Chakaotuhpa : Chakao awpa ta pachhapa eima cha

By A.Zawngia

(He he Dt.11.07.2010 noh ta Shillong Mara Church, Maisah chakaona liatapa a cha) 

Alyna biereina          

       A hmiatua chai ta atamy he su liata Abeipa achhy awpa ta avypa, ei ngiapalahpa zydua saih u, eima Beipa Zisu Krista moh ta chibaih ei cha bu ei. Awnanopa nopawpenawhzy ta he hawhpa daihti soh kawpa liata ama khokheina eina patosapa vata aly kaw na ta, amo hnohta chhao alyna bie reih na ta. Cha hleikho ta, keima chata nama thlahchhakheina vata nama zydua hnohta alyna bie ei cha hla ei.

Biehmiapa

     Atamy liana heta biepipa hnei pi ta, cha cha thla parohpa liata eima vaw hma hapa “Chakaotuhpa” tahpa a cha. A hropa a thla awpa cha taraw ta, anodeikuala Awnanopazy ta hmah chanei heih awpa ama vaw pathlupa he pachana ei na pie kaw. Eima vaw sie rakha liata eima thohkhei kaw saipa ta a la ta, a viapahchaipa ta keima heta ei thohkhei kaw. Eima nopaw penawhzy ta varo maniah vaw pachu ha ei ta, sapa nata thlahpa liata byhna ei to kawpa ta ei pahno. Cha nota hmah via awpa a vaw chapa he vahnei a chhih hmeihseihpa ta ei pahno.

       Atamy liata eima pacha khoh awpa cha Biepipa pachhaih pachhuahpa , “Chakao awpa ta pachhapa cha pi ta” tahpa a cha  aw. A biepipa tawhna heta thokhazy cha a yzie awpa chhao nama pahno thei nata ei pangiasa.

Bible reina

“Chyhsa Sawchapawpa chhao kha sei hnei awpa ta avypa cha leipa ta, sei cha awpa ta nata chyhsa hluhpi chatlai nawpa ta a hrona pie awpa ta avypa tlao a cha. – Math 20:28 (NRE).

“Chyhsa sawchapawpa he namo nama chakao awpa ta avypa cha leipa ta, namo chakao awpa nata chyhsa hluhpi chatlai nawpa ta a hrona pie awpa ta avypa a tlao a cha”

“Na tuahtuhpa khopa taopa nata a raihria pangohpa cha ei pati a cha”.  - Zawh 4:35.

“Kei, Abeipa nata Pachutuhpa ta nama phei ei cha pasi khiatala, namo chhao nama phei nama pasi raihrie awpa a cha”. Zawh 13:14.

“Kyhpachana cha  daothei (oh) ta,anopha tyh. Kyhpachana cha a hiatlia leipa ta, a reithei leipa ta, a palai leipa ta, ano phana dei pacha beih hra vei. A pathi-ia khoh leipa ta, hmo moleipa athei thlahha hra vei. …. Kyhpachana cha ato daothei  ta, angiapa ta, hnabeiseihna hnei ta, atao patlo tyh. (I Kaw 13:4 – 6).

Bei Zisu Alei lata Avyna chhapa

       Pakhata ta atamy eima biepipa apahniehna Biehrai bie he eima pacha khiatala a yzie ala pasia kaw. Bei Zisu he alei lata avypa he tla vaw charei chara leipa ta, a vaw khiehkha chakhypa cha hra vei. Chhapa nata achhuahna yzie hneipa ta avypa a cha. 

1.       Avyna chha chaipa cha Paw ta aza tuapa a cha (Zawh 3:16). 
2.      Keimo khizaw chyhsazy chakao awpa ta avypa a cha (Math 20:28). 
3.      Keimo ta chhazaw hrona eima hnei thei nawpa ta a hrona pie awpa ta avypa a cha.

