Cha dovei awpa ama cha chhuah hra ma? Frauds!

By A.Zawngia

Company pakheipa ta chyhsa do tyhpa he khahla tawhta vaw y ei ta, eima rah liata chhao chyhsa hluhpi dopa ta ama vaw y haw. A hmeiseihpa ama cha leipa vata zawpi sy thei awpa ta phusa pohna a sah kawpa ta bie a taih ei ta, chahrasala phusa ama pangia ha nata a pohna hmopa cha rei lei, amo chhao hmo awpa khao tyh vei ei. He hawhta apakheipa (Fraud) ta phusa pohna a sah kawpa ta  zawpi soh lapakhypazy, Loan pie awpa bie ataihpazy, Lottery patupa hawhta chyhsa chho ei ta, soh sohpangia (deposit) awpa ta chhopazy y ei ta. Soh liasa ama pangia ha nata bie ama taihpa hawhta pie khao tyh vei ei. He he chyhsa hluhpi ta eima pahno ha tarawpa ta a pahno mah leipa hluhpi ama y chy. Dovei a hmahpazy hra poh via rili nga kaw ei ta, hmiala hlata so viapa ta nata thai viapa maniah dovei awpa a chhuahpa ta kha maniah chahlo cha-ei nga kaw ei ta, eima sohsi kaw awpa abyuh.

        Keima cheingeipa chhao ei hluhpi cha hawhpazy ta do awpa ta na vaw tei ha ei ta, anodeikuala atanoh taihta cha hawhpazy cha pai veih ei. Atahmano he ama hluh via pahchai khiah maw, tah theipa a cha. Cha hawhta do hmahpa Company thokhazy email liata cha na vaw paphaopazy cha: 

 1. CITI BANK PLC. Citi National House, 2 Triton Square, Regent's Place, Surrey, KT138UA, United Kingdom. Tel:  +44 703 597 1178 Fax: +44 8007314814. He heta ama British Premier oil Promotional Company liata £750.000.0  patupa hawhta cha ei na vaw paphao ei. Phusa la awpa ta amo Bank liata £165ta Account pahy awpa.

 2. British American Tobacco P.l.c. Globe House,4 Temple Place, London,WC2R 2PG. Registered Office: Registered in England and Wales no. 3407696.Tel. +44 701 075 8180. He Company heta £750.000.0  patupa hawhta cha ei na vaw paphao ei. Ama cha paphaopa liata he hmo (percel) vaw phaoh awpa ta Mr.Anderson Joseph Maxwell cha Delhi la a kaw zaw aw ta, Delhi my 10:00AM liata a kaw tlo aw. A kaw tlo pataw nata bie cha vaw chho aw ta. He parcel he Custom Office liata a pasia pano aw. Hmotao dah awpa a cha vaw chho aw.

3. British Tobacco Promo ta 1 million Pound.

4. British Mercedes Benz Promo tawhta £950,000.00 a cha heih hra.

 5. AT&T Promo 2011 tawhta 750.000.00 GBP a cha heih hra.

        He liata palasa leipa chhao a y holo. He hmo he Company hmeiseihpa lyu kaw hra ei ta. anodeikuala Company sakha tawhta ngalah vaw cha sala cha zo chhao a chhih via awpa cha ta, a vaw hluh tu hapa vata zo raita a chhih leipa a cha. A cho liata palasapa Company sanozy khi a hmeiseihpa alyu viapazy cha ei ta. Kheita ma tao awpa ama chhuah, tahpa pahno nawpa ta a sanona khi achhy na ta. Ama reipa hawh tlai zahni my 10:10 liata bie na vaw chho tlai ei ta.

