SMC Salvation Camping Hlaotloh Kawpa ta patloh haw. Thyutlia 100 hleita alyna thiehpa to

Shillong Mara Church pachhuahpanohpa ta Salvation Camping hneipa, Hriaheihnoh zala tawhta hneipathao cha zahnia Pachynoh my khata daihti pachhapa cha ta. He Camping liana heta Camper liata angiapa 112 nata khotho la tawhta avypa 8 y ei ta, a zydua ta 120 ta Camping daihti pha kawpa ama hmah. He Camping liata angiapazy he Marasaw, Shillong liata achuna vata avypazy sairo cha ei ta, he thyutliazy heta alyna thiehpa topa ta zahnia Pachyhnoh khata Camp tawhta ama pua.

Thyutliazy ta "Hallelujah" tahpa ta Abeipa ama palyupalih

Palasa hapa hawhta he Salvation Camping liana heta Speaker chata Evan. HC Notha hmapa cha ta, Director chata Rev. Pheitha Lava, Shillong Biatuhpa hmapa a cha. Speaker heta ano zipa 2 - Puhpa B. Ngohro, Amobyuh "Ch" nata Satlia Chakhei, Lodawh zy ama cha. Puhpa B. Ngohro heta thyutliazy ta alyna ama to thei nawpa ta Camping pathao za tawhta kahvi leipa thlahchhana hnei ta, ano thlahchhana zawhzi ta he Camping he hlaotlohpa a cha tah theipa a cha. Ano yna room liata thlahchhana hnei tyhpa cha ta. Mc. VT Ismael chhihthana ry liata Awnanopa liata chhihthatuhpa nata nonahzy ta thlahchhana hnei tyhpa a cha.

Evan. HC Notha, Speaker

He Camping biepipa chata "Taopathina" tahpa hmapa cha ta, Speaker heta "Rah hropa nata chi hropazy cha Abeipa chakao awpa ta thyutliapa cha athaipazy ta phahnai a ngiah ei ta. Pastor nata Missionary ta a siepazy chhao thaina (Degree) a sah kawpa a hneipazy cha ei ta, chavata ama chakaona thatlo ta, chyhsazy ta ama pasahsa ngaita kaw. Keimo rah deikua la chathai viapazy ta Abeipa chakaona rai hria awpa achhuah leipa ei ta, Officer nata Politician cha awpa ama khoh khai haw.  Eima va a dua hmeiseih. Chi hropazy cha Dawty zy, M.A., B.A. a patlo hapazy ta Missionary ama sie nhgano ta, eima Missionary nahzy cha Matric a patlo chyu chyuhpazy rai cha ei ta. Evangelist zy hry liata chhao keima he Matric a patlo chhohpa tla ei cha. Hezy ei pacha nata ei paloh a pasa ngaita kaw. Chavata, eima rah taopathi awpa ta namo thyutlia cha a thaipazy cha ngiah pi ta, ei thlahchhana nata ei hnabeiseihna a cha," tahpa ta thyutliazy hnohta bietana a reih.

Evan. HC Notha ta, "Keimo Marasawzy he Abeipa tluapapuapa dei cha leipa pi, atlyh-eihpa Chi nata Pho tlao eima cha. Rah hropazy chhao Missionary ama hnei chyu hra na, anodeikuala keimo Mararah hawhta Missionary zy ta luh ama pabu khaina taihta a hlapa y veih ei. Eima va a hnei ngaita kaw na tah teh u. Chahrasala keimo deikua asona pahno leipa pi ta, Abeipa ta maniah atlyh-eihna chhapa hawhta Ano chakao thei ma pi. Atanoh cha maohphaona cha thyutliazy ngiatlah liata a pahniehpa a cha," tahpa ta a reih hra.

Speaker heta thyutliazy hry liata daihti siekhei dah nata bierei dah thai kaw ta, thyutliazy ta a biereipa he no-ai tah leipa ei ta, daihti a chha awpa pasaih veih ei. Thyutlia hluhpi ta alyna thiehpa to ei ta, khizaw hmozy siesai ta Abeipa chakao lyma ta bie a taihpa ama hluh kaw. Chahrasala, Speaker heta mopakha tlyma, zawpi tlyma hnohta ano eihta a hlana nata bietainazy pahneisa leipa ta. Amo mopakha chyu ta pachapazi awpa (Decision tao awpa ) ta bie a tah ei.

He Camping tawhna heta thyutliapa hluhpi ta alyna thiehpa to ei ta, Abeipa khozie hawhta hroh lyma awpa nata Ano chakao lyma awpa ta a vaw hla ei ta. A lah beih leipazy ta Abeipa reithaina hlasapa ta ama vaw lah haw hra. Daihti chha za liata chareipakhyna cha Mc. A.Zawngia ta chhihtha ta, Camper zydua ta Abeipa reithaina hlasapa ta ama lah. Daihti chha awpa pasaih a chhih taraw leipa ta Pachynoh dawh 12 pa liata pachhasapa a cha haw.

Camper zy ta Abeipa reithaipa ta ama lah

Camping Sub-Committee ta, "He Camping hlao a tloh thei nawpa ta suto rahto tawhta thlah maniah chhakheituhpazy, soh lata maniah patohpatiakheituhpazy, soh maniah a baotuhpazy nata hmo hropa liata kyh totie liata maniah baotuhpazy vata tao theipa nata hlaotlohpa cha ta, ama zydua hnohta eima Beipa Zisu Krista moh ta alynabie eima reih hmeiseih. Keimo ta khapa hmahta amo chata taotheipa hneileipa pi ta, Abeipa ta ama chola ta byhna pie chyu ei se," tahpa ta ama lynabie ama reih hra.

Zawpi

Chanozy nata Camping Board