Mizo Hnam Inpumkhatna atan “Unity in Diversity”

                                                                                            By A.Zawngia, Shillong

            Vanglaini Chanchinbua Article te hi chhiar a manhla thei hle mai. Tunhnaiah pawh hnam inpumkhatna lam hawi zawnga ziak hmu tur a lo awm ve nual a, ziaktuten ngaihdan hrang hrang an nei ve avang hian a chang chuan inpumkhatna kan duh luat avangin kan inpumkhatna tha tak te a lo chhe mai ang aw, tih ngaihtuahna te a lo piang a. Chutiang lam hawi zawng ziak zingah Dr. Lalchhuawma Tochhawng ziak, “Mizo hnam inpumkhatna” Dt.31 March 2011 leh “Mizo hnam inpumkhatna (Part-II)” Dt. 04 April 2011 te hi tlem sawi ve a tulin ka hria.

 

            Dr. Lalchhuanawma Tochhawng hian Mizo Hnam Inpumkhatna tura a thlir dan leh a duhthusam hi hriat a har hle. A hmasa zawka a thuziakah chuan, “Mizo” tih huam tur hian a zau thei ang ber, zohnathlak zawng zawng huam thei se, tawng chungchangah pawh “Mizotawng” tih hian Lusai-tawng chauh huam lovin, Mizo Hnamina a huam zawng zawngte tawng huam thei se, a ti a. Hei hi chu ngaihtuahna zau tak a ni a, inpumkhatna tura a duhthusam (ideal) pawh (zohnathlak) hnam hrang hrang te len theihna tur a ni a, a tha hle. “Miin a pianpui tawnga hman hian tumahin kan sawisel thei lo” a tih te hi ngaihthlak a nuam hle.

            “Mizo Hnam Inpumkhatna (Part-II)” ah erawh a ngaihdan tlem a lo dang hret emaw ni chu aw, tih theih a ni a, “Mahni chi bil puala engkim tih tum tlat te, chi bing rilru hmanga infuih ngat ngat duh te, chi bing rilru nen chauha Pathian meuh pawh biak tum tlatte pawh an awm niin a lang. Hnam thenkhat, kohhran meuh pawh chi bing puala neih tum tlatte…” a rawn tih leh si a, hriatthiam ta hle. Chi leh hnam puala thil tih leh Kohhran din te a rawn sawisel hi sawih loh tur a sawi tlatin ka hria.

            Khawvelah hian hnam lian leh te sang tam tak a awm a, ‘mahni hnam pual thil tih loh tur’ tih emaw, ‘mahni tawng hman loh tur’ tih hi hriat tur a vang hle. Muslim sakhua zuite hi keini Christian kalphung hi a inang lo hle a. Keini Christian te chuan Pathian kan biak dan hi mahni tawng ngeiin a biak thei a, hnam pual a ni emaw, eng ang pawl ang pawhin Kohhran hi a din thei a ni; tuman kan insawisel ngai lo. Chu chu “Unity in Diversity” kan ti thei ang. Muslim ho ve thung chuan, Arabic tawng ngeiin Pathian biak tur a ni a, incheidante (Dress Code) chenin he pawl hian dan a nei a ni. Chuvang chuan, Muslim ho inpumkhatna hi “Unity in Uniformity” kan ti thei awm e.

            India ramah hian State leh Union Territory-in ram thenhran a ni a, State/UT pakhat huam chhungah pawh hnam chi hrang hrang a awm theuh. Entirnan, Assam State-ah Assamese ho chauh an awm lova, Bangali, Hmar, Biate, Naga, Karbi, etc. an awm. Mahse, a tam ber Assamese hovin, “mahni hnam pualin thil inti tawh lovang, tawng chungchang pawh Assamese chauh kan hmang tur a ni” tih ta se, hnam dangten an pawmpui thei hauh lovang. Amaherawh chu, Assam State-a mi chengte leh hnam ziahna ah erawh tel ngei ngei tur a ni. Hnam inpumkhatna pawh “Unity in Uniformity” a ni dawn chuan “buaina” a ni ang a, chu ai chuan, “Unity in Diversity” a ni erawh chuan an lungrualpui thei vek ang.

