ECM Mission Field Thiehpa Pahy awpa ta Nopawzy nata Missionary Arunchal Pradesh la ama sie

ECM Mission Department ry liata Mission Field thiehpa, Arunachal Mission Field pahy awpa achhuahpa cha ta. Atahma he ECM Headquarters, Mission Board nopaw pathohzy cha Arunachal la ama pangai ngahai. He nopawzy he Rev. C. Beima, ES, Mission, Rev. Thylua Hlychho, Finance Officer nata Ex- ES, Mission, Macha S. Zaluaia, Member, Mission Committee zy ama cha. He hleikho ta he Mission Field liata hria awpa papalihzy chhao ama sie hra.

Rev. Thylua Hlychho nata Rev. C. Beima

He Mission Field pahy awpa he ama Survey-na tawh vaw rei ha ta, anodeikuala Mission Station awpa nata a o nata lyuzy he cha hawhta pasia mah leipa cha ta, atahma ama siena liana heta pasia pa awpa a cha, tahpa ta biedaopa a cha. Chavata, atahma ama siepa liana heta Awnanopa sahlao zydua amo chata thlahchha bao awpa ta ahaw ei ta. Asu nata a rah aryhna liata Mission Station paduapa a cha thei nawpa ta thlahchha bao ama ngiah kaw.

Arunachal Mission Field liata hria awpazy

He Mission Field liata hria awpa heta ECM ry liata Missionary rai a hria ngahaipa papalihzy cha hmia asah awpa ta raopa cha ei ta. Cha cha Evan. M. Lalnunhlima, Evan. FC. Ngokhe, Evan. N. Ngongia nata Evan. B. Melyzee zy ama cha. Amo he atliata liata NECTAR liata Cross-Cultural Missionary Training apatlopazy cha ei ta, Evan. M. Lalnunhlima nata Evan. C. Ngokhe zy he novah cha ei ta. Tiwa Mission Field liata ko reipi a vaw hriahapa ama cha. Chanota, Evan. N. Ngongia nata B. Melyjee zy he laihsa cha ei ta. Atliata liata Missionary chata la thiehpa ama cha. Amo chhao heta ECM Hqrs. nopawzy chhao atahma he Arunachal State la ama pangai ngahai.

Eima Missionary zy chata chhao eima thlahchhana liata kha athei ei suh vy.

Related Source: Atanoh NECTAR Missionary Graduation Day hmapa a cha