Argentina ta Quarter Final angia thei nawpa ta Costa Rica 3-0 ta ama pahnie

Football khizaw liata chyhsa mohpathahpazy puana su Latin America rah he atanoh taihta zawpizy sai chaipa a cha. Khizaw a y chhoh ta moh leidia thei khao lei awpa Pele nata Maradona zy, Ronaldo zy vaw puana su cha ta. Atahma chha liata thatih a hnei hluhchaipa Lionel Messi nata Higuain, Aquero zy puana rah a cha hra. Amo pathoh he atahma Tournament liata ama rah chata Striker zy cha ama cha.

Marasawzy chhao ta World Cup daihti liata cha Argentina achahpa he 'eima hluhchai khiah maw' tah thei awpa cha ta, mohropa hawhta moh leipa pi ta. Keimo rah hawhta nata keimo chyhsa hawhta eima pachapa kha a vaw cha. Atako Copa America cha Argentina rah liata cheingei patlopa cha ta. Lionel Messi cha khizaw sai chaipa a cha. Ano he a yna Barcelona cha La Liga nata UEFA Champion League Title lakhei ha ta. Ano zawhzi ta Barcelona cha Club zydua hry liata chonochaipa ta sopa a cha. Chahrasala, khizaw Football thatih reina liata deikua, a rah 'Argentina' he World Cup liata a Champion khei thei leipa vata lahaw vaw chhawhtuhpazy cha a kaw kho thei ah vei, atanoh taihta.

Atahma Copa America Football liana he ano nata a viasazy ta ama theina zydua papua ei ta. First Round ama khaihna liata pahniepa rai vaw hnei thei leipa ei ta, ei no ama khaih hapa liata Draw sai a vaw cha. Apatlotuhpa hmah cha hra ei sala, Quarter Final kaw tlo lei thei awpa duasu liata ama vaw duah ha. Chavata atamy ta ama khaih awpa Costa Rica cha ama pahnie cheingei awpa abyuh. Ama zydua ta thapi phia ei ta. A mopha hmeiseih.

Lionel Messi cha athai kaw, chahrasala Goal pangia thei vei. Vahneichhih kawpa ta Sergio Aquero ta First Half daihti chha chyta liata Goal vaw pangia ta, 2nd half vaw cha ta Argentina chata goal ei pangawh nawpa ta Aquero heta minute 52 liata vaw kho chhi heih ta, Argentina zawpizy ama thlah a vaw loh ha ba. He khai tawhta Di Maria ta minute 63 na liata vaw pangia chhi via heih ta. Costa Rica la tawhta goal ama pangia thei leipa vata Argentina cha vahneichhih kawpa ta Quarter Final a tlo thei haw hra.