Chapi Assembly Bielohhawhpa nata Hmotlopa Thokhazy

Chapi Assembly 2011 he Assembly hropazy hlata a nanona a y holo. Ngiatlah cha kawpa a y nota, Assembly daihti liata vaduana atyhpanazy thata tlo ta, thatih lyypa nata pacharohna ta maniah a chado.

Assembly biepathlupa peimawh viapazy

                Palasa hapa hawhta Sr. Executive Secretary nata Executive Secretary i/c Mission, etc. a ualuapa atlyh chaneipa cha ei ta, Executive Secretary i/c Education chata deikua athiehpa ta Rev. VL Ngaia Hlychho atlyhpa a cha. Moderator Elect chata Rev. NC Vabeilua atlyhpa a cha hra.

·         Budget chata Rs. 935.92 Lakhs passed-pa cha ta, Zako ta Budget hlata Rs. 200Lakhs ta a poh baichhi.

·         Pro. Pastor 2 – S. Vabeikhokhei nata Beizaw chahnaopa ipa cha ei ta, Pro. Pastor chata athiehpa 3 – NC Beihrosia, Tisi; M. Beipisa, Zyhno nata LV BeiDavi, Chhaolo zy lapa ama cha. C. Parte d/o Rev. C. Beima chhao Headmistress, New Life School, Missing Mission Field liata hria awpa ta lapa a cha hra.

Bielohhawhpa Ngiatlah chapazy

·         Chapi liata Assembly patlo awpa heta Awnanopa nata khitlah ta reiraoh kawpa nata thathyu kawpa ta apatohpatia ei ta, Pandal sa nawpa tlai ta, tho hluhpi pa-asapa cha ta, pandal chhao a pha kawpa dei cha leipa ta a ngia kaw. Ama khih chheipah liata ypa Mawhro khihtlah ta chhao Chapi Assembly tlo awpa vata kyh toti liata bao ei ta, ramawh lachhah peimawhpa amo ta ama buakhei khai tahpa biedaopa a cha.

·         Assembly a hlaopa zydua ta ama rei chaipa cha Chapi mo “veiseihna” a cha. Mara hrozi dota atahma Assembly liata hmopa a cha, ama tah. Thokhazy ta Chapi mo veiseihna he khihropazy hlata a sah viana ama tah. Pati doh nota o hneituhpazy cha khichhaizy chahlo cha-eipa ta ama byuhpa nata ngiahpa maih pie ei ta, khichhaizy kachhie lei nawpa ta bielohhawhpa reikhei ei ta, “ngiaryh” ama pachhih dah la! tahpa ta bah leipa ta ama reih.

·         Eima Missionary hnohchaipa, atanoh taihta Mararah liata kha maniah pahra lahpa cha ko hluhpi ECM puasaipa ta Assembly ahlao khao lei tawhta atahma Assembly he ama novah ta ama hlao heihna a chapa vata a “rohnah” viapahchai, ama tah. Nohchareih ta nohthla alakheipa chie leipa ei ta, thokha ta aduahna chota lakhei khoh ei ta, thokha atyuhpa ta. Red Carpet lachhah alohhawh ngaita kaw ta, thokhazy la ama hryuh daihmapa nga kaw na, ama tah. Thokha ta amo deisai ta, thokha ta apy ta. “Khizaw liata nohthlah mo nano nanopazy ta ama lakhei chaipa Record” cha thei awpa taihta ama pangiasa.

·         Assembly patohpatiapa a cha no heta, Chapi Awnanopazy ta Achhyna-o kiapah liata “Lorrain Cottage” tao ei ta, o sakha Missionary hnochaipazy Chapi ama tlo tita ama tlokiah nawpa tao ei ta, cha liata bei-phiah nata hmobyuhpa zydua soh ei ta, cha cottage liata Missionary zy  cha ahyhmah pabua leipa ta thadah kawpa ta patlosapa ama cha. Thatih daona liata KNP (H) chhihthatuhpazy ama pahneituhsa kaw na, tahpa reipa a cha.

