Dr. Hamlet, Pa-u nata Beisa zy Tlah leipa ei ta, B. Laihaw deikua pha viana la a pangai

                Dr. Hamlet Hlychho cha thisaih sahpa pasana vata Siaha Civil Hospital liata tari noh 21, Hmypi thlapa liana khata kaw sopa cha ta, anodeikuala ano ta angiahpa thohnazy a y leipa vata o lata a mohhoh awpa ta tari noh 25 khata papuapa cha ta, a duasu he Siaha Thohna o liata mohhoh thei awpa a cha leipa vata Aizawl lata tlyma, Lolei lata tlyma siekhei awpa ta pachaopa (Referred) a cha. Medical Referred-pa a chapa vata atanoh he District Magistrate liata Court aw ta. Myla a cha vei khia hanoh liata cha thona supi viapa pangai awpa ta Siaha a puasai aw.

                Dr. Hamlet he thisaih thlohpa (Blood Sugar) pasana he ko reipi tawhta vaw hnei ha ta. Siaha District Jail liata a y tawhta chakaonazy thata hnei tyh ta. Cha hleikho ta niebawzy chhao khodah hawhta a cha thei khao leipa vata a thisaih he a vaw sah heihpa hawhta a  reih.

                He hawhta a cha nota ano hawhta patah hra Puhpa Beisa nata Puhpa Pa-u chhao tlah leipa ei ta, Civil Hospital lata sopa ama cha tarawpa ta atliata liata Accident atyhpazy thata ama vaw sopa vata amo deikua cha Jail lata ama zu pakhua lilaw ha heih.

                Ama zydua ta pasana ama tlah leina kyh Dr. Hamlet ta reih ta, “Noh chareih ta chakaona (apakhyna)  ei thoh lyma hneipa cha ta, Sermon nata Abeipa reithaina hla sapa ta apakhyna eima hnei tyh. He chakaona vana heta mokuh saih pi ta, achah ta kahvi leipa ta thlahchhana hnei tyhpa cha ta, chanota nie phapa eima nie thei heih leipa vata eima pavyh nata sapa taihta a vaw hria hapa a cha thei ngyu aw, “ tahpa ta a reih.

                Hiahhrina achhypa ta Dr. Hamlet ta reih ta, “Puhpa Pa-u nata Beisa he cha Bail ama hiah khiata cha pua thei awpa duasu liata a duah ei ta, chahrasala amo heta Bail hiah awpa lyu vei ei. Biedopa alana taihta y lyma awpa pha ama tah via,” tahpa ta a reih hra.

                He nota atliata liata palasapa Chapi Assembly daihti liata chyhsa ku taopa vata Aizawl lata ngai kheipa St. B. Laihaw cha pha viana la a pangai lyma, tahpa biedao pi ta. Atahma he biechhopazy chhao apalie thei ha ba hra na, pha via lyma awpa ta hneiseihpa a cha, tahta biedaopa hra.

                Maraland Post ta he tlah-leipazy nata vaduana atyhpazy ta hnatlana thla ama vaw hmo thei nawpa ta thlahchhakhei pi ta. Abeipa ta tlahna thlai a pie thei nawpa ta su liata Marasaw ypa, he Blog atly tyhpa zydua hnohta thlahchhakhei awpa ta eima cha haw hra.