A sia kawpa ta ei pahno. Bei Zisu cha Paw ta aza tuapa, Paw khopa tao awpa avy ta, khizaw chyhsazy chakao awpa nata hrona eima hnei thei nawpa ta avy tlai ta. A chakaona cha patloh ha ta, a hrona chhao Kraws liata keimo chata a hla haw. Ano zawhzi ta, keimo cha pachhapa cha haw pi ta, ano zawhzi ta chhazaw hrona hnei theipa eima cha haw.

Bei Zisu heta ano tao awpa pangoh hra sala, keimo heta eima tao awpa a y hra. Cha cha ano biepipa zyh awpa nata a raichabahpa tao pazao awpa a cha. He vana heta keimo he a saipa ta pachhapa cha taraw pi ta, chahrasala tao awpa, Bei Zisu chakaona pazao awpa cha eima ngiatlah liata pahniehpa a cha. Chavata, Chakao awpa ta pachhapa eima cha.

Chakaotuhpa nata Chakaona

     “Chakaotuhpa” tahpa he ‘chakao’ tahpa mohchho tawhta vaw puapa cha ta, hmotaopa reina a cha. ‘Chakao’ tahpa cha keimo chata cha leipa ta mohropa chata raihriapa, baopa; mohropa pha nawpa nata ama khodah hawhta raihriapa/hmotaopa a cha. Biehrai palie thiehpa liata cha ‘sei’ rai hawhta paliepa cha ta. Achhapa cha Mat 20:28 liatapa a hmiatua liatapa he Greek reih ta “diakonos” tahpa hmapa cha ta, cha yzie cha ‘Master or Minister’ (ryureihtuhpa) tahpa ta palie theipa a cha. A pazipa liatapa he ‘doulos’ tahpa cha ta. English Bible thokha liata chhao ‘sei’ (slave or servant) tahpa ta paliepa a cha.

Bei Zisu ta a reina yzie cha “Namo cho liata ryureih awpa ta avypa cha leipa na ta, namo chata raihria awpa nata chatlai nawpa ta hrona pie awpa ta avypa ei cha” tahpa ta a sia kaw aw. Chah 26-na liata chhao “nama hry liata rohnah a khohpa cha mohropazy a chakao awpa a cha” tahpa ta a reih. Chavata, chyhsa hluhpi reina liata “Bei Zisu he sei hawhta aza tao” ama tah tyh. Kheihtarai chasala, eima vaw rei hapa zydua tawhta Bei Zisu he angiapa-leipa Abeizy hawhta apapisa kawpa ta ryureih awpa ta avy leipa ta, keimo chyhsazy maniah chakao awpa nata chatlaina awpa ta avypa a cha.

Bei Zisu heta a tao awpa pangoh khai ta, ano zawhzi ta chatlaipa, pachha-sawzy eima vaw cha haw. Ano ta a taopa ngalah he a daih leipa ta, ano angiapatuhpa zydua hnohta ano ta a vaw tao hapa hawhta tao hra awpa ta biepiepa/bietahpa eima cha. Cha cha Zawh 13:14. liata eima hmo. “Kei Abeipa hmahta nama phei ei cha pasi khia cha, namo nata namo chhao a pasi raihrie teh u” tah ta. He khai tawhta a rei heihpa cha, “Kei ta nama kyh ei cha pachapa hawhna ei ta, namo chhao ta kyh a pacha raihrie teh u, kyh nama pacha raihrie khiah tala chyhsa tota ei pachupa nama chapa ama pahno aw” (13: 34 – 35) tahpa ta. He liana heta Bei Zisu cha a panawh ngaitapa ta a pachupazy phei pasi ta, chakaona rai a hria tahpa sia kawpa ta hmo pi ta. Cha khai tawhta a pachupazy cha a chakao raihrie awpa ta bie a pie ei. Cha hleikho ta, ano kyhpachana hawhta kyh a pacha raihrie awpa ta bie a pie ei.

