Women Ordination Chochah

By A.Zawngia, Editor

Women Ordination chôchah he reih khoh kaw leipa na ta. Achhâpa cha keimo pha nawpa a reipaphapa alyu awpa vata ei sohsi kaw. Anodeikuala, atamy eima Seminary liata hmotlôpa ta pachâna thata na pie ta. Cha cha chyhsa hluhpi ta ama dao pha leipa nata pacha pha leipa hmo, chanôzy ta Abeipa Zapati Dôhna liata viahchha nata Kresawti raipa a cha.

Miss Thangphidashisha (Thangte-i ta Viachha a rainotahpa)

            Keimo Awnanopa cha eima pahno chyupa hawhta chanôzy Pastor châta a chahnao thei leipa vata chapaw Pastor sai ta Abeipa Zapati (The Lord Supper) he pachhuahpanoh tyh ei ta. Chanôzy chata taopathaih leipa nata tao thei lei awpa hawhta eima palôh liata a y. Anodeikuala, awnanopa zydua vaw châ khai hlei leipa ta, thokha liata cha chanô Pastor ama y hra. 

Miss Alice Kulu ta Viachha arai ngahainotahpa

             Theology achuna su liata cha chanôzy pathluana nata mohnaona kyh he thata reipa a cha tyh ta. Chavata chanôzy he chapaw duasu nata pananopa cha leipa ei ta. Chapaw taopa maih ama tao thei thlah ha hra. Abeipa Zapati dôh awpa a cha khia cha, chapaw ngâlâh ta tao leipa ei ta, chanôzy rao tyhpa a cha tyh. Atamy liata chhao eima Pachutuhpa Rev. Terrence Wanshong cha Minister châ ta. Ano baotuhpa châta chapaw 2 nata chanô 2 raopa cha ei ta. Cha hawhna chata laihsanah ta Viachha nata Kresawti maniah rai ei ta, nie pi ta doh pi ta, thlahchha pi ta. Chanô raipa a chapa vata “Kei la nie mah tua va na” a tahpa y hlei leipa ei ta, zawmarâpa chhao, Pastor chhao, chatanachata Abeipa Zapati cha eima dôh khoh khai. A nano viana y hlei vei. Nohhro ta thlah eima chha dah tyhpa hawhta eima chha thlah ha. Thokhazy ta saisoh ei ta, “Laihsazy Kresawti raipa he athloh viapa ta ei pahno,” a tahpazy deikua ama y hra. He hawhpa he keimo Seminary liata ngâlâh taopa a cha awpa ta pangiasa leipa na ta, Seminary hrola (Senate of Serampore Colleges) chhao ama tao chyu hra nata ei pangiasa hra.

Miss Thangphida ta Kresawti arai

            Keimo Awnanopa ta Chanôzy Pastor châta ala thei leina chhâpa he pahno pasia hlei leipa na ta, anodeikuala ‘chhâpa’ deikua a y hra aw. He he eima Awnanopa dei cha leipa ta, su hrola chhao apyh thei mah leipa ama y hôlô hra. A viapahchaipa ta Mizoram liata Awnanopa hluhpi a vaw pyh thei hra leipa ei ta, chazy hry liata âlâluah viapazy cha Presbyrian Church of Mizoram nata Baptist Church of Mizoram zy he ama châ hra. Chanota, keimo Awnanopa nata Baptist Awnanopazy cha Chanô Machâ chahnaopa cha a tao thlah ha heih. Maisâh chhao abyuhna lia maihta ama pakiasa khai thlah ha. Chavata, atahma rairuna a ypa cha Pastor chata la thei leipa ngâlâh a châ. Awnanopa liata hriatuhpa Chanô cha y hôlô ei ta, ama hlao kyh liata chhao, chapaw Pastor zy hawhta piepa a cha thlahhapa ta pahnopa a cha.

Miss Alice Kresawti arai nganotahpa

              He rairuna he atliata tawhta vaw ypa cha leipa ta, Krizyna a vaw thao dyu tawhta vaw y hapa tlao a cha. Bible he pakhata ta eima reih khiacha, chanôzy duasu he vaw pha kaw leipa ta. Chanôzy thatih rona chhao a chyh kaw. He he sâkha cha Socio-Cultural Background vata a vaw cha. He vâna heta Krizyna kô hluhpi vaw sie hapa liata chhao chanôzy cha mohnaopa nata chyhsa khophiepa hawhta vaw hmô ei tyh ei ta, theihthaipa (pastor) duasu liata a vaw duah thei rai rai veih ei.

            Khizaw a vaw sosah lyma chanô thokhazy ta Bible pakhata ta ama vaw reih pasia nata rairuna ama vaw tyhna chhapa vaw hmô papua ei ta. Abeipa ta chanôzy he chapaw hlata a hnai viapa ta taopa a châ leinazy, chapaw hlata kyh to liata ahnai via awpa ama châ leinazy cha vaw pahno lyma ei ta. Chatawhta ama duasu dopa liata ama kaw duah thei nawpa ta Awnanopazy ama vaw dyuh. He a vaw dyuhtuhpazy cha Elizabeth Cady Stanton zy cha ei ta. Chatawhnachata ama hlao vaw tloh ta, kô 1944 tawhta chanôzy cha Pastor chata chahnaopa ama vaw cha haw hra.

