Pihno TT Dawso maniah a pahasai haw

          Pihno TT Dawso, w/o K/M C. Ngokhai, Teacher; P/S Khopai cha daihti varopi a pasa tawhta zahnia za dawh 10 liana khata Aizawl Civil Hospital liata a chhohkha nata viasazy siesaipa ta Paw hnohta maniah a pahasai haw. Ano he zako December thlapa tawhta a pasa pathaopa hawhta reipa cha ta, o lata varopi ama mohhoh tawhta thohna-o suzy ei hluhpi ngaikhei hapa cha ta. Atliata liata hata ei 2 hlei ECM Hospital, Siaha liata a mohhoh ta. He tawhna heta zakhahnia khata Aizawl Civil Hospital la paphaopa cha ta. Zahnia lata City Scan zy taopa a cha tarawpa ta, pasana hri ta a hrona soh ngaitapa cha vaw pahnie ha ta, tlahna hnabeiseih kawpa a tarawpa ta a hrona pachha thei awpa cha khao vei.

                Pihno Dawso (Ngohiano tahpa ta aw tyhpa) he rei hapa hawhta zako Di thlapa tawhta a pasana he a vaw thao ta. Chasipa nata luh pasana thata a vaw hnei tyh. Siaha Civil Hospital liata a vaw pamosa ha ei ta, Lolei Civil Hospital lata chhao ngaikhei hapa a cha hra. Chahrasala, a pasana hri pahno pasia thei leipa ei ta. Cha hawhta pasana hri pahno theipa a cha leipa vata ahmawh cha awpa ta pangiasana thata lai ta. Theiri liata dyuthaipazy, Siahatlah liata dyuthaipazy nata mohropa athaipa ta ama reipazy vaw pamosa lyma ei ta. Thokhazy ta ‘ahmawh tlai na a cha, a cho liata a kiapa na a y’ ama tah nota thokha deikua ta cha ‘cha vei’ a tahpa ama y hra. Chyhsa hluhpi ta ahmawh cha awpa pangiana alaitu hapa vata dyuthaipazy pamohhohsapa vaw cha ta. Chahrasala, phana la pangai leipa ta. Chanota tari noh 13^th May ’11 liata deikua cha a pochhina vaw paru via haw ta. A palohzy a vaw thei pasia thai khao leipa ta Siaha la ngaikheipa a cha ha heih.

(Late TT. Dawso)

                He daihti liata Thohna-o su la thlai pangai leipa ei ta, dyuthaipazy pamosapa a cha heih. Chahrasala, chanota a pasana cha malaria cha awpa ta pangiasana a vaw y hapa vata Siaha Civil Hospital la pangaipa ta a pamosa heihpa cha ta. Cha daihti liata deikua cha a pasana hri cha hmopa ta, Malaria PF +, lathli lata angiapa a cha, tahpa vaw hmo papua ei ta. Typhoid chhao a hlao hra, tahpa hmopa a cha hra. He tawhna heta Foreign thohna nata Quinine zy ta a mohhoh lyma heihpa a cha.

                Thohna-o liata a y chhohta a paloh a thei pasia thei leipa ta. Ei kha ei no deikua, a pasana a vaw pachho via daihti liata biezy vaw reih tyh hra ta. Chahrasala, a vaw chasi heih nata a vaw paru via ha tyhpa a cha. Cha hawhta chasipa ta a pathlie pathlah thei leipa vata atanoh deikua cha he alei rietheina zydua siesaipa ta, pasana rai y khao leina su la, a no nata paw, a sawchano uhtheipa Ngohia zy pahrana su la cha maniah a siesai ha.

                Pino Ngohiano (L) he Abeipa reithaina liata a pie kawpa chano, Abeipa lata piena nata rahzohpa chakaona liata a pasai kawpa cha ta. He dei chhao cha vei, Khopai liata khihsa rietheipa nata nohmeipazy kyhpachana a hnei kawpa, mahcha nata baongiahpazy deichhyna liata a piepasai kawpa a chapa vata ano angiachhietuhpa hluh kaw ei ta, daihti lei kawpa ta maniah a vaw pahasai thlahhapa cha ama paloh a pasa hmeiseih. Maraland Post chhao ta i ngaita kaw pi ta, a chhohkhazy eima taokhei hmeiseih.

                Atahma he avahpa K/Mc C. Ngokhai, sawchano 1 nata saw chapaw 3 zy siesai ta. A siesai hapa a chhohkhazy nata a viasazy hnohta thlalohna ama hnei thei nawpa ta thlahchhakhei ei suh vy.