Shillong Bajar

Kei heta khizaw liata Hotel mohpathahpa Royal Suite, Burj Al Arab liata a tlo beih awpa cha leipa na ta, Ty Warner Penthouse, Four Seasons, New York zy cha ei saduthliena ta a pha hra vei. Bajar awpa ta, atahmano reihkah ta "Shopping" awpa ta Beverly Center Shopping Mall nata Century City Shopping Center, Los Angeles liatazy a hlaihla nga kaw hra awpa ta ahy hmah na pangiasa hra aw veih ei. Ei tlona rakha liata aly kawpa ta y na ta, achana dah hawhta palohtlah awpa deilei tao thei hropa y hra vei. Mohropazy chata la, pahnei chhi hmah achhih leipa tla a cha. Chatahrasala, kei chata la "he hleikho" va awpa hropa a ypa ta pahno va na. He suzy chhao he myla hanoh liata atlo chhao hmah vaw tlo thei khao ngyu aw va na. Chavata, kei chata la tlao a vaw soh chai.

 

Kahhrao na saoh ta, hata ei kha tlai class chhao kiah thei khao leipa na ta. Hostel liata ypa cha ei ngia na mo (na-ai) kaw ta. Atanoh, Pachyhnoh vaw cha pa ta, chavata myla ta Praise & Worship zy hla achuna chata Bajar lata apatlapazia sala, a pha kaw thlyu ualua na, tahpa pachana chota my noh a chhi hlata tizy a si khai ha na ta. Chahrasala, viasazy bie vaw hiahhri pasia na ta, a daihti cha tlao vaw pasie ha ei ta. Chatahrasala, Bajar la cha pua pyly awpa ta achhuah na ta. My dawh 10:30 liata Hostel puasai na ta. 

ATM tawhta phusa ei la papua pataw nata ei tao tuachaipa cha Top-up ryh na ta. Tawhla, Bajar la avy lyma na ta, Bajar kiapah liata Tibetan Restaurant liata a paha na ta. Cha Restaurant liata ei tyuh thlahha nota (Khasi) no pakha nata a sawchano laihsa hapazy ei kiapah liata a vaw tyuh ei ta. Ama biereipa cha a zydua ta pahnokhai taraw na, ei pahno chhohpa cha ama ahmie zuapa thlai ama paty theipa vata ama lyna biezy reih ei ta, Polythene Bag thiehpa ama chaleipa cha, chalei pasu tah kaw ei ta, ama sahria liata hmozy cha pachhi ei ta, Polythene Bag lachha kho ei ta, Chinese Chow order ei ta, ama pachana aki ngasa.

Akho ta liata no pakha nata a sawchapawpazy chhao pachana aki kawpa ta atyuh thlahha hra ei ta, khapa ma ama hapa a cha, tahpa deikua la pahno va na. Buakha y ta, a sawchapawpa cha Chow vaw pie ei ta, nohrahpa cha Mow-mow (spelling ado tlyma?) vaw pie ei ta. Nie ei ta, ama pahasa ngaita kaw. He liata sakha ei mo na ai leipa cha, no heta a sawchapawpa pahasa kawpa ta Chow a niepa cha moh ta a mo-ai vei. Keima chhao ei no na vaw di pathao nga kaw hra ta.

He no nata saw pati-dohna khota liata laihsa 2/3, pakha cha a saw ta pina chota atyuhkhoh heih ei ta, amo chhao he Chow pyly nie hra ei ta, ama pachana aki kaw sai. Kei chhao, Pork Fried Rice na vaw pie hra ei ta, ei pachapa hlata a hluh. Half Plate ha sala a daihthai kaw awpa cha ta, "Half" ei tah leipa vata Full Plate na vaw pie ei ta, kei pawtlohpa, 75kg ahripa hmahta ei pachha lei daihma. Vasa ta nie khai na ta, pybie kawpa ta Restaurant ei puasai hra. Bajar liata charei na ta, Khasi nonah khihsana pachapa vata ama sohdaohna ama buakhei nga kawpazy cha sai laih lyma na ta, zala dawh 3:00 vaw paro ta, ei kaw di haw.

Atanoh chata bieso, "Ama zydua ta hriapasa ei ta, ama hriapasana theilapa cha aly kawpa ta die ei ta, doh ei ta. Ahy hropa uahva hlei hra veih ei. Ama hriapasana hleikhopa nie hra veih ei" tahpa a cha.