Hlimna Thuruk - Nun Krista

By A.Zawngia

(He Sermon hi Dt.15^th Dec' 2010 zan inkhawm, New Saiha Biakina Pathian thuchah kha a ni)

Thuhmahruai

          Zanin atana Pathian thu kan ngaihtuah ho atana thupui ka thlan chu “Nun Krista- Lawmna thuruk” tih a ni. He thupui hi ka sawi chak em em thin a, mahse tun hma zawng khan sawina hun a rem chang theih ngai lova. Zaninah chuan a remchang hlein ka hria a, ka lawm hle a ni. A chhan chu hei hi ka Testimony a ni. Kawng leh-lamah, kan kohhran chuan kum tin a lo tih thin angin kuminah pawh Salvation Camping a buatsaih a, mi tam takin hlimna thar an neih a ni tih te pawh ka lo hria a. Chuvang chuan, Sharing hun ang deuva hun hman a tha zawkin ka hria.

          Pathian thu ilo ngaithla ang u,

“Kei atan zawng, nun hi Krista a ni a, thih pawh hlawkna a ni” (Phil. 1:21).

“ Elrel leh inngaihhlut avanga engmah ti lovin, mitin inngaitlawm takin mahni aiin mi dang tha zawkah ruat theuh zawk rawh se; mahni ta mai en lovin midang ta pawh en theuh zawk rawh se” (Phil. 2:3-4).

       Ka tun hma nun tlem han sawi ila: Pianthar hma, tih ila Krista nun ka tawmpui hmaa ka nun ka thlirlet leh hian keimah ngei pawh hian mak ka ti thin. Ringtu chu ka nih ve reng thova, mahse “Nun” hi enge a ni, eng atana nung nge kan ni, tih hi ka chhut tak tak ngai lova. Chhan harsa ka tih em em zawhna a awm a, chu chu- “Nung tura ei nge, ei tura nung” tih zawhna a ni. Ka ngaihtuah tha leh a, “thi tura nung kan ni zawk lo maw?” tih chhanna a rawn lut a. Ka han ngaihtuah tha leh a, “thi mai tura rawn piang kan ni reng mai!” Ka thil ngaihtuah chu a pawimawh hle nain, a chhanna chu a ho hle. Thi mai tur kan ni si chuan “thih tlai” aiin “thih hma” a tha zawk em? A.., a dik thei lo. He ngaihtuahna hi ngaihtuahna atthlak tak a ni.

         Pathian lam ngaihtuahna hmang miah lova, hetiang zawhna ngaihtuah chu awmzia a neih loh hle. B.A. ka passed ve ta tih result ka hriat veleh kan khua Khopaiah ka haw a, Pathian rawngbawl tura kohna a vawi khatna atan Kohhran hruaitute chuan min lo leng a, mahse ka hnial. “Ka remchang rih loh” tiin ka chhang. Mahse, hemi hnuah keimah hlimna tluan tling ka neih thei tlat lo. Sum leh pai ngah hi hlimna emaw, tiin ka zawng a. Sum leh pai chu ka han thawk chhuak ve nual a, tlangval laia “Nuai tel” pawisa han kawl chang te pawh a awm thin, mahse hlimna a ni lo, tih chu ka thil hmuhchhuah a ni. Nunah hian Krista a tel lo chuan “Sum” hi hlimna nih lovin “buaina” a ni tih hi mi an sawi chu ka ring ngai lova, keimah a lo thlen hnuah ka hre chiang a ni.