·         Chapi Assembly liana heta khichhai sahno hlei tlo ei ta, 421 zy cha ryureihpa ama cha, ama tah. Nochhi lata Marasawzy chhao thata ama zatlo hra. He khichhaizy heta abyuhna dah hawhta khichhoh mozy bao hra ei ta, aviapahchaipa ta “Pino Vaili” nohthlahpa lakheina liata ama bua kaw sai, ama tah.

·         Chapi khih machhua liata Evan. Ebi nata Dr. Sasa zy ta Mission ama paduapa chhao Assembly chata apahy kaw ei ta, ryureihpa zydua chata zapati (Dinner) ama chhuahnohpa hra. Amo he Phesaih Camp hawhta Lane ta ama y, ama tah.

·         KNP Perspectives la tawh saipa ta, Headquarters liata chhihthatuhpazy cha ryureina maihta daihti a thaona tawhta achhana taihta phahnai ngiah kawpa ta atyuh lyma ei ta, Pro. Pastor zy atyuna la a ruana daihti a hluh via na, ama tah.

·         Ryureina vaw chha ta, pakhy bah ei ta, pati niena daihti likawh liata thyutliapazy chata Pandal liata hlasathaipazy hla pasasa ei ta, thyutlia nata khichhaizy ama yru hma vei, daihti a chha awpa ama pasaih lei ngaita kaw na, ama tah.

                Ama reipa hluhpi a y, atahma ta palasapazy cha a zawpi lachhah saina tawhta lapakhypazy ama cha.

Vaduana atyhnazy

                Atahma hata vaw siehapa liata eima rah liata vaduana atyhpa ama hluh kaw.

·         Puhpa S. Beihneisia s/o Mc S. Lyhmo nata N. Beingachha cha Dt. 25. 2. 2011 khata Alto Car ta  Meisavaih, BRTF Road liata ahluah ei ta, a su liata hrona ama pano ama pahlei. He vana heta Siaha Local Church nopawzy nata ama chhohkha sanawh thokhazy Assembly chhao hmah patlo hma leipa ta Siaha la ama kaw sie haw.

·         Satlia B. Laihaw cha Assembly daihti chhoh Pahanoh za (Dt. 27.2. 2011) Puhpa M. Faka nata a viasapazy ta thata tu ei ta, pachachhie a chhih kawpa ta Siaha thohna-o su la kaw pangaikhei ei ta, chahrasala Siaha Civil Hospital liata mohhoh awpa ama nga leipa vata Aizawl siekheipa a cha.

·         Zahnia Dt. 28.2.2011 khata Kiasie khih tawhta Chapi Assembly ahlaopazy khih la ama kuana liata vaduana atyh heih hra ei ta. A su liata Puhpa S. Papa, Headteacher, Primary cha asu liata hrona a pahlei. A hropa papalih(4) chhao ama chhuh pasa kaw.

·         Atamy 8:30 rachhoh khata Tisi – Siaha Sumo cha Amobyuh Khihthieh (Zero khih) khota liata a pie pasi heih hra ta, chyhsa pasari (7) kiah ei ta, ama vaduana kaw tarawpa ta achhuhpasapa nata hrona apahleipa y hraoh vei.

                Vaduana atyhpazy chata Maraland Post ta pei ta pi ta, vaduana vata he khizaw a puasai hapa chhohkha hnohta Abeipa ta thlaloh rie pie awpa ta, thlah kha chhakhei pi ta. Hma a hmopazy chata chhao tlahna hmia ama hmo heih thei nawpa ta Abeipa lata thlah kha eima chhakhei hra. Maraland Post paso kawpa ta a reih tyhpazy hnohta chhao he vaduana atyhpa nata ama chhohkhazy chata thlah kha chhakhei hra awpa ta eima cha haw.
(NB: Davi, C. Parte, Beihrosia nata Beizaw zy he ama official moh pahno pasia leipa pi ta, pahnona dah hawhta tla eima vaw soh chy. Pahnopasia tita eima vaw edit pakhua aw.)

Related souces:

maraland.net

Saiha Herald News