Maraland Post Ko Kha a vaw cha haw hra!

Maraland Post cha atanoh he ko kha a vaw tloh haw hra. Abeipa chhihthana vata a hmiatuachai ta Abeipa hnohta alyna bie reih hmeiseih na ta, ei ly ngaita kaw. Apahchaipa ta he Maraland Post a pasotuhpa nata atly tyhpazy hnohta alynabie cha hla ei na ta, chahleikho ta Maraland.net la tawhta comment nata pasopakanazy vata ama hnohta alynabie ei hla hra.

Rei hapa hawhta Computer achuna nata thaina hnei leipa ta keima kuphei chohkiahpa tawhta pahnopa tla cha ta, taodah (Design & Setting) liata chhao mohropazy hawhta angia kawpa ta tao thei leipa na ta, taotheipa hluhpi chhao tao thai hra va na. Chatahrasala, Marareih Literature khopahahna vata tao hnolo na ta, news ei pahno tlakaihpa nata Article nata Sermon zy reitlah cha kaw vei hra sala, soh lyh-lia tyh na ta, he hawhta ko kha a vaw cha thei hrapa he ei ly hmeiseih.

Ko kha chhohta tlytuhpa (pageviews) he maluh 7425 tlai vaw y hra ta, achahta cha noh khata maluh 100 hlei ta ama tly daihtizy a y tyh hra. He Blog he India rah tawhta tlytuhpa hluhchai tyh ei ta, khizaw rah nano nanopa tawhta tlytuhpazy kha eima hnei hrapa vata ei ly ngaita kaw. 

Achuna liata palohrupa zydua pie awpa abyuhpa vata daihti ruapa liata hleikho news nata article zy chhao update theileipa na ta, atahma chhochhi cha Exam awpa a chapa vata nata Thesis liata paloh zydua pie awpa abyuhpa vata Blog User zy hnohta nama pachathaina eima cha haw. Exam khaipataw nata yzie hnei viapa ta vaw update awpa a vaw chhuah na ta, article nata news zy chhao na vaw paphao thei ula, ei ly kaw aw.

Achhachaina liata nama deichhyna nata baona cha haw ei  na ta, achahta news zy thatih aki leipa nata asu ah kaw leipa ta papua daihti liata adoviapa tlao na vaw pahnosa tyh ula, pachaleina lata la leipa ta eima pado raihrie awpa ta ei cha haw ei. Ei chaly kaw ei

"Long Live Maraland, Maraland Post!!

By A.Zawngia, Editor