Mawrah State liata Sex vata HIV+ poh chatlie

Ko 1990 October thla tawhta atako January taihta Mawrah liata Sex tawhta HIV+ hri akia hapa chyhsa 3,416 hmopapua a cha ha. He liana heta 1,839 cha chapaw cha ei ta, 1577 zy cha chano ama cha.

                Atako January thla lia ngalah ta chyhsa 1878 Blood Test hneipa tawhta HIV positive 53 hmopapua heihpa cha ta, he hry liata a hluh viapa cha 41 cha chano nata chapaw achaku chakiena tawhta kiahpa cha ei ta, cha liata chapaw 27 leh chano ama cha. No ta saw a phaona tawhta hawsai  HIV positive a kiapa pakha a y hra.

                Chyhsa 1,35,064 thisai mopa (Blood Test) tawhta HIV positive hmopapuapa zydua cha 5,365 hry liata thyutlia ko 15 - 34 hluh kaw ei ta, ko 15-24 likawh chapaw 756 nata chano 602; ko 25-34  likawh chapaw 1,444 nata chano 774 cha ei ta, ko 35-49 likawh chapaw 952 nata chano 483 ama y. Ko 19 nata thla 8 sie hapa liata HIV positive  hmopapuapa zydua tawhta chapaw 3,361 nata chano 2,004 y ei ta, HIV positive tawhta AIDS  pasana a tlo hapa 543 y ei ta, hezy hry liata 177 ama thi haw tahpa ta Mizoram State AIDS Control Society record hnohchaipa liata palasapa a cha.

                MSACS Project Director Dr. Eric Zomawia ta HIV/AIDS adyuhna he thapi phiapa ta hmahlapa cha ta, awnanopa nata py nano nanapa zy chhao ta hriakhohpa ta chi a chhih zie he pachuna siekhei ngahaipa a cha. He kyh liana heta Sex hma leipa ta a sohsipa he pha chai ta, anodeikuala cha hawhta a thei tatei leipa a chapa chhao ta novah kyh liata ngalah hmapa cha thei sala, a pha chai. Cha liata a thei leipa ta ama sohsi thei lei awpa a cha khiatala sôpahlyna (condom) chha he hma theipa cha sala tahpa ta pachuna he eima siekhei dah a cha, tahpa ta a reih.

                Mawrah liata he hawhta Sex tawhta HIV + thata apohna liata heta a papohtuh chaipa ta pahnopa cha chano chaozuahpa (KS or Female Sex Workers) tawhta cha awpa ta pangiasapa cha chai ta, he KS hry liata MSACS ry liata moh roh hapa (Registered) zy cha pachuna piepa amo a vaw daoh tyhpa chapawzy cha sôpahlyna hmah lyma awpa tahpa cha ei ta, he pachuna he ama zyh kaw thlahha, tahpa ta Dr. Eric ta a a reih. He hleikho ta apah-ruta lata chapaw apakyh tyhpa (Call Girl) hawhpa hluhpi y ei ta, cha hawhpazy hnohta Awarness piepa deikua hmo rairu kawpa cha ta, he hawhpazy chhao he chi ama chhih via pahchai, tahpa ta a reih hra.

                Thisaih mona (Blood Test Kid) he National AIDS Control Organisation (NACO) tawhta daopa cha ta, NACO tawhta hmopa a chyhpa vata khodah hawhta January nata February liata thisaih mohpasia hluh thei leipa a cha, tahpa ta Dr. Eric ta a reih hra.

                Atahma he Blood Test hnei awpa heta a tao awpa khotlyna cheingei hneipa cha ta, Blood Test hnei hlata nata hnei khai tawh chhao ta Counseling hnei khei lymapa a cha tyh. He Blood Test liata heta a kheihhawhpa rai vaw cha ha sala, palohchhie lei awpa ta pachuna piepa cha ei ta, ama moh he phuahluah leipa ta nopa ama cha, tahpa MSACS Project Director ta a reih hra.

Source: http://www.thezozamtimes.org/