Maraland Post pahy thei awpa ta thaina nata novahna na pietuhpa Abeipa hnohta alyna bie hla na ta, he Blog vaw tlyhapa zydua hnohta eima Beipa nata Pachhatuhpa Zisu Krista mohta alyna bie ei cha hla hmeihseih ei.
He Blog he January thla tawhta pahypa a cha tarawpa ta, atahma hata ei no vaw sie hapa tawhta viasa thokhazy hnohta pahnosapa tla vaw cha ta. Chanota khizaw su to rah to tawhta tlytuhpa ei vaw hnei hrapa he ei ly ngaita kaw. Ei lyna he chyhsapa paleih ta rei thaipa chhao cha vei. Nama cho liata ei ly hmeihseih. Tlytuhpazy rah nata aziepa he hawhna heta a cha. India tawhta 94, United States tawhta 12, Japan tawhta 5, Armenia tawhta 3, Malaysia tawhta 2 nata Australia tawhta 1 eima hnei. Aviapahchaipa ta Maraland.net zy ta a kawh viapa ta pahnopa a cha theipa nawpa phuahluah ei ta, ama hnohta alyna bie eima hla hra.
Computer lachhah thaina a hneipa cha leipa na ta, chavata pahnona chyh kaw na cho ta kheihta nata kheihta ma tao theipa tla a vaw cha. Chavata, mo angia kaw awpa tao thei leipa na ta; achuhaipa, achuna pacha peimawh awpa abyuhpa a chapa vata khodah hawhta update thei ngyu vana. Cha liata nama pachathaina ei cha haw chhielie ei. Tao dah pha viapa nata tao chheipa liata pado byuhpazy na vaw paso paka lyma awpa ta he Blog apasohtuhpazy ei cha haw ei. Anodeikuala, theina zydua papuapa lyma awpa ei vaw chhuah aw.
Abeipa ta nama raihriana liata nata achu liata byhna cha pie chyu mawh ei se.
1 comment:
Na taopha hmeiseih. Internet liata Marareih ta website/blogsite taopa he chyh kaw chyta chavata ahluh thei chaina hawhta tao lyma awpa he kho achhih ta, google nata search website hropazy liata "maraland" eima tlua daihti ta result display he chyh kawta, achhapa cha website sakha kha ei hluhpi display chhipa a cha khao tyh lei vata website nano nanopa hluhpi a y he apha kawna a cha. Maraland nohah a pa-ysa eima tah thei hra aw.
Tawhta, internet heta print media liata hlaotlohna eima to kaw mah leipa chhao phaohri pha kawpa maniah a pachha tah sila ado kaw thei aw. "I thie dah sakha dei y vei," ama tahpa hawhta nata, "Chhikao sakha a khaw khiah chhikao hropa A pahy tyh," ama tahpa hawhta acha eima tah thei hra aw. Print media hla chhaota a thatlo via daihti a y aw. Rah thokha liata newspaper uhthei kawpazy ama pachhasa, achhapa cha online nazy ama thatlo via haba vata a cha tahpa ta ama reih hra... cha hawhta daihti tlo aw mapi tah theipa chavei... Chavata, he hawhta na khopasana nata tiamana eima vaw hmopa he eima chalykhei hmeiseih. Khokheina asah chaipa eima cha hla...
Post a Comment