Rev. Dr. Laiu Fachhai cha ko 2008 tawh khata John Roberts Theological Seminary, Shillong liata Visiting Professor ta vaw hria ta, ko thoh (3) tlai a hria tawhta zakhahnia khata he Seminary liata a chakaona tawhta a paha ha chy aw tahpa a reih. Ko 2009 khata ama chhohkha ta Rinjah vaih, Shillong tawhta Seminary Campus la kaw y ei ta, pachyhnoh khata ama chhaichhizy ama paly papua. Atahma he Polo Site Area, SIM Office liata khih ama sa ba aw. Ano he Old Testament Department liata pachu ta, he Seminary liata a hriana chhapa chhao Krizyhpa thyutliazy rahzohpa chakaona la a hluh thei chaipa ta ama sie thei nawpa ta pasyu awpa cha a chhuah chaipa a cha, tahpa ta reih ta. Pachutuhpa a chana hawhta Devotion liata chakaona zydua nata class liata daihti ryhpaohpa mai liata Mission chakaona lachhah he thata a pachu tyh.
Ano he chyhsa athaipa a chapa hleikho ta, chyhsa sia kawpa- Discipline a hnei kawpa cha ta, "Simple Living High Thinking" ama tahpa hawhpa he a cha. Daihti avaona (Punctuality) liata chhao a vao pahnie kawpa a cha. Ama novah ta Abeipa chakaona nata Mission rai cha sakhana liata sohpa cha ei ta, atahma ta he pachutuhpa a chana tawhta apahasai hapa chhao Mission chakaona lachhah phahnai a ngiah via awpa a khohpa vata a cha, tahpa ta a reih hra.
A eihhrahpa ta Farewell Program taopa cha leipa ta, chahrasala zahnia pahanoh my kha ano ta chakaona daihti hmah ta, “Khasi thyutliazy, mission chakaona sie awpa rairu nama tah kaw tahpa ei pahno. Nama rah he pha ta, rah hropa lata sie awpa he chyhsapa pachapa ta byuh kaw nawpa y vei. Anodeikuala, pacha tua u, he Seminary paduatuhpa John Robert zy he ko 120 hla khata he rah vaw tlo ei ta, cha daihti lia cha eima rah he lathloh phapa y leipa ta, thatihbu rei awpa y hra vei. Khihsana pachapa ta he rah la a khy ta, khihsa awpa cha byuh a chhih tiarah aw vei, tahpa eima pahno thei aw. Chahrasala, khihsana hlata Abeipa chakaona nata thatihpha chho awpa cha ama paloh liata lai via ta. Chatanachata keimo he pachhasawzy kaw cha theipa eima cha. Ko 100 a siehapa daihti liata cha Notlarah (Western Countries) tawhta thatihpha maniah chho ei ta, atahma deikua cha keimo heta khizaw liata thatihpha eima chho daihti a cha ha ba. Keimo thyutliazy eima patohpatia awpa abyuh, cha cha Abeipa ta maniah a hnawpa a cha,” tahpa ta a bietana hnohchaipa liata chhao Theology achuhaipa thyutliazy a pahao heih.
A no ta a Testimony reih ta, “Ei lahpino (Debbie Fachhai) he thaina liata M.Sc (Public Health) patlopa cha ta, sawkharai hriapa cha sala Officer rai a hria awpa a cha. Taiwan liatazy cha Unemployment he zero (0) cha ta, rai a hmo leipa he ahyhmah y veih ei. Anodeikuala, Abeipa chakao awpa ta a hla khai ta, sawkharai hria leipa ta Abeipa chakaona rai a hriapa he ano chata rai phachaipa ahria theipa hawhta a pacha ta, tlao aly kaw. Keima chhao he Zyhno High School liata pachutuhpa cha na ta, chahrasala Abeipa chakao awpa ta ei rai bahsai na ta. Chyhsazy ta ‘na hru kaw dua maw, khazia na rai a pha thla bao nata, na bahsai thlahha’ na tah tyh ei ta. Keima pachana lia deikua la, ei so kawpa vata sawkharai bahsai ta Abeipa chakaona raihriana chah pahnopa tlao ei cha, ei tah tyh. Chavata keimo ta la, o nata lyu siesaipa ta chakaona raihriapa he rai rohnah chaipa hawhta eima pacha,” tahpa ta a reih.
