Mohropa pachâpa ta rai pha kawpa hmâh châ hra vei sala, ei raizy bâsaipa ta nata lahpi nata chhâhkhazy siesaipa ta ECM zy liata "Pastor Pakha" châ thei hra awpa hnabeiseihpa ta ko 2008 liana khata John Roberts Theological Seminary, Shillong cha October noh 14 khata aza pazao hra na ta, chatanachata kô 3 nata a khophie tlai Bachelor of Divinity (B.D) a vaw chu na ta, Abeipa baona nata Awnanopa nata chhôhkhazy thlahchhâkheina zawhzi ta zakô April thlapa liata vaw patlô thei hra na ta, July thla chhâna lâta eima Result zy vaw puapa ta hlaotlohna ei hmopa vata ei ly ngaita kaw. Hnabeiseih kawpa ta ECM ta Pro-Pastor ama la awpa he vaw ha tyh na ta, châhrasala interview daihti vaw tlô ta, ei hnabeiseihpa saduthliena cha a hlaotloh thei khao vei! Pathôh la awpa liata pacharu ta hiah pi ta, kei cha lapa hry liata a hlao khao va na!
A hiatuhpa paru hry liata eima zydua ta hnabeiseihna eima hnei khai. Châhrasala eima Awnanopa ta dâh thiehpa vaw hmah pathao ha ta, hmialâ ta cha Awnanopa ta a sponsored-pa hry tawhta a patlôpa (graduate) hawhta Pro-Pastor Post tao chhyhpa châ tyh ta, atakô tawhta deikua cha hawhpa cha khao leipa ta pathôh (3) ngâlâh la awpa ama vaw tah haw. Chanota, a hiahpa pacharu tlai vaw y ha pi ta, lapa ama y nota la lei awpa eima vaw y haw. He he Pastor Committee liata Interview hneipa ta lapa a châ. Cha hawhta eima zydua ta hnabeiseihna eima hneipa hawhta keima chhao hnabeiseihna sâh kawpa hnei hra na ta.
Keima mopakha hnabeiseihna liata cha kô nata thla (uhtheina) liata kei he uhthei patlua kaw na ta, kei he kô 36 cha na ta, a hropazy he cha kô 30 a pha mâh leipa sai ama châ. He dei leipa ta atakô ta a patlâhpa hry liata keima ngâlâh he lahpi-saw a hnei hapa châ na ta, mohropazy cha satlia sai châ ei ta, hezy vâna heta eima Awnanopa nôpawzy ngiachhiena dao awpa hnabeiseih na ta, keima siana nata thaina vâta châ leipa ta ama khokheinazy ei to awpa ei hnabei a seih kaw. Cha hleikho ta kei cha ECM ry liata vaw hria hapa, Tripura Mission Field liata kô 3 vaw hria ha na ta, anodeikuala Theology achu awpa ei khona vâta a vaw pahâsai chypa châ na ta, Abeipa ta ary tah sala Pastor lâta ei ngia tita chhao Missionary ta sie heih awpa achhuahpa ei cha. Hezy vata chhao khokheina ei dao awpa ei pangiasa kaw.
Châhrasala, Interview pachhâ pi ta, Pastor Committee liata member zy nata a vaw tyh pi ta, thâtih ei vaw pahnopa cha "tloh leipa" hry liata ei vaw hlao haw. He thâtih ei pahno no heta ei lahpino chhao ei kiapah liata y hra ta, eima tha a vaw chhâ kaw. Hnabeidynazy ei palôh liata thata a vaw ngia ta, Abeipa chakaona rai hria via lymâ awpa ta thachhiena nata ngiarohnazy thata eina vaw pie. Keima mopakha apachâna liata cha 'thaina vata nata siana vata' khokhei awpa la châ hlei va na, tahpa apahno pasia na ta. Anodeikuala, zawpi vâtlâh pachâpa ta keima cha ama ngiachhiena vâ deita ta eima viasazy cha pha kaw hra ei sala, khokhei tuapa hry liata ei hlao nahta apangiasapa nata hnabeiseihpa deita ei châ. Ei viasazy chhao ta ama veih lata, "Nama la ama cha khokhei thlâh ha aw..." tahpa ta reih hra ei ta. Anodeikuala, Personal Interview hnei awpa ta a vaw ngia pi ta, ama hiahhrina tawhta "khokhei viapa châ va na; khokhei lei viapa ei châ" tahpa pahnona ei hnei pathao haw. A do kaw. Assembly nôpawzy nata Bia lâ tawhta Pastor Committee Member zy atyuh khai ei ta. Hiahhrina ataopazy cha Assembly nôpawzy tlâ châ ei ta, Bia lâ tawhta deikua la hiahhrina a taopa y hlei veih ei. Hiahhrina cha dusawta ta a kaw chhy na ta, ama hiahhrinazy tawhna chata keima cha na patypama awpa achhuahna y khiah ma, tah thei awpa pachânazy y ta. Châhrasala, ei theina zydua papuapa ta kaw pathlâ pazi tyh na ta. Keima mopakha pachâna liata cha ei kaw chhy pha kaw khiah ma, ei tah nota la leipa py liata ei hlao pyly.
