SMC KNP ta Tiwa Mission Atlypahlao

Shillong Mara Church Krizyhpa No Py zy ta ama Headquarters biepathlupa hawhta zahnia Dt. 8th 10.2011 khata Tiwa Evangelical Mission Field, Assam ama za tlypahlao. He atlypahlaona he Bus ta alah ta siepa cha ta, mydi dawh 6-pa ta athao ei ta, zala dawh 5-pa ta Tiwa Mission Field tawhta ama vaw kua lilaw ha heih. Sapa nata thlahpa liata ama thohkhei kaw sai.

He atlypahlaona Program liana heta KNP zy ta Mc Sylvia Solo cha Leader nata Speaker chata rao ei ta, ano chhihthana nata patohpatiana ry liata siepa cha ta, ama Senior Advisor Mc Manase Chozah nata Mc A.Zawngia chhao ama sie hra. Biatuhpa Pastor Rev. Pheitha Lava chhao he atlypahlaona liana heta a sie hra.

Mc Sylvia Solo

He hleikho ta Program hlaopatlohtuhpa sakha cha KTP zy ta he daihti ryhpaohpa hmapa ta KNP zy baokhana sakha nata ama Music Video taona chata za sie hra ei ta, amo chhao sapa nata thlahpa liata ama thohkhei kaw hra.

Chktp Ngohli nata Pn, Bawri

My dawh 11-pa liata Tiwa Evangelical Mission su cha tlo ei ta, Field Director Rev. K. Laichhua Azyu nata Mission liata hriatuhpazy ta maniah vaw dy ei ta, thopi dona nata Abeipa hnohta alyna biereina hnei khai tawhta zawpi zydua chhao ta my pati dohkhohpa cha ta, dawh 12-pa liata Apakhyna Service pathaopa a cha. 

Rev K. Laichhua  and  Rev. Pheitha Lava

Apakhyna he Chktp. N.Ngohli ta chhihtha ta, Mc. Sylvia nata Rev. Pheitha zy ta Abeipa bietana ama reih. Field chakaona Report Rev. K. Laichhua ta a hnei. He Atlypakhaona Service liana heta SMC KNP tawhta Assamese hla paryhpa cha ta, Pihno C. Siano ta Mara hla reithaina hla sa ta, Pihno Chingo ta Recitation a hnei. KTP tawhta Hla a paryhpa cha hra ta, Ls. Damari P. Hlychho ta Abeipa reithaina hla a sa hra. Ls. Nunu heta "Ahy e kei chata sie aw?" tahpa Ls. N. Dawhniarili hlaphipa sa ta, a paloh liata hria kaw ta, mothlih chhao ta a sa. A sa pazao thei khao leipa vata zawpi zydua chhao ta sakheipa a cha.

  KNP zy ta Assamese hla ama paryh

Damari P. Hlychho

Tiwa Awnanopa tawhta Mahila (Chano Py) nata Youth Group zy ta hla paryh ei ta, satlia 2 tawhta Abeipa reithaina hla chakaona hneipa a cha hra. He liata pakha cha Krizyh mah leipa ei kha a vaw pakhyna a cha.

Tiwa Christian Mahila Hlapy

Tiwa Youth Group

Tiwa Awnanopazy ta SMC tawhta aza tlypazy paso kaw ei ta, ama zydua hnohta ama Traditional Kamsa hla chyu ei ta, daihti pha kawpa ta hmapa a cha. He Program liana heta Pihno Easter-no (Bawri), w/o. Evan Beihnia ta Marareih tawhta thai kawpa ta Assamese lata a palie lyma. 

Tiwa Krizyhpazy

He atlypahlaona chana heta KNP zy ta daihti reipi tawhta a vaw patohpatia ha ei ta, ama kyhpachana palasa nawpa ta chysia ama ky ngahaipazy pakhy ei ta, thokhazy ta Bajar liata athiehpazy chaleipa ei ta, a zydua ta Buara sykhao 8 (chysia zo 1000 hlei) he Tiwa liata Ngiapatuhpazy hnohta  hlapa a cha. Sykhao 2 cha Missing Field lata paphaopa a cha hra. Soh lata Rs. 5000/- nata Achhyna-o Maisah hnohky lata parai awpa poh ama hla hra. KTP chhao ta Rs. 1000/- ama hla hra.

KTP with Traditional Dress Presentation

Tiwa Krizyhpazy

Tiwa Krizyhpa Zawpi

Evan Z. Mathia(RIP) Thla

He apakhyna Service khai tawhta Evan. Z. Mathia (L) thla su liata thlahchhana daihti hmahpa cha ta, Mc. A.Zawngia ta chhihtha ta, no nata thyutliazy ta mothlih chhao ta he thlasu liana heta thlahchhana ama hnei. Evan. Z. Mathia he ko 1988 khata Tiwa chyhsa liata chakaona raihria awpa ta za tlo ta, ko 1994 liata cha ano liata tlah-leina vata Paw Khazohpa hnohta maniah a siesai hapa a cha. Ko 30 a chapa ta he khizaw a chakaona tawhta maniah a vaw pahasai haw.

He khai tawhta pati dohkhohpa ha heih ta, zala dawh pangawh vaw paro ta, pasai lei kawna chota Tiwa Evangelical Mission cha siesai awpa a vaw byuh ha heih. A siepa maihta paloh y kawpa ta daihti hmah pi ta, daihti maniah a daih lei hmeiseih. He liata hriatuhpa zydua hmia hmo khai pi ta, Evan S. Beihropahnie deikua tlah-leina vata a vaw hlao thei leipa ta, daihti a y leipa vata tly hma khao hra ma pi.

Thla liata he hawhna heta ropa a cha

Mission Field Chakaona Report nahthiepa liata alaluah viapa cha Mission Strategy pananopa a cha, tahpa a cha. Cha cha, atliata tawhna khata Preaching Station athiehpa 3 pahy ei ta, cha Station su tawhna chata Abeipa bie thatihpha chhona raihria pathaopa a cha. He liata su kha cha Evan. Z. Mathia daihti liata taolana ama pataona su, zyhna hropa azipazy ta thatihpha achhopa khoh leipa ei ta, patu ei ta, chahrypa ta noh 2 chhoh niedoh leipa ama sona su a cha. He Preaching Station pahy thiehpazy he eima rah la tawhta Awnanopazy tawhta baona ngachhapa ta sapazy ama cha tahpa a cha. 

He Mission Field liata hriatuhpazy heta thlahchhakheina nata eima baona angiah hmeiseih ei ta, la hla tawhta bie eima theipa nata a su lia cheingei tlopa ta hmopa cha a vaw pahlie hmeiseih. Chavata, eima zydua ta Abeipa pheithaby liata mietakupa aleipazy chhihthapa a cha thei nawpa ta eima thlahchhana liata kha bao ei suh u.