Sunday, February 3, 2013

Shillong Mara Church a patlaw. Shillong United Mara Church paduapa ta a no-eih ta pakhyna hneipa a cha haw

Shillong Mara Church liata Mara saw zydua hmaohkha ta apakhy tyhpa cha, atahma ama pachhaih haw. Thatih daona ta a reina liata atahma he Abeipanoh ei no, a no-eih ta ama pakhyna a cha hapa ta bie daopa a cha.

He Awnanopa a thiehpa ta paduapa he "Shillong United Mara Church" (SUMC) tahpa ta moh bipa cha ta, Mc. St. Lakher (S. Thahlo) o, Happy Valley liata apakhyna hnei chypa a cha. He hawhta Awnanopa paduapa a chana chhapa, biedaona ta a reina liata cha a daihti lei kawpa ta Biatuhpa Pastor lapapuapa a chapa vata palohtlah leina tawhta paduapa hawhta reipa a cha.

He Mara Awnanopa thiehpa liata member a ypa zie pahno theipa cha leipa ta, anodeikuala atanoh apakhyna liata Member 46 ama pakhypa hawhta reipa cha ta, myla Dt. 4th Feb '13 khita KNP zy Emergency Meeting hnei aw ei ta, KNP branch paduana dah chhao rei awpa alyu kaw. Tawhla, KTP Branch chhao hata heihpa liata padua awpa hawhta ama reih hra. Atahma he SUMC liana heta Awnano chhituhpa pathoh (3) ama ypa hawhta biedaopa a cha hra.

He hawhta Awnanopa hmaohkha ta a sie tyhpa, hmo khapa vata lyma Awnanopa sahlaozy likawh liata ahmothai leina vaw y ta, a no-eih taihta apakhy hapa a vaw chapa he Shillong Mara Church liata vaw y hapazy ta pei tah ei ta, kheihta ma Mara sawzy ama pohkha heih thei aw, tahpa pachapa ta hmahla awpa ama chhuah nga kawpa ta biedaopa a cha hra.

Mara sawzy he khataihsu liata rai y ei sihla, eima pohkha kaw awpa a ngiah hmeiseih pi ta. Chi hluh kawpa nata lai kawpa cha leipa pi ta, chavata ahyrai ta Shillong Mara Awnanopa nata Mara sawzy ama vaw pohkha thei nawpa ta thlahchhana liata kha athei ei sihla, eima theinazy papuapa ta hmahla awpa a chhuah chyu ei suh u.

No comments: