Sermon: Satlia Davi Cheisia nata Achuna

By Mc A.Zawngia

Mc A.Zawngia, Shillong Mara Church

Biehrai Rei awpa: 1 Samuel 17:47 (Bo 17-na chhoh zydua rei awpa a cha)

Biepahyna:

    Eima Biehrai Pathaihpa liata chyhsa riahphapa nata mohpathah kawpa thatih hmo awpa hluhpi y ta. Cha hry liata pakha cha Satlia Davi a cha. Ano thatih he Ruthi chabu bo chhana liata achyhta hmo pathao pi ta, Samuel chabu bo 16-na tawhta hmo awpa y lyma ta, Abeizy nata Ryhpachareina chabu liata chhao thata eima hma. Hlazy he ano (Davi) ta a phipa cha viaro ta. A hrola chhao a thatih he hmo awpa y lyma ta, Biephuah taihta hmo awpa a y.

Satlia Davi Thatih nata A Cheisiah

      Marapazy reizie hawhta cha “Satlia Davi” he ‘Pasaipha’ a cha. A thatih alana liana heta Satlia “tota to thaipa, alah thaipa, hlasa thaipa, hmipha kawpa, bierei thaipa, riahphapa, pheisaih pha kawpa..” (1 Sam. 16:18) tahpa ta hmo pi ta. Ano cha satlia thyudyupa a cha no tawhta mietahku vaihtuhpa a cha tyh. Ano ta a thatih a reina liata, mietahkupa a vai daihti liata chakeihbarohhneipazy, chavyhzy, ta a mietahkupa la awpa ta avy tyh ei ta. Chahrasala, chi leipa ta athyuhnao ta achadai thlahha tyh. Cha hawhta a mietahkupazy vaw vaih tyhpa a cha (1 Sam. 17:34-37). He vana heta Izarel Bei cha awpa ta sathaw a vaw thu chhieliepa a cha thlyu aw.

       He daihti 1000 BCE rahchhoh cha ta, he daihti liana heta Meithei hmopapua mah leipa ei ta, zaozi nata seichhie ta adyuh daihti a cha. Cheisiah cha y taraw ta, chahrasala adyuhna chata hmah thlyu ualua veih ei. Achhapa cha adyuhna chhaichhi, vyhphaozy nata thua lakhu ama paky khai ha nata cha, cheisiah ta siahpa cha yzie hnei lei awpa cha. Satlia Davi deikua, cheisiah he ko hluhpi vaw hmah ha ta. A siah thai kaw tahpa hmo pi ta. Izarel chariah chichhih chaipa Palestine mopahreihpa Koliatha chhao kha cheisiah ta thie awpa a vaw nga thlah haw.

       He daihti liata cheisiah he, atahma ta keimo eima hmah hawhpa cha leipa aw ta, achhapa cha Harie-riripa he ama hmahpa ta pahnopa cha mah vei. Chavata, savo tlyma, chaori tlyma ta taopa, pahieh pahieh ei ta ei khapi ta ama pazaw tyhpa cha awpa ta pangiasapa a cha.

Satlia Davi Education

        Reihapa hawhta he daihti liana heta Izarei zy chhao he achuna cha hawhta y hlei vei. Chapawzy cha vaw satlia via ei ta, ama uhtazy hry liata apahlaopa ta mietahkupa (sahroh) vaihpa nata adyuhna achupa tla a cha chai. Chavata, Satlia Davi heta cha tlyma, hmohropa tlyma achu hlei leipa ta mietahkupa tla a vaih hra. Anodeikuala, rah liata mietahku vaihtuhpa cha awpa rai chi chhih kawpa, sahrahpazy nata ama hmiahaopa Palestine chyhsazy tawhta khatinorai ta avaih awpa byuhpa a cha. Chyhsa riahpha kawpazy ama cha vei khiacha, ama sahroh vaipa he thata ama pahlei tyh. Chanota, satlia Davi cha riahpha kawpa ta a mietahkupazy a pachha tyh tahpa hmo pi ta, chariahzy tiahna awpa peimawh chaipa – cheisiah siapa cha he mietahkupa vaina su tawhna heta a vaw chu tahpa eima pahno. Chakeihbarohhneipa nata chavyh zy a vaw thie tyh khia cha, a thai kaw tahna a cha. Cha hawhta thai awpa ta cha hriapasa ta thata a vaw chu aw, tahpa ala ta. Cha hleikho ta, satlia thyudyupa ta chakeihbarohhneipa a vaw thie thei thlahha khia cha, tha chhao a hnei kaw. Chavata a vaw hriapasa kaw, tahpa eima pahno.