Kyhpachana leipa ta mohropa chakaopa he hmo theipa cha leipa ta, Eima Beipa bietapa a cha tahpa kha eima thei vei khiatala, mohropa chakaona he hmo rairu kawpa a cha. Ahyrai ta sapa pikheipa apalaina nata “Kei” a tahna paloh hnei chyu pi ta. Mohropazy mohnaona nata keimo a pasahsana, keimo pha a tah via na a lai kaw tyh. Cha hawhta a palaipa cha Bei Zisu ta a hao chaipa a cha.

Kyh a pacha raihriepa liata deikua cha a daodo kawpa ta tlao ama chakao raihrie tyh. Kyhpachana chota chakaona liata cha rietheina y leipa ta, paphoh palyuhna y hra vei. A maochhiena nata ahnawna y leipa ta, a hryusina y hra vei. Cha cha eima Beipa Zisu Krista bietapa cha ta, ano zituhpa nata ano a ngiapatuhpa eima chana palasatuhpa tlao a cha. Cha cha eima chakaona awpa cha a cha.

         Chakaona yzie cha eima pahno pasia nata pangiasa na ta, Chakaotuhpa tahpa chhao he tawhta a vaw puapa a cha. Chakaona rai a hriatuhpa cha Chakaotuhpa tla a cha. Chavata, chakaotuhpa tahpa heta Pastor tlyma, Missionary tlyma, Evangelist tlyma, Awnano chhihthatuhpazy tlyma ngalah cha leipa ei ta, Bei Zisu Krista a pachupa bie zyh ta, chakaona rai a hriatuhpa zydua he Chakaotuhpa tlao ama a cha. Chavata, atamy he su liata avypa zydua he chakaotuhpa eima chakhai, tahna a cha.

Kheihta e Chakaona rai eima hria aw?

         Chakaotuhpa chata khatino raita a rai, chakaona rai cha a hria awpa cha ta. Chakaona rai cha rei hapa hawhta Abeipa hnohta hria awpa cha leipa ta, eima chyhsa heihzy hnohta hria awpa tlao a cha. Bieropa sakha ei thei tyhpa cha (atahma he a y khao nata y khao leipa pahno pasia leipa na ta) Aizawl liata Mara House ama pahy pathao dyu nota pahchho liata cha a tawhpa cha ta, cha cha “Service to man is service to God” tahpa a cha. (He he Indian Christian Theologian pakha, Vivekananda reipa a cha). Eima chyhsa heihzy eima chakaopa he Abeipa chakaona tlao a cha. Chyhsa hluhpi ta Chakaotuhpa eima chapa he apahno leipa pi ta, eima chyhsa heihzy hnohta chakaona he Abeipa chakaona a cha tahpa nata, chakao awpa ta pachhapa eima cha tahpa a pahno hra ma pi. He he atamy liata eima pacha khoh awpa a cha.

         Chakaona rai he khataihsu lia rai ta y ei sih la, khati daihti liata chhao rai ta eima hria awpa a peimawh kawpa a cha. 
1.  Chhohkha liata: Chhokha liata chakaona rai a peimawh ngasa. No nata paw cha ato liata maohphaona a chabapatuhpa cha ei ta, chakaotuhpa ama cha hmeihseih. Nie nata baw, a bu-sai awpa pacha ei ta, amo mopakha ngalah a pacha leipa ta chhohkha a ypa zydua pha nawpa ta rai ama hria tyh. Saw nawhzy ama pitloh hla via cha no nata paw ta sawzy  chakao hmeihseih ei ta. No nata paw ta chhohkha ama mohhohna cha chakaona rai rohnah kawpa a cha. Kyhpachana a hlao leipa sala, chhohkha a mohhohna he chakaona rairu kawpa a cha. Chavata, kyhpachana chota chakaona rai a cha tahpa pahnopa ta eima hria via lyma awpa byuh kaw. 