        Cha liata Mr. Maxell ta a reipa cha, “Airport liata ei tlo dyupa cha ta, atahma he Custom Office la thlai pangai na ta. Nama Percel cha ei kei pasia aw. He custom department liata soh hryuhna deikua nama ta vaw toh awpa abyuh aw. Phusa na vaw paphao nawpa a/c no. chhao thlai ei chaw chho aw,” na tah ta. “Chata sy,” tahpa ta tla achhy na ta. Dawh 11 pa rachhoh liata sms ta a/c no. cha na vaw paphao ha tlai ta. “STATE BANK OF INDIA. CURRENT ACCOUNT NO.20043277441. NAME.LEELA KUMARI.V.INJUMURI.PAN NO.AAQPI8686Q. IFS CODE: SBIN0000552,” tahpa ta. Bie na vaw chho pazi ta. Custom Department liata Tax chei awpa byuhna zie cha Rs. 18,600.00 cha ta. Thlai vaw paphao mah y, na tah ta. “Uh” tahpa ta tla a chhy na ta.

          Phusa cha paphao awpa a chhuah rima leipa na ta. Dawh 2-pa rachhoh liata bie na vaw chho heih ta. Phone cha la khoh khao leipa na ta. Zala dawh 3-pa rachhoh liata bie na vaw chho heih ta. “Phusa dua ma ei dao vei, khazia ma?” na vaw tah ta. Kei ta, “Chaw paphao awpa khoh na ta, anodeikuala he lachhah rairuna y ta, aryhpaoh thai leipa ta, ei ch’aw paphao thei khao leipa a cha. A pei kaw. Kheihtarai cha sala, ei Percel cha bah naw paphao thlahha teh. He liata Delivery Payment tao awpa ta,” tah na ta. A pachadah cha khao leipa ta, phone cha soh haw ta.

        He hawhpa Company pakheipazy heta chyhsa dovei awpa tlua nga thlahha ei ta, kei chhao ei na chhuah ei. Na do awpa ama chhuah nota amo cha tlao ei dovei palie hapa ta ei pacha. He tawhta cha bie rai ta na kaw chho khao vei.

           He hawhta dohmahpa he India rah liata chyhsa hluhpi y ei ta, thokhazy cha Foreigner zy cha ei ta; thokha cha India chyhsa cheingei chhao ama hluh kaw. “Fraud Company Case” tahpa Internet liata eima moh khia cha ama hluh kaw. Keimo lata chhao zako la tawhta reina y ta. Nigeria paw cha Delhi liata patupa a cha, tahpa thatihzy cha khiliah bie liata eima thei.

          Meghalaya Police hiahhri ei na ta, he hawhpa he Meghalaya State liata chhao chyhsa hluhpi ta buakhei ei ta, Case chhao eima register holo. Anodeikuala, he hawhta a taopazy he a sohsi kaw ei ta, phusa ama dao tawhta cha lei syulyu ha tyh ei ta, Contact theipa cha leipa ei ta, tlua thaipa chhao cha veih ei. Ama so kaw. Chyhsa thokhazy cha thy syno sytho a pahleipazy chhao ama y holo na, tahpa ta a reih.

         He vana heta eima sohsi kaw awpa abyuh. Lottery patupa hawhtazy, Company Promotion hawhtazy, Loan pie awpazy, Investment tao awpa tazy chyhsa dovei awpa achhuahpa hluhpi ama y. Mawrah liata “Chiahpuam” hleikho ta Company pakhei hluhpi ama vaw pua haw. Siaha lia cheingei chhao soh hluhpi pahleipa ama cha haw. Chavata dopa ta eima y lei nawpa eima sohsi awpa a peimawh kaw.

            Bengali-zy pachadah liata “chyhsa ama cha dovei thei khiala, cha chadoveituhpa cha nama hlata a so via tahna a cha. Nama ta chyhsa na dovei thei khiata la, na cha na soh via tahna a cha hra,” tah ei ta. Chavata sohpaliena liatazy chyhsa dovei theipa cha awpa ta ama chhuah chyu. Tlaw zakha ta hmo ama zuapa he a siapa ta ama reih leipa aw ei ta, tlaw zano ta cha chaleisa ngiathia awpa ama chhuah aw. Chanota na ta dovei awpa achhuah la, dovei thei va chi. Chavata, adoveina nata apakheipa ta hmotaopazy tawhta kha a vaih ei suh u.