Izarei nata Palestine adyuhna: Satlia Davi a sala daihma

         Izarei chyhsazy he Palestine rah la a kaw paihpa cha ei ta, chavata Palestine nata adyh thai leipa ei ta, kha adyuh tyhpa ama cha. Chapaw, pitlohpa maih cha adyuhna la sie tyhpa cha ta, hatipa nata mahchapazy tah dei leipa ta mokuh pahah kawpa ta amona daihti hnei veih ei. Chavata, Davi uhtazy pathohzy chhao adyuhna la sie hra ei ta, ama thatih pahno awpa ta Satlia Davi he tlao tuahpa a cha.

         He daihti liata Palestine la tawhta chyhsa pohpahreih kawpa nata riahphapa, Feet 9 a sahpa (Guinness World Record cha Robert Wallow, USA cha 8’11’’ a cha. Atahma ta record cha Yao Ming, China, NBA Player chata, 7’6’’ a cha - Wikipedia), Koliatha he Izarei mozy rie a pathei kaw, tahpa hmo pi ta. Izarei chyhsa, adyuhna liata riahphazy chhao Koliatha ao ama thei na ta ama ra khai chhyhpa a cha nota, Satlia Davi deikua chi vei. Hmo yzie a hiahhri pasia viapa cha, a uhtazy ta chikhei kaw ei ta. “Khapa ma na pahno, a chalih teh” ama tah. Ama bei Sawla hnohta Abeipa nata cheisiah hmapa ta chakeihbarohhneipa nata chavyh zy a vaw thie tyhna dah nata, Koliatha cha pahnie theipa a cha, tahpa kei chho heih ta. Athaoh nota vaw zo vei; chahrasala, ano liata riahphana vata aparyhsa. Keimo la cha mawh sala, “Davi, na sala tu ha…” eima tah cheingei aw. Satlia Davi deikua, Abeipa nata a cheisiah kha a pahnopasia tu haw, chi tiarah vei.

Koliatha hmiako liata Satlia Davi

        Satlia Davi heta Koliatha siehnao ta, chariah chhaichhi nata vyhphaozy a chei hlei vei. Mietahkupa a vai nota a chochahhrei, sahria nata cheisiah a chei ta. Chavah liata alo mihpa sapangawh ahuah ta. Koliatha nata ama tyh haw. Koliatha ta Davi a vaw hmopa cha, a pathi-ia kaw ta. Davi hnohta, “I ta ma ei na pacha chi, khazia vata mahso ta na vyhnaopa ma na cha?” a vaw tah.

          Satlia Davi deikua Koliatha hnohta, “Keima na dyuh awpa ta zaozi zy, sei zy, chataizy chhao ta a vy chi ta, keima deikua ta cha ABEIPA  Ataotheipa, Izarel pheisaihzy  Khazohpa na pahao ngapa moh ta cha dyuh awpa ta ei vy..” tah ta. He hawhta bie ta ama ei ngahaino ta Satlia Davi cha a chatliepa ta a sahria liata  alo chapao ta, thaoh ta, a cheisiah nata Koliatha cha kei siah ta. Koliatha khi liata khai ta, Koliatha cha pao ta, a thi haw!

           Satlia Davi chata chi a chhih kawpa cha, cheisiah ta a siapa he khai leipa sala, a hrona chhao a pahlei awpa a cha. Chahrasala, cheisiah ta a siahpa he chhei beih vei, a thai kaw, tahpa ala. Koliatha he ei khana liata tlyma, ei nona liata tlyma, a thi leipa chhao ta alo miapangawh a hnei. Chahrasala, alo sakha ngalah a daih kaw, Koliatha thie nawpa ta.

        Chavata, he liana heta Satlia Davi he cheisiah siapa liata Khazohpa ta Talent pie ta, a thai ngasa. Mongyuhreih ta cha “Super Specialist” eima tah aw tlyma, Gold Medalist eima tah aw tlyma, a cha aw tly, cha hawhpa athaipatlua kawpa a cha. Cheisiah siapa athaina liata Abeipa ta byhna pie ta, a chariah tiahna chata hmah ta. Abeipa nata Izarel sawzy chata mohpathahsatuhpa nata pabohsatuhpa a vaw cha.