         Tichuan ka nunah Kristan a Lal theihna turin leh ka “nun hi Krista” a lo ni theihna turin ka tawngtai a, Pathian rawngbawl turin ka inbuatsaih ta. Ka inhlan zo chiah, kan kohhran chuan Missionary thawktu an mamawh thu an lo chhuah nghal a. Fiahna nge, Kohna tak tak a ni tih ka hre thiam lo. Mahse, ka inhlan vek tawh. Ka tih tur ka tih a ngai. Tichuan Misssionary hna thawk tura lak zingah chuan vanhneihthlak takin ka tel ve hlauh mai, Tripura ah chuan tirh ka lo ni ta. Tisa taka ngaihtuah chuan Mission rawngbawl hna hi hna hautak tak mai a ni. Mahse, tunhma ka nun zawng zawng aiin ka nun hi a hlim a, lawmna thuruk sawi thiam harsa tak mai chu ka nei tlat a ni. Chu hlimna thuruk nia ka hriatte chu:

Krista tana Nung, Krista avanga Tuar

         Mahni tan thatna tur chauh ngaihtuah mi, mahni hmasial tak chu nih  ila, Tripura a kala hmelhriatte awm lohna hmun, helho tamna hmun, khaw lum leh sikserh tamna ramah chuan mahni duh thu chuan ka kal ka ring lo. Mahse, ‘kei’ hi ‘kei’ nih tawh lovin, Krista a ni tlat tawh. Krista tana nung ka ni a, Krista tan chuan ka tuar ngam tur a ni a. A hrehawm emaw, a hlauhawm emaw ka inhuam tur a ni. Chuvang chuan ka duh dan sawi leh ngaihtuah chu thil awmze neih loh a ni tlat. Chutianga Krista tana kan inhlan tak tak tawh hnuah chuan thil harsa a awm lova, thil tih theih loh a awm hek lo. Tirhkoh Paulan, “Kei atan zawng nun hi Krista a ni…” tih te, “Min tichaktu Krista-ah chuan engkim ka ti thei a ni” tih thu te a dik ziah ka lo hre chiang ta. Kei, rinnaa mi chak lo leh tling lo tak pawhin hetianga rinna ka neih theih a ni chuan Lalpa hnenah innghat tlat mi te tan chuan tih theih loh a awm dawn lo, tih chu a chiang nghal a ni. Hetah pakhat hriat tur pawimawh tak chu, Lalpa hian kan tih thei piah lam hi mi a phut ngai lova, kan tlin lo tur thil tih turin min nawr luih ngai hek lo. Chuvangin, Krista tana nung chu hlimna bul a ni a; hrehawm tlem han tawrh ve te chu Krista tan a ni avangin, a nuam a ni; a tluk a awm lo – a nuam tak zet a ni.

1. Mahni aia midang tha zawka ruat

       Tupawh hian mahni tha kan in tih theuva, midang te chu keini aia tha lo leh fel lo zawkah kan ngai fo. Hei hi mihring dan phung reng a lo ni. Chuvangin, mahni inphata midang te tha zawk leh fel zawka ngaih hi thil har tak a ni. Kei ina mite ka hmuh dan pakhat chu mi dik leh fel, mi piangthar tha tak a ni leh nih lo chu hrechiang loh mah ila, mi tupawh mahni tha in tih tlata, midang te tha lo zawka a ngai chuan a piangthar chiang lo-ah ka ngai. Mi piangthar tha tak tak te chuan midang te an sawisel satlia mai lova, an rel ve ngai lo, tih chu ka pawm dan a ni. A dik a dik chuan, keini aia fel lo zawk pawh an tam a, fel zawk pawh an tam. Mahse, kan Pathian thu chuan inngaitlawm taka midang te fel zawka ruat tur a ti miauh avangin, kan zawm a ngai. Inngaitlawmna nun ka han zir tan a, mi tupawh kei aia tha zawk leh fel zawkah tunah chuan ka ngai thiam ta. Tunah chuan tumah sawisel theih ka ni lova, chapo theih pawh ka ni hek lo. Hei hian hlimna thuruk min pe a, ngaihtuahna dik tak “Right attitude” ka neihna a lo ni ta. Mi ten an thil tihnaah ka ngaihdan an zawt kher lova, ka duh dana tih vek tur pawh an ni hek lo avangin, midang te duh dan hlutsak thiam a pawimawh ziah te, ka duh dan leh ka tha tih dan nih loh mah se, an duh dan chu an tana tha ber nih tura ka duhsak zawk ta thin a ni. Hemi avang hian tunah chuan mi te awm dan sawisel reng mi, mi phun chiar ka ni tawh lova. Mite tanpuitu ka ni lo vek pawhin, an thil tih thlawptu nih ka tum ta zawk a ni.

