Ei khitlyna - chiatlao chiavoh nata chhutla chakhâ

Salyu hleiri chichih ngaitapa

Abeipa chakaona rai he keimo ngiaryhna zie ta hria thai awpa châ leipa ta, hoh daihti tlyma, hoh leina daihti liata tlyma, rei thai awpa châ hra vei. Keima khozie ta châ sala, "Abeipa, Lopu Bia lia châ leipa ta su hro lâzy châ thei sala, âryh na tah khiahta la.." ei tah thlâh ha nahta ei pangiasa. Châhrasala, keima khozie châ leipa ta, ngiaryhna dâh châ hra leipa ta maniah tuahtuhpa khozie a châ hapa vâta keimo ta rei thei awpa sâkha hmâh hnei ma pi. Maniah tuahtuhpa khopa taopa cha eima pati pahâh chaipa a châ awpa tlao châ tlôh ta. Kheihhawhpa rai rai châ sala, kheihhawhpa su liata rai châ sala, "Amen" eima tah awpa a byuh.

Lopu Pastor Bia liata ei y awpa he, biedopa reipa ta cha ei ngiaroh hmeiseih. Anodeikuala, Abeipa baona vâta kô 2 hlei vaw y haw na ta, Abeipa ta eina chhihthana dâhzy ei pachâ nahta a nano tah na ta, a rôhnah ei tah kaw tyh. Rei awpa hluhpi y ta, atahmâ he ei khitlyna - Chiatlao chiavoh nata chutla chakhâ lâthlôh thâtih a chyhta palâsa awpa ei khoh kaw.

1. Sao daihti liata phei ta sie tyh awpa a byuh - Atahmâ khizaw liata cha eima khitlyna he mawtaw sai ta sie pi ta, phei sie khao ma pi tah thei awpa a châ. Anodeikuala, su thokha cha sao daihti liata cha mawtaw sie thei leipa ta, phei ta sie awpa a byuh tyh. Lopu chhao cha hawhpa cha a châ hra. Ko 2017 liata cha Laki tawhta mawtaw vâro azu pi ta, phei ta dawh 3 chhôh eima sie tyh. A châhta deikua Laki tawhta Lopu tlôna taihta phei ta eima siena daihti a y hra. Laki tawhta Lopu he dawh 7 chhôh sie pi ta, Lopu tawhta Laki lâ khyna daihti liata cha dawh 7 nata a khophie eima sie tyh. Sao nota cha mawtaw rai ta a ngia leipa vâta Bia chahlôpa chhao phei ta sie tyh pi ta, eima khitlyna cha chiatlao chiavoh hry liata siepa a châpa hleikhô ta Salyu chavah nata Tolyu chavah tilaipa eima chaka tyh.

Chiatlao chakapa ta eima khitlyna

Hezy he ei pachâ na ta, keima châta my thei lei awpa sai tlao a vaw châ. Keima he chiehvei hr'aw sala, Abeipa ta na hmâh ta tha eina patlô tyh. Hru kaw hra sala, sona na pie ta; dyutlai vei hr'aw sala ano ta khâ eina bao tyh. He zydua he tha na patlôtuhpa Krista zawhzi ta ei tao theipa a châ.

2. Baotuhpa Noahchhihpa - Lopu Biatuhpa châta cha pheita Bia chahlô tyh awpa a byuhpa he rairuna lai kawpa a châ tlai. Bia chahlô awpa ta phei ta sie awpa a vaw châ nahta cha keima mopakha deita ta sie awpa vaw châ thai khao leipa ta, mohropa deichhytuhpa eima ngiah ha tyh. Awnanopa maluh hluh kaw hra ei sih la, maniah deichhy awpa he vaw sôh kaw tyh ei ta, Khaikhy lâ chhochhi cha keima deita tlai ei no ei thôh tlai ei vaw sie haw hra. Cha hawhta a châpa vâta chyhsa nano nanopazy ta na vaw deichhy haw ei ta, keima châta cha he hawhta na deichhytuhpazy hleikhô ta a sôh viapa rai vaw y veih ei. A châhta la, hnabeiseihpa leipazy tawhta deichhyna tlao hmô tyh na ta. Chyhsa thatlôpa hluhpi ama y tarawpa ta nô chieh lei kawpa ta pachâpa nata paw chieh lei ngaitapazy he tlao na deichhy chaipazy ama vaw châ tyh.

He ei khitlyna lâthlôh he eima awnanopa liata chakaotuhpa hmiatuapazy chakaona nahta pakho khi chhao châ leipa ta, reikhi chhao tloh hra vei. Pachâ tyh na ta, Kraws Pheisaih hmiatuapazy nata eima Pastor hmiatuapazy ama piepasana nata ama chakaona a rôhnah tah na ta, thyuheihna noh liata ama lakhozy kha tluta ma a rôhnah aw vâ tly i! Pachâ thei va na. Keima chhao he Krista thâtihpha vâta a palopa ei taona zy, thlohhmia nata chava mali hry liata ei khitlyna vâta ei lyma awpa he mohropazy hlâta a chyhta chhâ a hluh via cheingei nah ta hnabeiseih na ta, atahmâ he Krista moh vâta riethei a chyhta ei tao thei hrapa vâta tlao ei ly ngaita kaw.

Abeipa moh cha tlyzaw ta reithaipa ta y mawh sy !

Tovyu Chavah Tilaipa chaka awpa a byuh tyh

Salyu Chavah tilaipa vata Hleiri eima hli. Hleiri he chy kaw bâ ta chi a chhih kaw.

Mc. HV. Hrabei nata Mc. Z. Kaivo zy ta Miepu la Aug 24-26, 2019 nota Bia ei chahlo nota eina zi ei.

Pihnô T. Chhawni nata Pihnô B. Heiki zy ta Khaikhy lâ Aug 31-Sept. 2, 2019 nohta eina zi ei