Corrigendum : Dr. Hamlet Case sie pathu awpa lyu

Maraland Post, February 17, 2011 liata bie eima vaw papuapa liata achyhta thatih ro chheipa cha ta, Maraland Post User zydua hnohta nama pachathaina eima cha haw hmeihseih. He thatih he Telephone tawhta bie eima daopa cha ta, biedopa a cha awpa ta eima pangiasapa vata vaw papuapa a cha. Ary liata eima palasapa he eima rodah kha cha ta,

“…Rev. HC Khaicho, Pastor a chana tawhta paba hapa deikua la pakhua lilaw heih awpa ta biedaopa a cha hra”

                Anodeikuala daihti vaw sie ta, he he a hmeihseihpa cha khao vei tahpa pahno pi ta, thatih sia viapa pahno a chhuahpa ta eima theina rakha ta eima laichadai heih taraw. Nopaw la tawhta biedaona liata chhao cha hawhta (Rev. Khaicho) la pakhua heih awpa ta reina tlyma, biepataipa tlyma y hlei vei tahpa vaw pahno pi ta, chavata he bie he pananopa a cha ha ba aw.  He hawhta,

“Rev. HC Khaicho, Pastor a chana tawhta paba hapa deikua la pakhua awpa nata la pakhua lei awpa pahnopa cha mah vei, tahpa biedaopa a cha hra”

                Eima tao chheipa liata maniah ngiahthai awpa ta reipha eima vaw chei.

                Keimo he, mopakha phahnai a ngiahpa ta he hawhta News Report vaw taopa cha pi ta, nietluana ta nata Full Time ta thatih lapakhy theipa eima cha leipa vata bie sia kawpa – asu liata nata thatih a pahno chai awpazy keimo cheingei ta va sao hiah thei leipa pi ta. Thatihzy he Telephone tawhta bie eima daopazy tla a vaw cha tyhpa vata a ki leipa a vaw y pathleipa a cha. Kheihtarai chasala, eima pacha thai raihrie awpa nata a phana la a heihpa ta eima deichhy lyma awpa ta eima cha haw hra.

                Eima reih ta thatihbu puapa chyh ta, Website nata Blog zy chhao a chyh kaw. Rei khi leipa nata update thei leipazy sai tla cha ta, chavata daihti a cha-ie kawna hry ta phahnai eima ngiah paloh pakapa a cha. Chavata Constructive Comment zy a pie theipa cha sala, a pha kaw aw.

                Tawhla, he atahma thatih he a rah zawpi ta eima pahno byuh kawpa nata bielohhawh rei chaipa chhao cha ta, eima rah liata thatihbu liata chhao ama papua lih-la leipa a cha. Chatanachota eima rah liata ypazy cha, opa lyuhri nata viasazy hiahhri ei ta thatih thlai ama pahno thei tyh. Chahrasala, Marasaw khizaw su nanopa liata a pahrapazy chata cha keimo ta eima papuapa he thatih pahnona y chhohpa tla cha ta, cha hawhpazy pachapa ta keimo chhao phahnai eima ngiah kawpa a cha.

                Achha chaina liata eima rei khohpa cha, eima rah awnanopa liata buana a tlopa he pei tah hmeiseih pi ta, adyhna y thei sala tahpa eima khoh. Thaipacha viapa tlyma, thai lei pacha viapa tlyma hnei leipa pi ta, a chah viapa nata a chah lei viapa hnei ma pi. Kheihta ma eima rah Awnanopa nata zawpizy sapa nata thlahpa liata apohkhapa ta, hmaoh khata Abeipa eima chakao heih thei aw, khatita ma he buana he pai sala, adyhna eima rah liata a vaw charei heih aw, tahpa ta sai pi ta. Abeipa Thlahpa Pathaihpa ta rai vaw hria thei nawpa ta thlah tlao eima chha tyh. Maraland Post User zydua hnohta thlahchha via rili awpa ta eima cha haw hra.