Sir Alex he keima hlata a pha via: Pep Guardiola

Chyhsa hluhpi chata bierei a ru chaipa cha, "Kei hlata ano a pha via" tahpa bie he a cha nata ei pangiasa. Athaipa nata mohpathahpa hry liata chhochhi cha, ahyrai ta 'kei' a tah ei ta, amo pha a tah aw ei ta, mohropa cha amo hlata pha awpa ta rao thei hmeiseih veih ei. Atahma khizaw Football liata Coach hlaotloh chaipa nata phachaipa ta reipazy cha Pep Guardiola, FC Barcelona; Sir Alex Ferguson, Manchested United nata Jose Mourinho, Real Madrid zy cha ei ta. Amo pathoh hry liata phachaipa eima pachadah nata saidah deikua alyu ngyu aw vei. Amo hry liata chhao thata azaohna y ta. Pakha ta, ano apanawh ta mohropa pha ta viapa ta rao thei beih veih ei. Chahrasala, Pep Guardiola cha "Keima hlata Sir Alex a pha via, ano he Khizaw liata Coach phachaipa (World Number One) a cha," a tah thlahha cha maw..!

Zahnia Hajduk Split, Croatia liata Sir Alex thatih reih ta, "Ano nata apakho thei awpa cha va na," tahpa ta a reih. "Champion League liata ama tlolei vata, keima he ano hlata ei pha via tahna cha vei" a tah. May thla liana khata Barcelona nata Man. Utd he UEFA Champion League Final, Wimbly liata a vaw khaih hla ei ta, 3-1 ta Pep Guardiola py Barca ta ama vaw tlo hapa a cha.

Pep heta, "Hmiala liata tao awpa hluhpi ei hnei, ano nata apakho awpa ta. Ano cha Champion League liata a mohphana dia thai khao lei awpa a cha. Ano he ko 25 hnei Club vaw mohhoh ha ta. Kha vaw tlo lymapa a cha. Chavata, khizaw liata Coach phachaipa ta ei pachapa cha ano (Sir Alex) he a cha," tahpa ta a reih.

Pep he Coaching Experience liata hati kawpa cha ta. Ko 2008 tawhna khata Barcelona he a vaw mohhoh. Ko 3 chhoh a vaw mohhohpa liata La liga Title ei 3, UEFA Champion League ei 2 - 2008-2009, 2010-2011 nata Super Cup ei 1, Copa Del Roy Cup - 2008-2009, Supercopa de Espania ei 2, vaw lakhei hapa a cha.

 He he a duasu achapa vata ano he apathaona tawhta a hlaotlohna ala pasia kaw ta. Club phapa a vaw mohhoh pazipa vata hlaotlohna a hneipa nata, Lionel Messi, Xavi, Alonso, etc. avao ngahaipa cha hrasala, ano he Coach phapa a cha vei khia cha, pha leina la pangai theipa ama cha hra. Anodeikuala, Team pha chaipa ta kha paduatuhpa a chana vana heta Coach hlaotloh chaipa ta rei thei awpa cha a cha thlahha. Kao hro la tawhta saipa ta Player rohnah kawpa ta ataotuhpa, achhihthatuhpa kha tlao cha ta. Chavata, khizaw liata player phachai chaipa ta a taotheipa chhao he a rohnahna a cha.

Hezy thatih pahnopa a cha pataw nata, online liata Comment a pietuhpazy ta Pep he tlao pasahsa achhihnazie reih ei ta. Ano (Pep) ta "Keima hlata Sir Alex a pha via" a tahpa vana heta ano he Sir Alex hlata aza hnai via hlei leipa ta; ano he za tlao achhih via ta, apakah-paleih phana tlao a la, tahpa ta ama reih.

Sir Alex he ko 25 chhoh Man. Utd. a mohhoh chhoh ta, Premier League ei 12, FA Cup ei 5, UEFA Champion League ei 2 nata UEFA Super Cup ei 1, Intercontinental Cup ei 1 nata FIFA Club World Cup ei 1, vaw la hapa a cha. Team Management la liata ko 1976 tawhta vaw pathao ta, Man. United he ko 1986 tawhta a vaw mohhoh haw.

Sources : Euro Sport. Com