            Chutiang tho chu a ni, Mizoram pawh hian hnam inpumkhatna hi “Unity in Uniformity” kan ti chuan thil thei a ni lovang. Mizotawng atan Lusai tawng chauh kan pawm chhung chuan Chakma te, Mara te, Lai te, Hmar te tan “Mizo nih” chu thil har tak a ni.

            Sawi tak angin, India ramah hian “Hnam” leh “Tawng” sang chuang a awm, mahse inti “Mizo” viau ho anga hnam dang leh tawng dang ngai thei miah lo hi an vang hle. India ram khawilaiah pawh ka “Mara” tawng hi hmang ila, an sawisel ve ngai lo. Ka pianpui tawng a ni avangin mi an zahsak ve hlawm a, kei pawh tu tawng mah ka sawisel ve hek lo. Mizoramah chauh ni, kan tawng leh hnam hi sawisel a ni fona ram leh hmun chu. Aizawla College ka kal lai vel te kha, ka “Mara” tawng hman avang leh “Mizo” tawng ka thiam lo avanga harsatna ka tawh zozaite kha, sawi nawn fo chi pawh a ni lo; hnam inpumkhatna ti chhe thei a ni zawk tlat.

            Ti takah chuan, “India ramah hian Hindi tawng chauh hi kan hmang tawh tur a ni; a hmang duh loh leh hmang theih loh reng reng chu ‘vuak’ tur” tih ni se, Mizo ho hian a duh lo ber leh an vuak hnem ber an ni ang. “Pathian pawh mahni hnam pualin in be thei lovang, Kohhran pawh din theih a ni lovang” tih ni ta se, a buai ber tur chu Mizo ho an ni ngei ang. Pialtlepa li luh ang a ni ang.

            Tin “Vanramah eng chi leh hnam mah hi kan chhawm dawn reng reng lo” a tih hi, tawngkam awmze nei lo, ‘mi deuhsawhna tawngkam’ a ni a, hei hi chin than atan tha lo tak niin ka hria. Pathian chuan ‘Hnam tinte, chi tinte, tawng tinte...’ hi pawmpui an ni vek zawk (Thupuan 5:9-10; 13:7; 14:6 te hi lo chhiar ve se).

            Ka ngaih ve danah chuan ‘inpumkhatna’ hi thil hote a ni. Hnam dang tawng leh culture kan zahsak te, han hlutsak der ve te, Chhiatni thatnia kan inbuaipui tawnte, inkhawmpui nikhuaa kan inpalaitawnte, MSU Membership Fee kan pek te, thisen pek a lo tul changa kan intanpui tawnte, thenawmte nena induhsak taka chawhmeh kan insuahte, ‘i va fel ve’ kan inti luam luamte, ‘i kawr chu a va nalh ve a!’ tia kan infakder tawnte hian rin aiin inpumkhatna min siam zawk.

            Engpawhnise, hnam inpumkhatna hi “Unity in Uniformity” ah zawng lovin, “Unity in Diversity” ah i zawng zawk ang u. Hnam pual leh bil leh bing a ni emaw, i buai lovang u. Eng hnam leh tawng pawh nih rawh se, zahsak ila, i sawisel lovang u. Mizoramah hian vawiin thlengin “Hnam” avangin buaina lian tham kan la tawng hlei nem; kan thenawm Manipur te ‘hnam leh hnam’ inhmuthiam loh avanga buainate thlir ila, kan inpumkhatna hlutzia i hre thar leh ang u. ‘Peace Award’ dawng ngat leh State ralmuang ber nihna vawngtu “Mizoram” a la nih hi a lawmawm hle zawk lo maw? Inpumkhatna kan duh luat avangin ‘Keipui mu hle hle’ kan kaitho vai chuan, buai lohna turah kan buai zawk palh hlauh dah ang e.

(Article hi Vanglaini Nitin Chanchinbu-a chhuah tur atana ka ziah a ni a. Mahse, thawn ta lem lovin he Blogah hian ka lo chhuah tawh zawk a ni. By A.Zawngia)