Interview zydua hry liata hiahhrina a dao hluh chaipa châ na ta, achhy hluh chaipa chhao ei cha hra. Achhy hluhna nata phana tawhta thliepa ta 'mark' pie hapa châ mawh sala, keima kha 'mark' a hmo hluh chaipa ei cha awpa châ na ta. Anodeikuala, cha hawhta 'mark' ama piena dâh kha cha thlyu aw vei. 'Mark' ei hmo hluh leipa vata a tloh leipa tlao vaw cha na ta. Myla khih vaw deih ta, Pastor pakha ta na chho ta. 'Zahnia ta nama Interview-na liata vote ... zie hmo chi ta, nama cha vote leipa ta ei pangiasa viapazy cha....zy ama châ' tahpa na vaw chho ta. A nano tah hmeiseih na ta. Hmo a châ thai lei awpa ta ei pangiasapa hawhta tlao vaw cha haw ta. Ei no-ah hmeiseih. Anodeikuala, he hmo he cha eima reih via khia bua via aw, eima zyu ala via aw, tah theipa a châpa vâta tlao a chalihsai ta, pahnolei apachapa a pha viapa ta pahno na ta.
Kheihtarai châsala, hnabeiseihna chôta hâhkô daihti pha viapazy a vaw pahieh awpa ta hawhta hnabeiseihna tlao hnei hri awpa a pha viapa ta pahno na ta. Ato he Khazohpa ryhraona hawhta a pyh thai ta, palôh a patlâh awpa a pha tah na ta. Eima tloh leina daihti liata cha ahyzy tlyma maochhie awpazy khoh tyh pi ta, bai awpazy eima tlua tyh. Châhrasala, chazy cha hmo dopa châ beih vei. Ato he keimo châta Abeipa ta eima pha nawpa ryh raopa hawhta a pyh awpa abyuhpa ta pahno na ta, a pyh hra na ta. Ei viasa Probationary Pastor chata ama lapazy cha ei palôhru hmeiseihpa ta tlao alykhei ei na ta. Amo cha keima hlata Pastor châta pha viapa, a thai viapa nata a tlâh châ viapa, eima Awnanopa châta chhao pha via awpa ama châpa ta pahno na ta, ei tovyuh liata tlao ei palôhtlah a vaw tlâh kaw heih.
Keima cha, Awnanopazy ta Siaha Vaihpi Child Development Center liata bao chy awpa hawhta eina hawna cha a hlao chyh hra sala (thla 1 ta Rs. 6000/- ei hlao), sôh nata phusa vata rai hriapa châ leipa na ta. Ama ngiahna hawhta tao awpa nata maohphaonazy cha tlao ei theina zydua papuapa ta hria hualua awpa ei châ. Abeipa ta he tovyuh nata maohphaona eina piepa liana heta aly kawpa ta hria awpa thazei kawna chôta palôh tlao ei tao haw heih.
(He article he ECM ta 2013 liata Probationary Pastor post 3 ama pahyna daihti liata hiah hra na ta, ei tloh leina daihti liata ei ropa a châ. Atanoh ei vaw phuazahpa a cha. Kô 2014 liata Interview liata deikua cha awnanopa nôpawzy khokhei topa ta )
No comments:
Post a Comment