Dr. Hamlet Hlychho cha Rs. 3000.00 cheih awpa ta hriena piepa a cha (Updated)

ECM Headquarters, Siaha nata Dr. John Hamlet Hlychho likawh buana cha atanoh khata Siaha District Magistrate tawhta Sentenced Order papuapa a chapa hawhta biedaopa cha ta, cha biedaona ta a reina liata Dr. Hamlet Hlychho cha Rs. 3000.00 cheih awpa tahpa a cha. Patahna dah awpa deikua hmiala ta a vaw tah chiehpa angiapapa ta patah khao lei awpa ta, tahpa a cha.

Eima Post tuapa liata Puhpa Colin ta ECM Headquarters nopawzy nata Dr. Hamlet Hlychho liata aryhna taopa hawhta palasapa deikua thatih achu pasia tawhta aryhna taona y hlei vei tahpa biedaopa cha ta, Dr. Hamlet Hlychho chhao ta, aryhna taopa cha vei tahpa ta Facebook, Mara Christian Network liata tarinoh 23rd Jan. 2012 a reihpasia hra.

He thatih rona liata thata vaw rochhei ha pi ta, a reihtuhpazy nata Puhpa Dr. Hamlet Hlychho hnohta pachathaina eima haw chanei heih.

Palasapa liata FIR pangiatuhpazy moh palasapa liata rochheina kyh liata Maraland Post user zy hnohta nama pachathaina cha haw pi ta, moh palasaleipa (anynomous) ta a vaw ropa liata, "Rev.Dr.T.Laikai & Rev.Ch.Chhama & T.Lalsawmliana & K.Vanlalmawia zy ama cha," tahpa cha adoviapa a cha awpa ta pangiasapa a cha. 

He thatih (biebuana kyh) rona liata ahy tlyma achah viapa nata achah lei viapa hneipa ta rohpa cha leipa ta, anodeikuala thatih daona liata ECM Hqrs la tawhta bie eima dao thei viapa vata amo la tawhta pahnodah nata chho dah hawhta vaw so tyhpa cha ta, thatih asu khai leipa hluhpi a y thei aw. He liata Dr. Hamlet nata a chhohkhazy la tawhta pachana chhao y thei aw ta, ama pachathaina eima haw hra. He thatih he ahyrai ta eima pahno byuh kawpa, khiliah tiloh liata chhao rei chaipa a chapa vata eima pahnona rakhazy vaw soh tyh pi ta, Marasaw sai eima chapa vata adoleina nata asu leipa ypazy liata maniah nama pachathai nata eima pangiasa. 

Atahma cha biesiapa pahno theipa vaw cha ha ba ta, hmiala daihti eima sie lyma nawpa liata adyhryhna a y via lyma thei nawpa ta ahyrai ta hmahla ei sihla, pheibi thiehpa liata chaka awpa a chhuah ei suh u. Eima thlahchhana liata kha a thei ei sihla, Marasawzy he maluh hluh kawpa eima cha leipa vata sapa nata thlahpa liata thatlo kawpa ta sie thei leipa pi ta, chanota eima  chyh bailai ta Awnanopa nano nanopa a vaw duah tyhpa heta eima thari thata maniah chhawh ta, eima tha maniah a pachha tyh. Laki khih liata Baptist Awnanopa paduapa a cha tahpa Maraland.net liata palapa a cha nota Marasawzy palohpasana ao (comment) kha a thei ei sihla, atanoh ta Awnanopa hry liata aryh leina nata buana a vaw tlopa he a rah zawpi pachadah liata deikua pha a tah leipa a hluh viapa cha awpa alyu. Chavata, atahma he duasu liata palohrupa hmaohkha ta siekhoh thei hra vei ei sihla, hmiala daihti liata eima pohkha theina awpa ta eima zydua ta thlahchhana chota tei ei suh vy.