. Amaherawhchu kan ramah chuan Lalpa rawngbawl tura inpe te hi mi tlawm tak tak te kan tam vangin nge? Pathian rawngbawl tura inpe te chu a chhia chhia, a thiamlo lo, a hmelchhia chhia te tih tura ngaihna a la lian hlein a lang. Ramdang leh hmun dangah te chuan a tha leh a thiam thiam te hian Lalpa rawngbawltu nih hi an duh hlei hlei tawh a, an intihhmuh tawh hial a ni. Lalpa rawngbawlna kawngah pawh a lehkhathiam sang te hlei hlei kha an fingin, an tangkai zual daih zawk a ni tih hriain, Lalpa hman atan keimahni ngei pawh kan inpek phal deuh deuh hi a tul tawh a, Lalpa rawngbawltu nih hi kan intihhmuh ve a hun tawh a ni. 

Kan ngaihsan zawng te pawh hi thlakin, Lalpa rawngbawltute hi ngaihsan nachang hria ila. Lalpa rawngbawltu pung ila, Lalpa rawng hi bawl chur chur ta ila, kan ram leh hnam, kan Kohhran hian malsawmna a va dawng nasa dawn em! Tichuan Lalpa lung a awi ang a, Tisa leh thlarauvah nasa takin hma kan sawn thei ang. Keini pawh hi damin awm ila, Pathianin rem a ti a nih chuan, kan duhdan leh kan tumdan tak chu kalchhuah ve hi a ni. Kan tumna te kan duhna te a hlawhtlin ngei theih nan min lo tawngtaipui thin turin ka ngen bawk che u a ni.

Kan Lal Isua thupek ropui tak hi ngai pawimawh in, Kohhran te, Thalai te hi harh thar ila. Lalpa tan inpe tharin, kan ram, kan hnam, leh kan kohhran damna turin tun aia nasa leh zuala Lalpa rawng kan bawl theuh theih nan, Lalpan a thu kan za atan Malsawm rawh se Amen.