            He tawhna heta Awnanopa hluhpi cha ahmopapua ei ta, chanô ama chana vata chyhsapa hawhta rao leipa cha asu tah leipa ei ta. Chanô nata chapaw duasuzy pahlie khao leipa ta palyu lymapa a vaw cha haw. Pastor cha awpa ta Qualification a hneipa cha chanô nata chapaw pathlua khao leipa ta lapa ama cha lyma haw. 

            Awnanopa khôtho la duasu achyhta sai tua ei sihla. Rah hmahsie viapa liata cha chanô nata chapaw he sawkharai liata tlyma, Politics liata tlyma pachhaihpa cha khao leipa ta. Kyh toti liata pakhopangah khaipa (Equal Rights piepa) a cha haw. Chanôzy ama chapa vata mohnao via awpa he rah thokha liata pasai leipa tlao cha ta. Chanota, eima rah India liata chhao chanôzy he a kheihhawhpa liata chhao, chapaw taopa maih tao thei khaipa a cha hra. Chahrasala, eima rah duasu mopa ta chanôzy duasu he kha a hnai kaw chy ta. Chapawzy hawhta riahphana ama hnei mah leipa vata Chanôzy khokheiviana dah (Women Reservation Bill) taopa tlao cha ta, atahma cha hma pathaopa a cha ha ba. He hawhna heta chanô hluhpi cha eima rah nata khitlah chata hmâtlâh ama cha via thei nawpa nata, ama kaw sosâh via thei nawpa ta dâh tlao taopa a cha.

            Chyhsa thokha cha ama pahnothai leipa ei ta, chanôzy kha a mohnao thlahhapa hluhpi eima y. Chanô ama chapa vata chapaw hlata ahnai viapa, chapaw akho lei awpa nata chapaw pachana a pachâ pha lei awpa apachapa hluhpi ama y. Cha hawhta a pachapazy chata cha chhopasia aru kaw. He hawhna heta reih ei sihla, atahma he eima India rah liata cheingei chhao aluhchaipazy he chanô sai ama cha. Apakhona sakha vaw reih tuasala; Pihno Sonia Gandhi he ‘chanô’ châ ta. Chahrasala, ‘nâ chanô’ tah ta mohnao thai awpa cha vei. Politics athainazie nata a lathli phanazy, a ryurei thainazy he chapaw India rah chapaw hluhpi hlata so viapa, Aviahpa so kawpazy hmahta ama pha leipa a cha. Chavata, ‘chanô’ a chana vata tla mohnao thai awpa cha leipa ta, ‘chapaw’ eima chapa vata tla apapiparysa thai awpa cha hra ma pi. Cha hlata la, ryureina tlyma, Awnanopa chhihthana liata tlyma, a kheihhawhpa rai liata chanôzy he pahlao hra ta, eima hmah phahnai awpa a cha. 

            He hawhta a chapa vata eima chanônahzy he tla mohnao thlah ha leipa ta, tlao eima deichhy awpa nata eima paso paka thai via laih lyma awpa abyuh ngaita kaw. Shillong liata achuna vata ei vaw y pataw nata hmo sakha athiehpa ta ei pahnopa cha Awnanopa chhihthatuhpa tlyma, KTP nata MSO liata rai ama tlyh khiatala, chanô ama vaw pahlao lymapa he a cha. Ei za y tuano ta Chanô Mâchâ Sylvia Solo vaw hnei ha ei ta. Chatawhta Chakaotuhpa ama la heihpa liata chhao Chktp. N.Ngohli w/o Rev. VL Ngaia Hlychho lapa vaw cha heih ta. Atliata liata chhao Chktp. NC Alicia, d/o. Rev. NC Vabeilua vaw cha heih ta. Amo heta Awnanopa chata ama phahnaina zie thata ei hmô papua. Kheihhawhpa daihti liatazy tlyma cha, chapaw hlata ama phahnai viana hluhpi a y tyh.

            He vana heta Awnanopa liata chakaona raihria awpa ta Pastor chata chanôzy eima la thei mah leipa he, eima Awnanopa ta heihnawhzy eima kaw kho mah leina nata pitloh mah leina a chapa ta ei pahno. Chapaw zydua he hmatlah cha khai hlei leipa pi ta, chapaw BD a patlô hapa maih Pastor chata eima lapa he asu chai hlei leipa ta. Chanô ama chapa vata hru khai hra leipa ei ta, mohnao awpa cha khai hra veih ei. Chanô so kawpa nata eima rah nata Awnanopa chata hmatlah a cha awpa hluhpi ama y hra aw. Chanota, dâh liata nata pachana liata, “Chapaw ngalah Pastor a cha thei aw” tahpa tlyma, “Chanô rai rai Pastor cha thei aw veih ei” tahpa eima hneipa he asu leipa ta. Cha hlata la, hmatlah a chapa cha, chanô nata chapaw pahrua leipa ta tlao la thei ei sihla, eima Awnanopa heta athôhkhei via awpa ta ei hnabei a seih. He he keima mopakha pachadah a cha.