District Council zy adona nata tovyuh tlybaipa he Democracy Dah chakhiapa a cha: Pand

Atahma ta Mizoram liata khi kaw tlyhpa Ministry of Panchayati Raj liata Addl. Secretary Dr. Hrushikesh Pand ta, District Council pahlypa chhoh Village Council zy ta biehneina sah via ama hnei thei nawpa nata, an sie dah tyhpa cha panano awpa a chhuah tahpa ta a reih. He hleikho ta District Council zy ta yzie thei viapa ta soh ama dao thei nawpa ta State Finance Commission cha a phata ta thlai a sie thei awpa ta a hnabeiseihna bie a reih hra.

District Council nano nanopazy a tly khai tawhta zakhahnia khata  Dr.Hrushikesh Pand heta State Guest House liata thatihlapakhypazy apakyh ta. District Council pahlypa chhoh VC member hry liata chanozy cha seat sochhieliena (reservation) dah tao awpa a cha aw, tahpa reih ta.  VC Atlyhna cha State election Commision ry liata tlyma, State sawkha nata District council tlyma ta achahraoh thei lei awpa ta, ano-eih ta atlyhna hnei thei awpa ta patohpatiapa a cha, a tah hra.

Dr.Hrusikesh Pand heta, Dah taopathi awpa ta pachadah thiehpa taopa he zawpizy ama khichhoh amohhohna liata biehneina sah viapa ama hnei thei nawpa ta taopa cha ta. He pachadana thiehpa he khi to liata voter ypakhypazy ta Village Asemmber tlao ama tao aw, tahpa ta a reih hra.  Su thokha liata cha State ta Distric Council zy adona nata tovyuhzy ama tlybai tyh tahpa Dr. Pand heta reih ta, ‘He he Democracy Dah chakhiapa a cha,’ a tah. He liana heta Mizoram sawkha cha tlao a taopha thlahhapa hawhta a pahnona bie a reih hra.

State sawkha siepahlie leipa ta District Council hnohta soh pie theipa cha vei, tahpa Dr. Pand heta reih ta. He hawhta a cha nota State Finance Commission ta soh ama taona dah awpa nata daona daihti awpa cha yzie hnei kawpa ta pahnosa tyh awpa abyuhnazie reih ta. District Council member hry liata chano 2 lyma Nominated Seat pie awpa nata VC member liata chano 1 lyma Nominated seat  so awpa paryhsapa a cha,tahpa ta a reih hra. He kyh liana heta Dr. Pand heta LADC cha Mawnochhi State hry liata hmah la chaipa a cha tah ta, he chana heta ‘Draft’ chhao tao ngahaipa a cha,’ a tah.

He patohpatiana thiehpa he Chakma Autonomous District Council ta atahma thlapa  noh 29 liata 'pass' thei awpa ta patohpatia ngahai ei ta, Mara Autonomous District Council ta August noh 2 liata 'pass' thei awpa ta ama patohpatia ngahai hra tahpa ta reih ta. ‘He he apyhpa a cha khai tawhta State Sawkha hnohta tlokhei aw ei ta, Governor ta atlahpakyuna a tao aw. Chatita Dah hawhta siekhei theipa a cha ha ba aw,’ tahpa a reih hra.
 Source : The Zozam Times