2.   Raihriana su liata: Rai hriana su he ahyrai ta hnei chyu pi ta, cha cha eima nietluana chhao a cha hra. Thokhazy cha zawpi rai peimawh kawpa hria ei ta, ama maohphaona chhao a sah kaw. Thokhazy deikua cha zawpi rai hawhta cha vei hra sala, ama cho liatapazy rai byuhpa a hriakheipazy ama cha. A kheihhawhpa rai cha sala, maohphaona keimo liata apahniehpa cha chakaona rai sai a cha. Mohropa eima baopa nata mohropa chata rai eima hria kheipa rai rai he chakaona sai a cha. Chakaotuhpa eima chana hawhta apanawh ngaitahpa nata ngachhih kawpa ta rai eima hria awpa a peimawh kaw. 

3. Khihtlah nata Opa lyuhri liata: Khitlah liata chyhsa hnykhaw kawpa chapa he noza achhih kawpa a cha. Khataih su lia rai y ei sih la, khitlah pha nawpa eima pacha awpa nata rai eima hria hra awpa a cha. Thyu awpa abyuh khia athyu phapa eima cha awpa a cha. Bao angiahpa nata siepasa viapazy baona chata chhao eima pasai tyh hra awpa cha ta, cha cha chakaona a cha. Maohphaona (responsibility) eihhrahpa eima to khia cha, eima maohphaona cha a pha kawpa ta eima hria awpa cha ta, chana nata mophana ngalah eima khoh awpa cha vei. Chana eima to leipa chhao ta, chhihthatuhpazy tha patlotuhpa eima cha awpa a cha. 

4. Achuhaipazy chakaona awpa: Atamy he su liata avypa hluhpi cha achuhaipazy cha pi ta, thokhazy ta cha chakaotuhpa eima cha hra tahpa a pacha beih leipazy chhao eima y aw. Ahyrai ta chhohkha hnei chyu pi ta, no nata paw zy, uta-nawhtazy eima hnei chyu aw. Chhohkha alyna chata tao theipa eima hnei chyu aw. No nata paw reingiah pi ta, ama khodah hawhta eima ypazy, rai eima baopazy he chakaona rai peimawh kawpa a cha. Chatawhtala siku/college eima kiana liata viasazy nata pachutuhpazy, o eima tlolahpa nata hostel liata eima ylahpazy nata adyhryhpa ta eima y thei nawpa ta hmo eima taopazy chhao chakaona rai sai a cha. Bei Zisu ta a pachupazy a chakaopa hawhta mohropazy cho liata chakaona rai he hria lyma awpa ta atamy he bie eima tapa a cha.

Mahatma Gandhi ta a reipa sakha ei pahno khai nata pangiasa na ta, “Atanoh ta achuhaipazy he myla hanoh liata eima rah chhihthatuh awpazy ama cha” a tah. Atamy he liata atyuhpa hry tawhna heta eima rah nata khizaw rah hro lata chhihthatuhpa nata rai peimawh ngaitahpa hria awpazy eima tahpa kha eima thei awpa cha sala. Atanoh ta eima nopawzy he vaw macha aw ei ta, daihti a vaw thla lyma awpa a cha. Kheihhawhpa dua lia rai ta y ula, mohropazy chakaopa he Abeipa chakaona rai peimawh kawpa a cha tahpa kha eima thei thlahha awpa cha sala.

Conclusion

            Achha chaina liata cha, chakaotuhpa eima chana hawhta khatinorai, kheihhawhpa su lia rai ta, keimo he cha chakao awpa ta pachhapa eima chana hawhta apanawh ngaitapa ta mohropazy chakao awpa cha pi ta. Sei ngachhihpa nata siapa achhuah awpa eima cha. Cha chakaona hmapa ta Krista thatihpha chhotuhpa cha ei sih la, mohropazy chata byhna cha lyma awpa ta. Bei Zisu reih ta, “Ahyrai, ei chyhsa chyhchaipa cho liata hmopha a taopa cha keima cho liata a taopa nama cha” tahpa ta ropa cha ta. Chavata, pathluana hnei leipa ta kyhpachana chota mohropa eima chakaopa he Abeipa chakaona, Chakaotuhpa eima palasatuhpa a cha.

ABEIPA TA A BIE EIMA CHAHKHEIPA EIMA ZYDUA CHATA BYHNA MANIAH PIE MAWH SY,

AMEN