Satlia Davi mohpathahna nata atahma khizaw ataopasuana

          Satlia Davi heta Koliatha a pahnie tawhta cha ahyhmah ta, “Hatipa” tah khao leipa ei ta, “Sala” tah thaipa cha khao hra vei. Khazohpa nata a rah zawpi ta ano liata ngana pahnieh ha ei ta. He tawhta adyuhna ama sie lymana liata chhao, Davi heta chariahzy tawhta a pachha. Abeipa ta Satlia Davi liata ngiapana, riahphana nata ryhraothainazy, mietahkupa vaina su tawhta a vaw hmo khai haw. Daihti vaw sie ta, Izarel sawzy ta rairuna ama tyh daihti liata cheisiah siathaina chata ano, a uhnawhpa nata a chiheih zydua pachhana a vaw cha haw.

             Atahma khizaw liata he atahma eima reipa Izarel nata Palestine zy adyuhna hawhpa y khao leipa ta, ataopasuana nata thaina liata adyuhpa (Sports and Intellectual War) tlao a cha ha ba. Cha thaileipazy chata nata Sport athei leipazy chata adyuhna liata a hlao thaipa cha khao ma pi. Achuna liata ataopasuana khizaw a cha ha ba. He achuna ei tahpa heta atahma College eima kiapa achuna ngalah cha leipa ta, ato liata achuna – Sports, Music, etc. chhao apahly khai. Thaipa (Degree) ngalah adaih leipa ta, thaipatlua awpa (Outstanding) abyuh kaw. Thaipatluana a hneipazy cha mopakha chata dei cha leipa ta, a chhohkha, a chi-heih pho-heih, a ti nata rah, a Khazohpa moh a paphasa tyh.

Chyhsa Hlaotlohpa nata Mohpathahpazy Thatih

            Kei ta hmo a nano tlai na, ei vaw tah tyhpa cha – Hollywood Actor Arnold Schwarzenegger he a cha. Film liata hmo tyh na ta, ano cha Political Leader cha awpa ta ei pangiasa beih leipa, thua hawhta Film tla a cha tyh awpa ta ei pachapa a cha. Chahrasala, Film liata a mohpathahna vata Politics liata chhao California State liata Governor a kaw cha thlahha cha maw. Pele cha a thyutlia daihti liata Football athaina vata nata a rah Brazil chata a World Cup a vaw lakheina vata ama rah liata Sports Minister vaw cha hra ta, atanoh taihta a moh dia khao hra vei.

           US President 39-na Jimmy Carter cha a thyudyu nota Navy pheisaih cha tyh ta, Navy liata a yno ta Atomic Energy liata hria ta, ei kha cha accident atyh ei ta, cha liata riahpha kawpa ta apachhaituhpa nata mohpathapa a cha. He khai tawhta Sado taopa lachhah hmahla heih ta, a hlaotloh kawpa a cha heih hra. Ano he Khazohpa a ngiapa kawpa cha ta, a hmotaopa zydua liata a hlaotlohna chata Politics liata chhao hlaotlohna vaw pie heih hra ta. Georgia State liata Governor, Senator nata US President taih a kaw cha thei. Ko 2002 liata Nobel Peace Prize piepa a cha.

      Abhinav Bindra he thaina lata cha Bachelor of Business Administration cha ta, chahrasala Rifle a kathaipa vata nata India chata Olympic Gold Medal a vaw lakheipa vata ano mophakha, chhohkha nata India chata mohpathahpa a vaw cha haw hra. A soh hmopa cha 3 crore hlata a hluh via.

         Khizaw liata Footballer maru chaipa – C. Ronaldo cha, ko 16 -17 a cha nota Academic Task hleikho Beach liata ano-eih tlai ta achu tyh. Cha chata, hlaotlohna a pie. Talent he cha hnei pha hra ei sala, tiama papua leipa ta thatina chota vaw tao ei sala, pahnopa cha aw  veih ei. Amo hlata Talent ahnei phapa hluhpi ama y thlahha ngyu thei mah my, chahrasala tiamana liata mohropazy ama kho leipa vata ama moh pahno khao ma pi.

Kheihta e a hriapasapazy liata hlaotlohna a tlo?

        Atahma he thyutliapa achuna vata he liata ypa eima cha. French Bieso liata chyhsa ama mohnaona reihkah cha, “Jack of all trades; master of none” ama tah tyh. ‘Phiphuh thai, pahno a tah hra; chahrasala pahnopasiapa hnei tloh va, thai lova’ tahpa eima hluh kaw nata eima pangiasa.