2. Engkimah lawmna

     Krista hnungzui te, Pathian hnena zaa za innghat tlat te nun hi han en ila, manganna leh lungngaihna an neih vak lo. A dang leh chu, mi dang te aiin an nun chu a tluang a, an hlim thin. Hei hi a chhan ni bera lang chu, engkimah lawmna an neih tlat vang a ni. Tunlai Thuhriltu mi lar tak Joel Osteen, Lakewood Kohhrana Pastor chuan, “Nun Krista ka neih chinah chuan engkim hi lawmna min petu an ni,” a lo tih hi min hneh hle. Mi tam tak chu Kristian nih mah se, an nunah Krista a nung lo avangin, hlimna tluan tling an neih theih lo. Ka nun hi Krista tana ka inhlan tawh chinah chuan, ka chhungte chu tunhma aiin ka hmangaih zawk a, thian ka neih chhun te hlutziah ka hre thar a. Pawisa tlem emaw a tam emaw han dawng ila, tunhma aiin ka lawm zawk a ni. Tunah chuan engpawh hi neih ila, Krista avang a ni avangin tunhma aiin ka lawm zawk a ni.

3. Dikna

     Mi tupawh hi thil sual tih lo ila, mi tha kan ni mai. Thil sual kan tih thin avang hian misual, mi fel lo, mi tha lo, kan lo ni thin. He sual hi thil pawi tak a ni. Tih hian kei chuan ka ngaihtuah a, thik dik lo hi tih lo ila, thil tha lo hi tih lo ila, dawt hi sawi lo ila, mi sual lo kan ni mai, tiin. Thil kan ti chhunah hian dik takin kan tih zel hi sual lo a ni mai, ka tih a. Thusawinaah pawh ni se, thil tihnaah pawh ni se, sum leh pai ah pawh ni sela, dik taka thil kan tih hian hlimna min pe tlat a ni. Chu dik taka thil kan ti zel chuan tun atan chauh nih lovin nakin atan thleng hlimna min pe dawn tlat. Mi thenkhat chuan mite hmuhah chauh an fimkhur thin a, mite hmuh phak lo leh hriat phak lovah chuan dik lo deuh pawh tih an hreh lo. Mahse, chu chuan nakin atan harsatna a thlen ta thin a ni.

Conclusion

        India Hnam Pa, Mahatma Gandhi chuan Bible hi a chhiar a, Lal Isua Krista nun leh zirtirna hi tha a ti hle a, amah ngeih pawh “Isua Krista hnungzuitu” a nih thu pha lovin a sawi hle nghe nghe a ni. Mahse, Ringtu tia inchhal Kristian te nun chu a en a, ani chuan Kristian nih a duh loh thu a sawi. Kristianna hi a tha lo nih lovin, keini ringtu intih te hian Krista Nun dik tak kan lanchhuahtir lovang a ni zawk. Chuvangin, rawngbawlpui duh tak te u, zaninah hian Krista Nun dik tak lantir lantirtu nih turin kan inchah a ni. Rinawm tak leh chhel taka Pathian hnungzui tur kan ni a, phunnawi tur kan ni lo. Krista Nun dik tak neihtu te chuan hei hi thil harsa a ni lova, hrehawm emaw a ni hek lo. Mahse, engkim hi hlimna min petu,  leiin a sawi fiah thiam lo “Hlimna Thuruk” a ni ta.

Pathian thuchah kan sawi te, kan za atan Pathianin Malsawm rawh se, Amen