Shillong MSO Annual Sports 2011 hmah

Mara Students' Organisation, Sub-Headquarters, Shillong ta Hriaheihnoh tawhna khata Red Field, Motinagar liata Annual Sports 2011 ama hmah pathao. He Annual Sports liana heta Guwahati nata UCC liata Marasaw achuhaipazy chhao kaw tlo khai hra ei ta, thapawh kawpa ta nata aly kawpa ta atahma he Sports Events chi nanopa ama taopasua nga hai. 

Rev. Pheitha, Puhpa K. Beicho, P.P. Siatha, Mc. S. Thahlo

He Annual Sports pahyna daihti liata Chief Guest chata Puhpa K. Beicho, IRS hruapa cha ta, Pro. Pastor Siatha Solo ta a kaw zi. Chief Guest heta achuhaipazy ataopasuana ama hneipa he pahakhei ngaita kaw. Sport pahynoh noh-ykha, ataopasuapazy sai ta, he hleikho ta Rs. 7000/- hlei Sports Committee hnohta abao hra, tahpa biedaopa a cha. Shillong Biatuhpa Rev. Pheitha Lava chhao he Sports he pahakhei kaw ta, Hriaheihnoh nata Pakhynoh cha thyutliapa achuhaipa hnohta kha atyukhei duakhei hra.

Pro. Pastor Siatha Solo chhao, thyutliapazy ama taopasuapa cha saipa ngalah adaih tah leipa ta Football nata Volleyball chhao a khaih hra. He hleikho ta Shillong liata khihsapa no nata paw nata hatinahzy chhao nohchareih ta Sports sai awpa ta avy tyh ei ta, KNP nahzy ta Tiwa Mission Field Atlypahlaona awpa ta Thopi daoh Hriaheihnoh nata Pakhynoh khata ama tao.KNP Daoh liana heta Hlaohpa, Chana, Puri, Wuai-Wuai, Kuva, Thopi, etc. khatinorai ta asah kawpa ta nie thei awpa ta tao ei ta, amo chhao ama daoh taopa liata bua kaw ei ta, ama daih lei kawna vata ama thoh thlahha awpa ta ama hnabei aseih. KNP zy chhao heta Volleyball ama khaih hra. Pohbiehnoh nata Chutyhnoh he KTP zy ta ama tao heih hra aw.

Athletes zy KNP Thopi Daoh liata

SMC KNP zy

He Sports liana heta House sacharu (6) ta pachhaihpa cha ta; Laila, J.Vialua, Maitypi, Dyutha, Satha, Hrabi tahpa ta a cha. Guwahati zy he Maitypi cha ei ta, UCC he Dyutha ama cha. A hropa zydua cha Shillong khihchhoh liata a ypazy ama cha. He Sports liana heta Football, Volleyball, Race, Long-Jump, High Jump, Chess (chapaw chata), Checker (chano chata), Tug of War, etc. taopa a cha. Point duasu deikua atahma he ama pahlyh mah leipa vata pahno theipa cha mah veih. He Annual Sports he myla (Chutyhnoh) khita ama patlo aw.