Seminary liata a hria chhohta a hrialahpa nata achuhaipazy deichhyna nata khokheina thata a topa vata alyna bie reih ta. Seminary Students zydua nata zapahti (dinner) dohkhei awpa a khohpa vata Rs. 3000/- cha Mess Committee hnohta a hmie nata abyuhpazy chalei nawpa a hla ei. Students zy chhao ama paloh a lie kaw sai ta. He chakaona a hnei khai tawhta nohthlah thata ama palasakhei hra.
Ano he ECM Pastor a cha ngahaipa nata Serving in Mission (SIM), North East India Region liata Director a cha ngahaipa a cha.
2 comments:
He post title he vaw hmo na ta Rev. Dr. Laiu Fachhai cha khazia ma a rai tawhta a paha thlah tly vaw tah nah ta, chasala a rai zydua tawhta chaleipa ta a chakaona sakha - Seminary liata a pachupa ngala dei a paha saipa vaw pahno na ta, ei paloh tha a vaw dah via syulyu haw.
Eima pahno chyupa hawhta a rai peimawh viapa cha SIM liata NE chhoh zydua liata Director rai kha a chapa ta pahno na ta, Seminary lata pachuna rai a chakaopapa kha a rie chhao a thei khei kaw aw. Ano he Mara literature la liata otoh (pillar) peimawh kawpa nata Mara Bible Translation Committee paduapa liata member a chana hawhta he rai he cha a paha sai chypa he a rai zy chhao tlyh via aw ta, a rai bahta a tlyh via awpa he Mara literature chata daihti hmana a hnei hluh via heih hra aw tahpa kha aloh pita, contribution pha kawpa a tao pazao lyma awpa chhaota eima hnabeiseih kawpa a cha.
Chavata, "A rai tawhta a paha haw" tahpa ta ropa he bahta a title chata a misleading ngyuna aw tahpa pachana ei hnei. "..Seminary liata pachuna rai a paha sai ha chy" tahpa ta tlao thla awpa chi a chapa a lyu kaw.
Daihti chaie kawna chota news, article, etc zy eima post chyu tyh vata khoachhih khai leina nata atloh leina he a y thei. Eima pachathai chyu awpa abyuh kaw tyhpa chhao a cha.
Tawhta, Right column la heta latest comment" chhao kha na login tita 'page element' tawhta vaw add pa hrala tly a pha via pachai heih aw.
Na blog/site vaw tly tyh hra na ta nah pava achhih kaw tyh. Vaw tao via lyma ma y.
From Maraland.net regular user!
Nama comment nat khokheina ly a chhih kaw. He title ei ro no nata ei sona daihti liata chhao thata ei pacha. He liata 'Logic' chyhta ei hmah. A sia kawpa ta title soh theipa cha ta, anodeikuala he hawhta title eima sopa heta chyhsa a sy viapa ta ei pahnopa vata he hawhta ropa a cha.
A do kaw. Computer knowledge hnei chyh kaw na ta, achu via awpa nata mohropazy a saohiah awpa ei chhuah nga kaw. Daihti he bahta a vaw cha-ie chy ta, atahma thla tawhta exam hnei awpa ei chapa vata Update lachhah chhao ei tao thei mah khao leipa a cha.
Nama khokheina vata ei ly kaw. Exam khai tawhta a pha viapa ta tao cheingei awpa ei vaw chhuah aw. Maraland Post vaw reihtuhpa nama thlahchhana liata rie bah naw thei muh vy. Ei chaly kaw ei.
Post a Comment