Shillong Awnanopa tawhta Palyupalihna sahchaipa ei dao haw hra

        Thla palih tlai Shillong khihpi nata Awnanopazy vaw puasai haw na ta, chahrasala zakhahnia pachyhno khata achuna vata ko palih chhoh ei vaw laihna rah cha vaw tlo thei heihpa vata  Abeipa hnohta alyna bie ei reih hmeihseih. Ei lohkhy viasa parohpazy hmia aly kawpa ta nata va ngaita kawpa ta a vaw hmo pi ta, eima vanazy a vaw pasa ngaita kaw. Bie lohhawhpazy reih pi ta, vana bie chha thei leipa ta; a pathlie thei'pa vaw cha vei.

         Chanota, my noh vaw chhi ta; "Meisah thlihhua pathlina su" tahpa ta ama rei tyhpa khihpi cha ei khapi ta a ziza a vaw nano ta. Zahkhania lachhah ava thata suah hra sala, zahnia my deikua cha ava, tilih hrohpa hawhta vaw hroh sili khai ta; kaw sai heih na ta, ava liata meihdo a zawhpa hmo awpa rai vaw y khao vei. Nochhi la tawhta nohchhi angia ngaita kawpa hmo na ta. Pyhlie ochhizy pahy na ta, ziza pathaih ngasapa cha a vaw ngia ta, thathyu kawpa ta Pahanoh Shillong Mara Church liata apakhy awpa ta achhuah pathao ha na ta.

         My dawh 10:15 liata Police Bazar liata Apakhyna su za tlo na ta, viasa hluhpi ta ama pangiasa lei kawpa ta ei hmia ei na vaw hmopa cha a vaw ly kaw ei ta, atlahna biezy a reih holo pi ta. Shillong liata Marasawzy taodah sakha cha zahnia la liata eima vaw hmo hapa chhao rai cha sala, apakhyna su liata eima vaw hmo heih nata "Good Morning" tahna ta atlahna bie eima reih tyhpa he a cha. Cha hawhna chata bielohhawhpa hluhpi chhao reih hma leipa ta Achhyna-o chhoh la cha angia haw pi ta.

         Thapha kawpa ta a ngia na ta, atyuh thlahha na ta. Ei hnabeiseihpa hawh tlai ta Palyupalihna "Ryucha" hla awpa a chana Local Secretary ta vaw phuah ta. He palyupalihna he SMC liata "Macha" nata "Chakaotuhpa" chakaona rai vaw hria hapa, achuna vata nata nietluana vata ama puasai tita ama pie tyhpa a cha. Keima chhao April thla liana khata pie ha awpa cha taraw na ta, anodeikuala khapa tlyma aryhpaoh leina vata piepa cha leipa na ta, Siaha liata ei yna ola ta na kaw paphao taraw ei ta, chahrasala SMC liata taodah tyhpa hawhta Pahanoh Apakhyna, zawpi hmiako liata cheingei dao awpa ei khohpa vata ei vaw la  khohleipa a cha.

         Chatanachata, Chairperson Mc. Henry Vabeibyhnasa ta Local Secretary, Mc. K. Beizalaihmo hnohta daihti hmah awpa hrua ta, Local Secretary ta Rev. L. Lychhua, Shillong Biatuhpa hrua heih ta. Cha hawhna chata Rev. L. Lychhua ta Ryucha nata hmobyh (percel) sakha cha ei na vaw hla haw. Ei ly ngaita kaw. Chairperson hnohta 5 min. bierei awpa hiah na ta, a paryhsana hawhta alyna biereina daihti ei hmah haw.

Apakhyna zawpi

He Apakhyna tawhta eima pai tawhta Mc. Sylvia Solo o liata ECM ta Missionary atuapa 6 zy, NECTAR liata ama Training patlopa a chapa vata apakyhna nata patidohkheinazy hnei ta, cha liata chhao a hlao lymapa ta Missionary a sie awpazy hnohta chhao pasyuna bietana chyupa chhao ei hnei hra.

Missionary Training patlo thiehpazy
(L-R: J. Amos, Beirona, Beipisa, Lamo, RTC Masangi, Beisunaw)

Missionary nata SMC Nopawzy

Atanoh daihti he ei daihti hmapa zydua liata daihti pachhoh chaipa khiah ma a cha, tah theipa a cha.

He ryucha ei daopa liata bie arohpa cha he hawhna heta a cha:

SHILLONG MARA CHURCH

(Photo)

APPRECIATION CERTIFICATE

Mc.A.ZAWNGIA

                   Shillong liata na y chhôta Shillong mara awnanopa chata,na 

        thaina,sona,hneina dei cha leipata na theina zydua ta vawhria lyma 

        chita,na cho liata eima ly ngaita kaw.

               Khazohpa baona vata BD (Bachelor of Divinity) vawpatlô thei

        chita,Shillong Mara Awnanopata eima chaly khei hmeisei,eima

        chaly kheina pamosana chata he charopa he eima cha hla.

              Khazohpata hmiala nasie lyma nawpa liata tha chapatlô sala

        cha hrobie lyma maw sy.

“ZISU KRISTA CHA ABEIPA ACHA”

      (Mc.S.THAHLO)                                         (Mc.K.BEIZALAIHMO)         Chairman                                                        Secretary

SHILLONG MARA CHURCH