Rev. VL Ngaia Hlychho Pathliena Bietapa

By A.Zawngia

    Shillong Biatuhpa Rev. VL Ngaia Hlychho cha ECM Headquarters Office liata Executive Member, Education, etc. chata atlyhpa a chapa vata thlai sie ha awpa cha ta, keimo Shillong Awnanopa sahlaozy chata cha a sie awpa he pasaih lei kaw hra ei sihla, rahpolohpa chata raihria awpa a chapa vata pathlie lei thai awpa cha ma pi. Chavata, atanoh khata KTP zy ta pathliena daihti Pastor Quarter liata hneipa cha ta, zala pati nie dohkhohna eima hnei hra. He pathliena daihti he KTP zy ta chhihtha ei ta, bietana hnei awpa nata hmo byuhpa tao awpazy cha a vaw rao khai ha ei ta. Kei chhao ei daihti a cha-ie kawna chota aza hlaokhei hra ei na ta. Daihti eima hmah pha kaw. Tota topa ta hla chhihtha na ta, biereina daihti hnei awpa a pangiasa leipa na ta, a hnabeiseih hra va na. Biereituhpazy bietana cha pakhata ta nahthlie na ta, pha ei tah kaw. Daihti chhana tlo daihma pi ta, Chairman ta ei khapi ta biereina daihti chyupa, mini 5 ngalah hnei thei awpa ta daihti cha tlao na vaw pie haw ta. Apacha chhieliena daihti hnei hma va na.

       He hawhna heta zako viala 2008 liata Py Hrawhna (HSLC) liata hlaotlohpa alykheina daihti liata chhao a pachana y tla leipa ta mini 2 bierei awpa na hrua heih ei ta, chanota chhao mini taipa hawhta cheingei daihti hmah na ta. Mini taipa hleikho he chaka beih va na. Atahma liata chhao mini 5 piepa ei chana hawhta achyusia thei chaipa hawhta daihti hmah cheingei awpa cha ei pachana a vaw ngia tuachaipa a cha.

       Chairman Chktp. Beizalaihmo, President ta ei na hruana nata ei duana likawh liata mini 2 a pacha hmana daihti hnei na ta, ei ly kaw. A duah papua na ta….

       “Beireina daihti hnei awpa ta apachana y leipa ta, atanoh cha pathliena daihti hmah awpa nata pati doh awpa ta azupa tlao cha na ta, chavata biereina daihti hma awpa hlata cha pati nie patoh via awpa khona keima liata lai via ta,” tah na ta. Zawpi cha pahneih ei ta.

       Reihpazao na ta, “Chahrasala biereina daihti mini 5 ei hnei thei hrapa ta ei ly kaw. Mini 5 thai thai ei reih aw. Ei rei awpa he 3 ta pachhaih na ta…..

      1-na liata cha, he pathliena daihti eima hmakhai pataw nata nohthlahpa lakheina (photo session) eima hnei aw. Chyhsa hluhpi hrochhoh daihti liata nohthlapa lakhei awpa ta a hrua leipa ei ta, thi tawh khola nohthlapa eima lakhei tyhpa he a pha lei kaw. Yzie hnei lei chaipa a cha. Chavata atanoh Pastor nah chhohkha pathlie awpa ta avypa zydua cha nohthlahpa eima lakhei khai aw. Atanoh hawhpa liata la ama pakah hmah chapao ula, cha sie aw veih ei. Myla hanoh deikua la, “Papuh” na tah tua leipa ta bie achho chakhyh thei khao va chi. Chavata he daihti he memory liata soh awpa ta nohthlapa lakhei khai awpa ta ei cha hrua chyu ei.

     2-na liata. FC Real Madrid pahno chyu pi ta, ama Coach Jose Mourinho eima pahno chyu nata ei hnabei a seih. Jose he chyhsa rohnahpa cha ta, chavata ano sasyh nata chyhsazy ta, “The Special One” tahpa ta moh ama bipa a cha. FC Porto mohhoh ta, Champion League Trophy la ei ta, Chelsea la a vy ta, Premier League nata Tournament nano nanopa liata Champion khei ta, Inter Milan ama duasu a chhie kaw nota kei mohhoh ta Champion League nata Trophy zydua ala khai heih. Ano hawhta khizaw liata Coach hlaotlohpa he y tla veih ei. Cha hawhna hra cha ta, atahma eima pastor he keima ta cha “Special Pastor” tahpa ta bi khoh na ta. Achhapa cha Tripura Mission Field liata ko 3 chhoh chakaona rai hria khoh pi ta. Mission Field liata buana nata ahra-i-hra-uana (adyhryh leina) hluhpi cha ano azu tawhta pai khai ta, ziza pha kawpa ta a puasai. He hleikho ta a yna su liata maihta a chakaona he ngiatlah cha kawpa hluhpi a y. Chavata Headquarters liata rai kaw hria aw ta, a nanona nata hlaotlohna a y cheingei awpa ta khacha ei hnabei a seih.

     3-na liata cha “Kyhpachana he a mo a zoh hmeiseihna” tahpa he eima pahno kaw sai nata ei pangiasa. Satlia ta laihsa khona daihti liat a laihsano chhiena rai hmo khao vei. Chahawh pyly ta, chyhsa nama hao khiah, nama haopa liata phana rai hmo aw vah ei chi. He he a pei kaw. Eima kho kawpa vata sia leina eima mopakho awpa cha leipa ta, eima haopa vata siana eima mopakho awpa cha hra vei. Chavata, mohropa siana nata chieh-leinazy eima hmothai raihrie awpa cha ta, kho eima pathliah thai kaw awpa abyuh kaw.  Tawhla, no nah ngalah he chyhsa kyh reih veih ei, paw-nah chhao chyhsa kyh reih leipa ta y thei hra ma pi. Chahawhna hra chata eima Pastor kyh chhao eima reih hra aw. Eima Pastor chhao he sialeina hluhpi a hnei aw. Chyhsapa ahyhmah pha paki ma pi. A siana liata eima mopa awpa cha sala, a chiehleina tawhta keimo ataopathina chata eima hmah thai awpa a cha Ano liata ngiatlah cha kawpa sakha cha, ano he Leadership Quality a hnei pha kawpa a cha. Cha Quality cha eima sai dah deikua alyu tla ngyu aw vei. A kheihhawhpa rai chasala ano tawhna heta keimo thyutliazy ta achu awpa hlupi eima hneipa ta ei pahno

             (Mini khophie ei hnei thlahha chy) Achha chaina liata cha, atanoh ano he Shillong puasaipa ta Siaha la kaw y aw ta, hahko la kei chhao pua heih hra aw na ta. Chahawhna chata pakha pakha ta he su he eima puasai aw. He khizaw he eima chareina nata khitlyna rah deita cha ta, ahyhmah ta ypathlah aw ma pi. Anodeikuala, khati daihti lia tlyma la eima hmo heih aw. Chavata, a sietuapa nata a hnoh viapazy tla eima cha.  Anodeikuala bie ei cha khohpa ei cha, khataih su lia rai y ei sihla, ngiatlah chapa nata rei tlah chapa siesai awpa ta ei cha haw chyu ei. Eima pastor nata a chhohkhazy hnohta hmiala ama chakao lyma nawpa liata khokheina sahchaipa ei hla hra,” tahpa ta biereipa pachha na ta, aza tyuh na ta, mi 5 thai thai daihti ei hmah.

Zawpi ta ama kuzy chabaih hra ei ta, ama deichhyna vata ei ly kaw.