Atako Football khizaw liata thatih laluah chaipa hry liata sakha, Fabregas ta Barcelona la kua heih awpa thatih he a cha thlyu aw. Zako tawhta he thatih he thata rei tyhpa cha ta, chahrasala pachapa hawhta hmo a sie thei leipa vata pasia theipa cha leipa ta. Atahma deikua cha a sia haw; Zahnia khata Cesc Fabregas cha alaiseihna Barcelona Club liata zawpi (fans) 30,000 zy hmia liata alypangiapa cha ta. Coach Pep Gordiola ta a vaw rei hapa hawhta Jersy No. 4-na viahpakao pakypa a cha.
Cesc he a hati no, ko 13 a cha nota a no nata paw zy achhaih ha ei ta, rietheinazy taopa lymapa ta Barcelona FC Academy liata kiah ta, ko 16 a cha nota English Premier liata Club mohpathahpa Arsenal liata akhaih awpa ta Barcelona he a vaw puasai. Cha daihti liata a viasazy cha atahma ta Lionel Messi zy he cha ei ta. Ko 8 tlai Arsenal liata a vaw khaih haw ta, atahma ta ama Captain a cha ngahaipa a cha. A khotlyna hmah cha hra sala, Arsenal cha English Premier liata Title la theipa rai vaw hnei khao leipa ta. Chavata Arsenal Captain Cesc heta Arsenal liata y via awpa hnabeiseihna hnei khao vei. Chanota, a rah Spain cha European nata World Cup Champion cha ngahai ei ta, Cesc heta Arsenal liata a ypa he ano chata a rah chata akhaihna liata First Eleven su to awpa rairuna a vaw hnei pathao hra.
Cha hawhta hmo a sie nota, a viasa Xavi nata Messi zy hra Barcelona Club la kua heih awpa ta vaw rei pasao tyh ei ta. He vana heta a pohpa Arsenal liata y hra sala, apachana deikua Barca liata a y ha tyh. Ei hluhpi nata atahma chhao ta La Liga Champion ngahaipa, UEFA Champion League Title a vaw la ngahaipa liata akhaih heih awpa cha ma hawh deita ta sa tyh ta. Atahma cha vasa ta ato zydua pasia khaipa ta Barca la a vaw kua thei haw.
No comments:
Post a Comment