Mizoram Baptist ta Chano Pastor hnei thei mah vei, Chano Mahcha deikua 15 a hnei

                Atamy The Zozam Times thatihbu puapa liata Baptist Church of Mizoram (BCM) Assembly hnei  ngahaipa thatih vaw palasa  ta, he pakhypi liata zawpi ta thatih ama sai chaipa Dr. RL Hnuni, Principal, AICS Ordination chochah chhao palasapa a cha. Atahma BCM Assembly liana chhao heta Pino RL Hnuni cha pastor chata chahnaopa-I awpa a ryh ta heih mah vei. Chahrasala chano Mahcha ta chahnaopa-ipa deikua 14 ama y tahpa ta apalasa.

                Atahma he Mawrah chhoh liata Awnanopazy ta chano Pastor hnei awpa he paryhsa thei mah leipa ei ta, Awnanopa lai viapa ta reipa Presbyrian Church of Mizoram (PCM), BCM nata ECM zy heta chano Theology a patlo hapa chano hluhpi hneipa ta, Awnanopa ry liata a hria ngahaipa hluhpi hnei hra sala Pastor chata chahnaopa-i awpa deikua rairu tah chypa alyu kaw. Atahma ta BCM zy he ei khana cha leipa ta, ei hluhpi Dr. HL Hnuni he chahnaopa-i awpa ta pachana nata khona a y haw taraw. He no heta Presbyterian Kohhran Hmeichhia zy chhao ta atliata liata ama pakhypi Kawnpui liata ama hneina liata Chano Pastor cha thei ba hra sala tahpa ama khona ama vaw pathlu heih hra.

                Mararah Awnanopa liata Mara Evangelical Church (MEC) ta hmah tlao vaw sie kaw ei ta, Mawrah liata chano Pastor cha awpa ta rairu kawpa hawhta ama pacha nota, atahma he Chano Pastor tlao ama vaw hnei ha. Pakhazie tlai ma ama hnei tahpa deikua pahno pasia thei mah leipa pi ta, chahrasala ama Rev. Maiki cha Awnanopa ta ku-phei chaipa a hmapa a cha tahpa eima pahno. Cha nota, Evangelical Church of Maraland (ECM) deikua cha Ordination he a hnia awpa lyu mah leipa ta, Theology apatlo hapazy chhao hmiala ta ama hlao Basic Pay nata Allownce liata Pro-Pastor a hnai viapa ta pie tyhpa cha, atako tawhta cha chapawzy nata akhopa ta pie awpa ta reina a y (he he biehnohchaipa pahno khao leipa pi ta, pei eima tah kaw).

                Khizaw rah hropazy duasu saipa ta Awnanopa liata  chano duasu he Socio-Cultural duasu hawhta a nano lyma hra ta, anodeikuala Awnanopa hluh viapazy pachadah liata Chano ama chapa vata mohnao awpa cha leipa ei ta, eima mopahnai via awpa cha hra veih ei, tahpa pachana ama vaw hnei nga kaw ba. Khazohpa ta chyhsapa atao no daihti liata ‘Ano lyupa’ (image of God) nata Ano hawhpa (in his likeness)  ta maniah tao ta (Athaona 1:26), he vata Chano chhao he Chapaw hawhta Khazohpa Lyupa nata Ano hawhpa pyly na ama cha hra, tahpa pachuna y ta, rah hluhpi nata Awnanopa hluhpi liata cha chano duasu he chapaw duasu nata alyupa ta piepa a cha hra. India Mawnochhi rah liata Nagaland liata Awnanopa hluhpi cha atahma chano chhao Pastor chana piepa cha ei ta, Meghalaya liata deikua chano Pastor cha awpa a hnia mah  hra vei

Source: The Zozam Times