Aizawl Vrs Siaha- Thyutliazy A hra ba ei suh u

 By A.Zawngia

 

Aizawl he Mizoram State Capital cha ta, Aizawl District Headquarters a cha hra. Chanota, Siaha cha Maraland khihpi, Mara Autonomous District Council Headquarters nata District Headquarters a cha hra. Mawrah rei dah hawhta Aizawl khihpi nata District he No. 1 cha ta, Lunglei ta pazi ta, Siaha cha No. 3 hawhta reipa a cha tyh. Aizawl khihpi nata District he Mawrah pohpalohpa liata Population liata a sah patlua ei ta, Lolei ta pazi ta, Siaha deikua District thiehpazy hlata chhao ahnai viapa eima cha.

A.R. Field liata Articial Turf  aphawpa pahypa a cha haw

Zahnia Aizawl liata hmo tlopa cha Mawrah History liata ngiatlah cha awpa ta AR Lammual liata ‘Artificial Turf’ (Sipopa taochhyhpa, sipopa sawkha/company taopa) ama phawpa cha CM Puhpa Lal Thanhawla ta pahy ta. Thyutliapazy ama lyna dah awpa rei theipa cha vei. Atahma cha World Class playground liata Football ama khaih thei ha ba aw. Nohchho la hlata azo la akhaihpa mo pha via aw ta, nohsa ry liata akhaihpa tlyma, sai awpa tlyma byuh khao aw vei.

CM ta reih ta, atahma he Mualpui liata Rajiv Gandhi Stadium tao ngahaipa cha ta, Zobawk, Thenzawl nata Serchhip liata chhao tao pathao ngahaipa a cha, tahpa ta a reih. Lolei zy chhao he atahma hmah ama la nga kaw, tahpa pahnopa cha ta. A rei leipa liata District hropa Champhai, Kolasib, etc. zy chhao thatih thlai a vaw paro heih aw. Cha cha hmo vaw y awpa a cha.

Keimo Siaha he duah a sai tua ei si. AR Lammual hawhpa Siaha Vaihpi Tlylia cha eima hnei hra taraw. He District Playground he ko charei ta chiatlao sai ta bie tyh ta, tipo hawhta ti a pah-opa cha a cha tyh. Cha hawhta a chana cho ta Tornament chi nanopa tao tyhpa cha ta, atahma cha Indian Professional Player zy ama pua hrapa a cha. Sao vaw tla ta, Independence Day Trophy y heih ta. Independence Day a tlo awpa vata pheisaih alah awpazy alah (parade) nawpa ta a chiatlao tu hapa vata  alo dipa pabie heih tyh ei ta, he hawhta ko tochhih taopa a cha tyhpa vata eima palaona tlyliah (Playground) cha, ‘alei’ cha leipa ‘alo’ tlao a cha. Phura Playground nata Laki Playground hlata hmah pha lei viapa tla a cha.

He hleikho ta, lathloh sano siepahliena cha ta, a chiatlao vei khia akhuh khu aw ta, palao no ta chhao motor a vaw ra khiata cha ama khaihpa chalihsa awpa abyuh tyh. Cha cha eima khihpi “Siaha” duasu a cha.

Aizawl ta World Class Artificial Grass Playground ama hnei nota, hmahsiena la ama pangai no ta, keimo deikua cha hmahsiena y awpa lyu mah vei. Hmahsiena la eima pangai vei khia, hnoh eima sy tahna cha tloh ta. Ch’awkhiala, eima rah liata nopaw cha awpa nata eima vyuhpa ta ryureih awpa eima tlypazy cha ama y hra bao hnaih ta, khazia ma heta eima cha thlahha va i….? ei tah heih tyh.

Aizawl Municipal Council paduapa cha ta, pathao dyupa a chapa vata a chahno chahpawpa ala mah vei. Anodeikuala, Councilor zy ta Minister nata MLA zy cha diedopa liata a chado awpa a chhuah veih ei. Ama riahpha kaw. Siaha deikua cha ziahziroh ta roh thlahha ta, eima ti nata rah cha ta riahpha kawpa ta bie a reih awpa nata hmah ala awpa deikua yleipa eima lyu kaw he zaw….!

Thyutliazy, eima hmiala daihti pakhata ta eima pacha awpa abyuh.