          Satlia Davi kha cheisiah ngalah siah thai vei; tota to thai ta, alah thai ta, hlasa thai ta, bierei chhao a thai. Chanota, cheisiah liata deikua cha “Master” a cha. A riahphana ta nata Abeipa angiapana ta ano liata Talent cha achiheihzy pachha nawpa ta Koliatha pahniena chata a hmah. Abei Sawla paloh atymana daihti liata tota atothaina chata alyna tlokhei tyh ta, a vaw tla via tyh. A chhana liata cha Izarei Bei zydua hry liata Bei rohnah chaipa a cha.

           Keimo chhao, tota topazy, Keyboard topa, Games & Sports zy, hlasapazy, lapazy, a rakhazy eima thai hra awpa a cha; General Knowledge he eima pahno awpa abyuh. Ko liata eima hatipa chhao rai ta pano hnohta tlyma, papalih papangawh hry liata tlyma, zawpi hmiako liata bierei thaipa cha awpazy a peimawh kaw. Cha cha achuna khola liatahpa a cha. Chanota peimawh chaipa cha, a kheihhawhpa liata tlyma cha “Master” cha awpa eima chhuah awpa abyuh. Master-na eima hnei vei khiala, thiapawh ta French bieso eima reipa hawh deita a cha thei aw.

           Ei kha ei reih chanei heih tua aw, Arnold cha athaoh nota Body Builder hmahta cha hrasala, achhana liata US Governor a cha thei, athaona liata a mohpathahna zawhzi ta. Jimmy Carter chhao pheisaih hmah cha sala, US President a kaw cha thei. Ama hmotaopa liata nga achhihna vata. Abhinav cha, MBA hmah cha vei; chahrasala MBA hluhpi hlata eima pahno via. India moh apapha via, Meithei ka a thaipa vata mohpathahpa a kaw cha thei hra. Satlia Davi ta mietahkupa avaina liata cheisiah asiah tyhpa nata a riahphana vata Izarel Bei rohnapa  a vaw cha thei hawhta keimo chhao atanoh heta he eima chuna liata hriapasa ta tiama eima papua awpa abyuh kaw.

           A tliata liata Marasaw hry tawhta MCS atlohpa M. Misaela kha pahno aw pi ta. Amo unawh he cha thai thei kawpa a cha. A uhtazy cha Primary tawhta College taihta First Class ta vaw sie lymapa cha ei ta, ama nawhta Misael deikua cha Third Class ta a vaw sie tyh. Chahrasala, a paloh a vaw tao pathi ta tiama a vaw papuapa cha, a uhtazy hlata a vaw thai via syulyu haw. Eima chuna liata eima vaw diathla ngyu thei aw; chahrasala eima taopathi khiata cha “Chance” eima hnei khai. Keimo mopakha achhuahna nata khona liata a pahniehpa a cha.

          Atahma ta na chuna kha, khapa hmah cha leipa hawhta na pacha ngyu thei aw; chahrasala atahma achuna hleikho peimawh viapa y hlei vei. Bachelor Degree achuna tlai kha thai kaw tua, UPSC nata MCS Syllabus zy he Gratuate Course sai a cha. College ei kia nota ei viasa Vanlalmawia cha, B.Sc cha ta. Final Exam ko ta MCS rai pahy ei ta, a exam ta a tlo thlah ha. Chavata, khaparai tao ula achu ula, taopa nata achuna liata, a kheihhawhpa liata tlyma cha “Master” cha awpa nama chhuah awpa ta atamy liata bie eima ta.

Conclusion

            Achhana liata cha, “Jack of all trades, master of none” tahpa ta mohropazy maniah pahneisao lei nawpa ta eima pachapasia awpa nata eima hriapasa awpa abyuh kaw.

          A kheihhawhpa rai tao la, achu la, ngachhih ngaitapa ta nata tiamana zydua papua teh. Atahma he a daihti a cha. Thyutlia daihti liata na hmotaophapa khata myla hanoh chata a cha chhihtha lyma tahpa a thei thlahha teh. Na hriapasana liata Gold Medalist cha a chhuah teh.  Na hriapasana cha Abeipa ta byhna a pie ngiathia aw. Na hnabeiseihna khola taihta chhao Abeipa ta a cha chhihtha aw, Satlia Davi hawhta.

          Abeipa ta Satlia Davi thatih tawhta atamy liata Abeipa bietana eima chahkheipa cha eima zydua chata byhna maniah pie mawh sy, Amen. 

(NB. He Sermon he Dt.17.7.2011, Shillong Mara Church liata reipa ta patohpatiapa a cha)