Shillong KNP ta Evan James Thansanga nata Lalnunthari zy pathliena daihti hmah

ECM Mission, Tiwa Field, Assam liata ko hrawhhlei vaw hriahapa, Evan James Thansanga nata a lahpino, Pihno Lalnunthari zy cha Tiwa Mission liata ama chakaona tawhta Tripura Mission Field lata chakaona raihria pazi awpa ta pasiepa cha ei ta. Tripura liata ama yna su awpa patohpatia chhoh ta Shillong liata ama pawhrahpa o liata a kaw paha chy ei ta, atahma Pakhynoh heta ama chakaona awpa su la sie awpa ama chapa vata atanoh Shillong KNP Branch ta thlahchhana daihtizy hmakhei ei ta, amo pathliena daihti zala khata hmapa a cha.

                Shillong KNP zy he padua thiehpa, member chyhta yna hmah cha hra ei sala, ama theina rakha ta Abeipa chakaona raihria lyma hra ei ta. Atanoh he Evan James Thansanga nata chhohkha he Shillong KNP ta cha ama sahlao hawhta pacha ei ta, chavata chakaona la sie awpa ama chapa vata amo maohphaona hawhta pacha ei ta, thlahchhanazy hneipa ta ama sievawna liata hma awpa chata ama hneina chyhta tawhta phusa tlaw 500 ama bao hra.

                KNP Adviser Mc A.Zawngia ta daihti chhihtha ta, “Namo chhohkha cha Shillong Awnanopa ta keimo eih viapa, eima Awnanopa tawhta Missionary hawhta eima cha pachapa cha ei chi ta. Rairuna nama tyh daihti liata tlyma, alyna daihti liata tlyma, a hmiatua ta nama Awnanopa Shillong Mara Church hnohta kachhiena hnei leipa nama vaw tlokhei tyh awpa ta bie cha ta pi ta. Namo chata Awnanopa ta thlah kha eima cha chhakhei tahpa kha a vaw thei thlahha muh vy,” tahpa a bietana a hnei hra.

                Pihno Lalnunthari he New Life English Schhol, Tiwa Mission Field liata Principal ta daihti reipi vaw hria hapa cha ta. Atahma deikua cha Mission hro la pasie awpa ama cha hapa vata Evangelist rai a hria awpa hawhta a pacha. Pihno Lalnunthari ta Shillong KNP zy veiseih palohhah kawpa ta thlahchhana ama hneina liata aly ngaita kaw ta, hmiala ama chakaona awpa liata thlah kha chhakhei lyma awpa ta a haw hra.