Football: Brazil ta Quarter Final angia haw hra. Ecuador 4-2 ta ama pahnie

Neymar, Brazil

Defending Champion tla tah awpa cha vei; Brazil chhao First Round liata ama palohrie a thei hma. Chahrasala, ama striker ngachha chaipa, Football Market liata Club laipazy ta ama chahlo ngahaipa, Neymar ta Quarter Final a tlokhei haw hra.

Brazil heta First Round ei 2 ama khaih hapa liata point sano ngalah vaw hmo chy ta. Ecuador he ama pahnie leipa ta a cha khiacha Quarter Final kaw tlo lei awpa ama cha tahpa athei thlahhana chota akhaih ei ta. Pachapa hlata Ecuador cha vaw tao thei via ei ta, anodeikuala, Maico ta aka la tawhta Cross-ball vaw taopa cha, Pato ta aluh ta kei su ta. Minute 28-na liata 1-0 ta hmia ama sah. Chahrasala, a reipa liata Ecuador la tawhta Caicedo ta 37 min liata vaw pangia ha heih hra ta, ama kho ha. First Half a vaw chha haw.

Second Half a vaw thao ei ta, a dah a vaw nano via khiah maw, tah theipa a cha. Brazilian Striker Neymar ta ama rah chata 49 min liata goal a vaw pangia haw! Ama thapawh kaw, chahrasala Caicedo ta 59 min liata a vaw pasuh haw heih. A bua ha, "kheihtama a cha aw, Beipa?" tahpa Paw Minela hla chhao a vaw la pa nga kaw. Chanota Alexandre Pato ta thlai a vaw pangia ha heih, 61 min liata. Thlah apaloh thaipa cha khao vei. 

Ecuador lata thapi phia ei ta, sih pasuh heih cheingei awpa ama chhuah nota, Neymar ta Brizilian Player nata fans zy thlah paloh nawpa ta 72 min. liata goal vaw pangia heih ta. Chatanachata, daihti chhana taihta goal a ngiapa y khao leipa ta 4-2 ta Brazil cha ama tlo ha. Quarter Final cha ama ngia haw hra.