Satlia Ahlo nata Gospel zy A hneina daihti pasiapa a cha haw

St. Sahlo Bohia (Ahlo), s/o. B. Tusa (L), nata Ls. T. Gospeli, d/o. T. Lala zy cha ama hnei aw, tahpa zahnia za khata pasiapa a cha haw. He ama hnei nawpa he tarinoh 10, Nov. 2011 tahpa ta paryhsapa a cha. 

St. Ahlo he atahma Siaha DIET liata Lecturer rai a hria ngahaipa cha ta, New Colony Vaih liata a pahrapa a cha. Ahlo he satlia a reisi kawpa nata viasa apakyh thai kawpa cha ta, Awnanopa, KTP, MSO, MTP liata ahmah kawpa nata hmatlah cha kawpa a cha. Chanota, Ls. Gospeli chhao he Siaha Vaihpi liata pahrapa cha ta, Awnanopa nata khitlah liata ahmah kawpa nata hmatlah cha kawpa a cha hra. Ano he Transport Office liata sawkharai a hria ngahaipa a cha.

Women Ordination Chochah

By A.Zawngia, Editor

Women Ordination chôchah he reih khoh kaw leipa na ta. Achhâpa cha keimo pha nawpa a reipaphapa alyu awpa vata ei sohsi kaw. Anodeikuala, atamy eima Seminary liata hmotlôpa ta pachâna thata na pie ta. Cha cha chyhsa hluhpi ta ama dao pha leipa nata pacha pha leipa hmo, chanôzy ta Abeipa Zapati Dôhna liata viahchha nata Kresawti raipa a cha.

Miss Thangphidashisha (Thangte-i ta Viachha a rainotahpa)

Shillong Bajar

Kei heta khizaw liata Hotel mohpathahpa Royal Suite, Burj Al Arab liata a tlo beih awpa cha leipa na ta, Ty Warner Penthouse, Four Seasons, New York zy cha ei saduthliena ta a pha hra vei. Bajar awpa ta, atahmano reihkah ta "Shopping" awpa ta Beverly Center Shopping Mall nata Century City Shopping Center, Los Angeles liatazy a hlaihla nga kaw hra awpa ta ahy hmah na pangiasa hra aw veih ei. Ei tlona rakha liata aly kawpa ta y na ta, achana dah hawhta palohtlah awpa deilei tao thei hropa y hra vei. Mohropazy chata la, pahnei chhi hmah achhih leipa tla a cha. Chatahrasala, kei chata la "he hleikho" va awpa hropa a ypa ta pahno va na. He suzy chhao he myla hanoh liata atlo chhao hmah vaw tlo thei khao ngyu aw va na. Chavata, kei chata la tlao a vaw soh chai.

 

SMC ta "Praise & Worship" daihti cha Hata heihpa lata a pasie

Post hno chaipa liata eima vaw palasapa, Shillong Mara Church ta myla Pahanoh (Dt.11.9.2011) liata Praise & Worship daihti hmah awpa ta a vaw pathlupa cha, ryhpaoh viana pachapa ta hata heihpa Pahanoh tarinoh 18th Sept. 2011 liata hma awpa ta tlao a pasie ha.

Atahma Pahanoh eima tlo awpa he SMC liata KTP Choir Conductor kha a vaw cha tyhpa, Chakaotuhpa Beihrozachhi sie awpa a chapa vata ano pathliena daihti chata hmah ta, ano ta bietanazy reih sala, tahpa pachana vata Praise & Worship daihti pasiepa cha ta. Chanota, pangiasa leipa ta ECM KTP (H) zy khi vaw tlyhpa ta eima Awnanopazy maniah vaw tly awpa ama chapa vata, amo ta daihti tlao ama hmah awpa ta pangiasapa a cha.

He daihti chana heta a vaw patohpatia hapa cha taraw ta, chanota Marasaw su hro lata a ypazy ta thlahchhana liata maniah nama vaw bao tahpa pahno pi ta, chaly ngaita kaw pi ta, eima thlah a loh hmeiseih. Atahma hata liata hmah thei hra vei ei sihla, hata cho la khi buana y leipa ta eima hmah thei nawpa ta thlahchha maniah bao via lyma awpa ta eima Beipa Zisu Krista moh ta tlao eima cha haw chanei heih.