Shillong Awnanopa ta Praise & Worship ei 2-na hmah aw

Shillong Mara Awnanopa ta atahma hata Pahanoh eima tlo awpa he Praise & Worship ta daihti a hmah heih aw. He he a ei 2-na a cha awpa a cha. He chana heta atahma apatohpatiana nata thlahchhana siekhei ngahaipa a cha.

SMC Dt. 21.Aug.2011 My Apakhyna photo

Shillong liata Mara Awnanopa he atahma KJP English Service Achhyna-o, Police Bajar liata my 10:30 -12:00 taihta Pahanoh maih ta apakhyna daihti hnei tyhpa cha ta, chahrasala Mara Apakhyna he my 10:30 liata angia pathao theipa cha beih leipa ta. Eima hmiata liata apakhypazy he 10:40 rahchhoh liata apakhyna pachha tyh ei ta, he tawhta Marasawzy apakhy awpa ta eima ngia pathao tyh. Chavata daihti eima pathaopa he my 11:00 vaw paro daihma tyh ta, daihti buakha deita ta apakhyna hnei tyhpa a cha. He vana heta Abeipa reithaina nata palyupalihna hla chhao sa hma tyh leipa pi ta, chavata July thlapa liata Local Meeting ta biepathluna tao ta. Thla kha liata ei kha chha cha Abeipa reithaina nata palyupalih "Praise & Worship" chata hmah awpa ta vaw pathlu ta. Biepathluna hawhta August thla hata ei 2-na liana khata Rev. Pheitha Lava nata Chktp. N. Ngohli zy ta maniah vaw chhihtha ei ta, a ei khana liata Abeipa thlahpa pathaihpa baona to kaw pi ta. Eima thohkhei kaw sai. 

Chavata atahma hata Pahanoh eima kaw tlo awpa he thapawh kawpa nata hnabeiseih kawna chota ahyrai ta ha pi ta, he daihti chana heta moto hnohta thlahchhana eima haw. He daihti he Mc Sylvia Solo ta maniah chhihtha aw ta, ano ta aryh a tahna dah hawhta maniah a siekhei awpa a cha. Shillong Mara Church ta  Member zydua aki a vaw pakhy khai awpa ta apahnosa ta. Suto rahto liata eima ngiapalahpa zydua hnoh chhao ta thlahchhakheina eima haw hra.