By A.Zawngia
Atahmâ cha dyhchâ khôphei kiahpa ta saw chhao pano (2) tlai vaw hnei
haw hra na ta. Hnohla daihtizy pachâ pakhua ta a palôh a paliesa nawpa
daihti nata a chhâpa rai a ypa ta pahno khao va na. Cha hlâta la
sawnawhzy pachâpa hleikhô ta hmo hropa pachâ viapa hnei leipa na ta, ei
lyna chaipa nata nâ palysatuh chaipa chhao khâpa hropa rai châ vei - ei
sawzy hleikhô. Mohropazy kheihta ma ama hmô dah a châ, tahpa liata bua
leipa na ta, keima mokhaoh ta liata cha, 'mongyuhpa saw' hlâta chhithai
tah via ei na ta, he khizaw varâh-teih liata atlupa rai y veih ei.
Anodeikuala, cha hawhta ei lyna chaipa ama châ nota, eima laikathipa
liata laihsa thyudyupa pakha chata atahma hla cha ei chhôhso thata na
vaw cha hria ta, ei pachâna thata a vaw thla haw.
Laikathi-laichhapa tlâ eima châpa vata eima pyhlie tawhta ei cha sai
nata khatinorai hmô thei awpa ta y ta, cha hawhta a châpa vata my ei
thyu pataw nata sai aw na ta, ei charei awpa chy ta sai heih na ta, ei
chareina tawhta ei vaw di pataw nata ei sai heih tyh. Moh via na sia
via; sai via na pha via, tah ta. Daihti vaw sie ta, eima o tawhta ei
saipa cha a daih tah khao leipa na ta, za charei ta a kiapah liata
liahsa atyuh ta sai awpa khona vaw y ta, cha chhao cha a pha tah vei hra
sala, a pakhâ thei khao va na.
Ei khona hawh tlai ta za charei
na ta, o chareipa ahyhmah vaw y leipa ei ta, a y vaw ru kaw ta. Cha
hawhta keima tlai ta ei za chareipa cha ano chhao no-ah vaw tah kaw hra
ta. Bielôhhawhpazy cha varo tlai reih khoh pi ta, zâlâ daihtizy a vaw
châ hapa vâta, ei vaw disai haw heih.
He tlupo ta laihsa hmisiapa
nata chhithaipa, kho achhihpa nata a pawti thlôhpa, o chareipa pakha
dâhdei chhao a hnei khao leipa duasu ei za pachâ nahta ei ngia ei na
chhie hmeiseih. Ano ta ei na chhopazy cha my thei leipa na ta, khâ ei
pachâ tyh. He hawhna heta na chho ta:
"Tahmâ la, ei pawti zyh
awpa ta o chareipa pakha dahdei chhao y khao veih ei. Kei deita ta yru
kawpa ta y na ta, ahyhmah ta 'nâ ngia kaw na, na pawti a thlôh kaw na'
na tahpa y hra veih ei. A châhta la Mara sawzy chô liata ei palôh a pasa
kaw tyh. Ei pawti azyh tyh awpa pavawzy cha siah cheisia nata meithei
ta abyh chaimah ei ta, atahmâ la pavawzy pamua kha ei ta, kô chareih ta a
daihti ta liata vaw pawh tyh hr'aw sala, ei pawti thlôh ngaitapazy cha
apazy awpa rai y khao veih ei. Pavaw nata pazu zy ta ama ryuhie biezy he
duah pachâ hra tua u: Marâ sawzy he Khazohpa angiapâtuhpa ama châpa
vâta amozy ngiachhie kaw ta daodo kaw awpa hawhta vaw hnabeiseih kaw
taraw ei ta, anodeikuala Sata zy hlâta na maniah ama hao via, tahpa ta.
Khazia maw, Mara sawzy heta Khizaw liata moleina he tlao adyuh leipa ta,
pavaw a ngia kawpazy tlao ama dyuh ha tly? Khazia ma râh hropa lâta
thatihpha thata chho ei ta, keimo Marârâh chhôh liata a pahrâpazy hnohta
thatihpha maniah ama chho khoh hra vei tly? Khazia ma, keimo chhao
Khazohpa hmotaopa cha thlah ha hra pi ta, maniah ama hao kaw tly?
Pahnothai ha ula, keimo nata adyhryh ngaitapa ta y ei sih la, namo chata
byhna thata eima cha awpa tlai?" tahpa ta.
"Aw.. vaw pahno thai
ha ei sih la... Marâ sawzy ta pazu-pavawzy, râhsa nata thokô-rihkôpazy
eima vaw pabohsa lyma awpa tlai...!!!"Chavata, ei lôhkhyzy saih u..
pachâ khoh tua ei suh u..
(Ei laihsa chareipa cha ary liata nohthlapa ei sopa "Chiahchi-Paw" a châ. He he CEM Quarter chhôh liatahpa a châ
No comments:
Post a Comment