Shillong KTP ta Music Video Shooting Hneipa patlo haw

Atako ECM KTP Headquarters ta KTP Branch zydua hnohta Music Video tao chyu awpa ta pahnosana a taopa hawhta Shillong Mara Church KTP Branch zy chhao Music Video tao hra ei ta, atahma cha Video Shooting ama hneipa cha ama patlo haw, tahpa President, Chktp. C. Henry Vabeibyhnasa tawhta biedaopa a cha.

Music Video taopa he Director, Mc. Sylvia Solo chhihthana ry liata taopa cha ta, KTP zy heta Shillong nata a chheipah su nano nanopa liata Shooting ama hnei. Scenery angia kawpa hmah awpa ta Barapani latazy chhao Shooting hneipa cha ta, Barapani liata Shooting ama za hneina liana heta Picnic chhao hneipa cha ta, thyutliazy ama ly ngaita kaw. He Shooting-cum-Picnic ama hneina liana heta SMC liata nopaw thokha - Rev. Pheitha Lava nata Mc. VT. Ismael, Local Secretary zy chhao ama za hlaokhei hra.

He Barapani liata Picnic ama hneina liana heta Pihno Vasti, President, KNP ta KTP zy nie awpa sapha zydua a vaw tohpa ta, KTP zy ta ama ly kaw tahpa Maraland Post ama chho.

Atahma he Shooting ama hneipa cha pangohpa cha haw ta, Editing tao awpa ta atahma he ama ha thlahha. Atahma thlapa liata patlo ta, thlah heihpa Phiapi thla liata cha Headquarters la paphao hma awpa ama chhuah.

KTP zy heta Rahzohpa lachhah aheihpa hla sa ei ta, ama hla chhao a pha kaw. Ama patohpatiana liata taopha chaipa a chhuah ei ta, ama theina zydua ama papua. Ama Release nawpa ngiatiah achhih lei kaw.